រាជធានីភ្នំពេញ ៖ ការប្រកួតប្រដាល់ជុំចុងក្រោយក្នុងពូលA នៅសង្វៀនបាយ័នស្ទឹងមានជ័យ កាលពីល្ងាចថ្ងៃសុក្រទី២១ មិថុនា បានធ្វើឲ្យមានភាពរំជើបរំជួលយ៉ាងខ្លាំងក្នុងស្រទាប់អ្នកតាមដានភាគច្រើនដែលស្នេហាកីឡាប្រដាល់ ។ ជាមួយនឹងលទ្ធផលឈ្នះរបស់កីឡាករឈិន ក្វាន់ង៉ុយ បានរុញឲ្យសាន វិចិត្រ ហាលអាវស្ទើរមិនគួរឲ្យជឿ ខណៈដែលឆាកប្រយុទ្ធរបស់គូនេះ ប្រឹងប្រែងតាំងពីដើមទីធ្វើឲ្យមានសំឡេងហ៊ោកញ្ជ្រៀវកញ្ជ្រោលពេញសង្វៀន ។
លទ្ធផលផ្ដាច់ព្រ័ត្រក្នុងពូលAកីឡាករកែវ វិរៈ មកពីក្លិបគជសារកីឡាបានក្លាយជាអ្នកមានពិន្ទុខ្ពស់លេខ១ ដោយមាន១៣ពិន្ទុនៅក្នុងដៃបន្ទាប់ពីគេអាចផ្ដួលកីឡាករកែវ រំជោត មកពីក្លិបដំបងគ្រញូងខេត្តបាត់ដំបងឲ្យសន្លប់ក្នុងទឹកទី២ដូចការគ្រោងទុក ។ លទ្ធផលផ្ដួល កែវ រំជោត ឲ្យសន្លប់ក្នុងទឹកទី២ បានរុញឲ្យកីឡាករកែវ វិរៈ ក្ដាប់១៣ ហើយក្លាយជាអ្នកឈរក្នុងលំដាប់លេខ១ក្នុងពូលក្នុងពេលដែលកីឡាករ៣រូបផ្សេងទៀត គឺសាន វិចិត្រ ឈិន ក្វាន់ង៉ុយ និងម៉ាប់ ឆៃយ៉ា បានត្រឹមតែក្ដាប់១១ពិន្ទុស្មើ ហើយស្ថិតក្នុងភាពប្រទាញប្រទង់ ។
យ៉ាងណាមិញ មិនខុសពីរូបមន្តដែលបានព្យាករទុកនោះទេ ដោយសារឈិន ក្វាន់ង៉ុយ មានប្រវត្តិផ្ដួលគូប្រកួតឲ្យសន្លប់ក្នុងទឹកទី១បានល្អជាងគេ ទើប១១ពិន្ទុរបស់កីឡាករទាំង៣បានក្លាយជាឱកាស ឲ្យឈិន ក្វាន់ង៉ុយ ឈរលេខ២ក្នុងពូល ហើយបានឡើងទៅកាន់វគ្គខ្វែង ។ សាន វិចិត្រ មកពីក្លិបផ្សារបឹងទំពុន ដែលក្ដាប់១០ពិន្ទុរួចទៅហើយ បែរក្លាយជាចាញ់ស្ទើរមិនគួរឲ្យជឿក្រោមដៃកីឡាករឈិន ក្វាន់ង៉ុយ មកពីក្លិបមកុដរាជសីហ៍ ។ រំលឹកដល់គូនេះ ឈិន ក្វាន់ង៉ុយ វាយត្រូវច្រើននៅដើមទឹក ប៉ុន្តែមួយដៃៗរបស់គេហាក់មិនសូវទាញពិន្ទុប៉ុន្មានទេ ដោយសារតែគេវាយឆ្វេងវាយស្ដាំ មិនត្រូវចំគោលដៅ ។
គិតត្រឹមទឹកទី៣សាន វិចិត្រ នៅតែមានប្រៀបជាងឈិន ក្វាន់ង៉ុយ ពិសេសនៅពេលគេវាយមួយដៃៗទៅលើឈិន ក្វាន់ង៉ុយ គឺបានល្អ ។ ទោះបីយ៉ាងណា ក្ដីសង្ឃឹមរបស់សាន វិចិត្រ បានក្លាយជាអសារបង់ទាំងស្រុងបន្ទាប់ពីឈិន ក្វាន់ង៉ុយ ប្ដូរយុទ្ធសាស្រ្តវាយសម្រុកម្ដងជាពីរដង ហើយធ្វើឲ្យរយះក្រោមប្រជុំចិញ្ចើមរបស់គេមានឈាមហូរដូចទឹក ។ សាន វិចិត្រ នៅមិនទាន់កំណត់ថាចាញ់នៅឡើយទេ ក្នុងពេលដែលគេប្ដូរជីវិតនៅដើមទឹកទី៤ស្ទើរតែធ្វើឲ្យឈិន ក្វាន់ង៉ុយ ទប់ជំហរសឹងតែមិនជាប់ ។ ជាសំណាង ឈិន ក្វាន់ង៉ុយ ដែលមានឱកាសសម្រុកខ្លាំង ក្នុងពេលសាន វិចិត្រ រយះប្រជុំចិញ្ចើមខ្លាំង បានក្លាយជាអ្នកឆ្មក់ត្រូវកណ្ដាលមុខសាន វិចិត្រ ផ្ទួនៗ នៅហៀបនឹងបញ្ចប់ទឹក ទើបធ្វើឲ្យកីឡាករឈិន ក្វាន់ង៉ុយ ឈ្នះពិន្ទុ ហើយក្លាយជាអ្នកបានឡើងទៅកាន់វគ្គខ្វែង ត្រូវតាមការយល់ឃើញរបស់អ្នកទស្សនាជាង២ភាគ៣។
លទ្ធផលខាងលើបានរុញឲ្យកែវ វិរៈ ដែលក្ដាប់១៣ពិន្ទុឈរលេខ១ ឯឈិន ក្វាន់ង៉ុយ ដែលក្ដាប់១១ពិន្ទុស្មើគេឈរលេខ២ ។ លទ្ធផលនេះក៏បានធ្វើឲ្យសាន វិចិត្រ ត្រូវហាលអាវមិនគួរឲ្យជឿផងដែរ បើទោះជាគេបានអះអាងថា នឹងផ្ដួលឈិន ក្វាន់ង៉ុយ នៅមុនពេលឡើងប្រយុទ្ធគ្នា ។ ចាំមើលឱកាសឡើងវគ្គខ្វែងរបស់កែវ វិរៈ និងឈិន ក្វាន់ង៉ុយ អាចឲ្យពួកគេណាម្នាក់ ដណ្ដើមបានខ្សែក្រវាត់របស់ក្រុមហ៊ុនសេងហុងហេង បានឬមិនបាន ៕
ចែករំលែកព័តមាននេះ