រាជធានីភ្នំពេញ ៖ សង្វៀនប្រដាល់បឹងស្នោនាល្ងាចថ្ងៃសៅរ៍នេះនឹងមានការប្រកួតរវាងកីឡាករខុសជំនាន់គ្នា២រូប គឺកីឡាករសេង ហៀង ដែលទើបល្បីក្នុងជំនាន់ថ្មី និងកីឡាករចាស់វស្សាល្បីយូរមកហើយ លី ចំរើន ដែលអ្នកណាក៏ស្គាល់ថាជាកណ្ដូបបុកស្រូវដ៏ខ្លាំងក្លា ។ ជំនួបរវាងកីឡាករទាំងពីរគេមិនទាន់ហ៊ានសន្និដ្ឋានថា អ្នកណានឹងឈ្នះនៅឡើយទេ ដោយសារតែពួកគេសុទ្ធតែឱបជាប់នូវចំណុចវិជ្ជមាន និងអវិជ្ជមានប្រហាក់ប្រហែលគ្នា ។
រវាងកីឡាករ សេង ហៀង មកពីក្លិបចាក់អង្រែមានជ័យ និងកីឡាករលី ចំរើន មកពីក្លិបរស្មីកុមារកំព្រាត្រូវគេកត់សម្គាល់ថាជាជើងខ្លាំង និងល្បីឈ្មោះដូចគ្នា ។ បើទោះជាលី ចំរើន ជាជើងខ្លាំងជំនាន់មុន ដែលអាចនិយាយថា ហាក់បាក់កម្លាំងមិនដូចក្មេង ប៉ុន្តែកីឡាកររូបនេះ ក៏មិនទាន់បាត់បង់សមត្ថភាពរហូតជាប់ឈ្មោះជាខ្លាឈឺនៅឡើយទេ ។ ដោយឡែកចំពោះកីឡាករសេង ហៀង ដ្បិតថាក្មេង ហើយជាជើងខ្លាំងស្រករក្រោយមែន ប៉ុន្តែកន្លងមកគេធ្វើឲ្យខូចឈ្មោះរួចមកហើយថាពូកែលក់ខ្លួន ហើយបានបណ្ដោយខ្លួនឲ្យបាត់បង់ភាពខ្លាំង ព្រោះតែល្បីថាមិនសូវចូលក្លិបហ្វឹកហាត់ ។
មួយរយៈចុងក្រោយកីឡាករសេង ហៀង ស្ទើរតែបាត់ឈ្មោះពីការគាំទ្រតែម្ដង បន្ទាប់ពីគេរងការចោទថា មិនប្រឹងប្រែងហ្វឹកហាត់បង្កើនសមត្ថភាពស្របនឹងការរិះគន់ថា ដើម្បីធ្វើចាញ់ ។ ការប្រកួតប៉ុន្មានលើកចុងក្រោយកីឡាករទាំងពីរមានលទ្ធផលអវិជ្ជមានច្រើនជាងវិជ្ជមានប្រហាក់ប្រហែលគ្នា ដែលតាមការស្ទាបស្ទង់ រវាងអ្នកទាំងពីរ គឺមិនខុសពីកីឡាករធ្លាក់ដៃដូចគ្នានោះទេ ។ រវាងពួកគេ មិនអាចថាអ្នកណាមានសមត្ថភាពជាងអ្នកណាបានឡើយ ដោយសូម្បីតែកម្លាំងស៊ុហ្វក៏មើលទៅចុះខ្សោយមិនចាញ់គ្នាប៉ុន្មានដែរ ។
កីឡាករលី ចំរើន ដ្បិតថាច្រើនអស់ស៊ុហ្វ ចាប់ពីទឹកទី៤ទៅ ប៉ុន្តែស្នៀត និងបច្ចេកទេសប្រកួតរបស់គេ ក៏មិនធម្មតាដែរ ក្នុងអំឡុងដើមទឹកដែលពិបាកឲ្យជើងខ្លាំងស្ទើរស្នៀតវ័យក្មេងមួយចំនួនវាយសម្រុក ។ ចំពោះកីឡាករសេង ហៀង វិញត្រូវគេមើលឃើញថា ធ្លាក់ដៃមិនដូចមុនដូចគ្នា ទើបរវាងកីឡាករទាំងពីរបើទោះជាម្នាក់ក្មេង និងម្នាក់ទៀតមានវ័យជ្រេ ប៉ុន្តែពួកគេកំពុងត្រូវគេប្រដូចថាជាខ្លារបួសមិនខុសគ្នា ។
យ៉ាងណាមិញចំពោះការប្រកួតគេមិនអាចប្រដូចថា ពួកគេជាខ្លារបួសបានទេ គឺប្រាកដស្ទុះវាយសម្រុកគ្នាឲ្យល្អមើលជាក់ជាមិនខាន ។ លី ចំរើន គេជឿថាចង់រក្សាក្រេឌីតមិនឲ្យក្មេងយកឈ្នះទៀតឡើយ ខណៈដែលសេង ហៀង វិញ ក៏ត្រូវគេជឿថាចង់រក្សាក្រេឌីតកុំឲ្យគេថា គ្រាន់តែខ្លាចាស់ម្នាក់ក៏ប្រយុទ្ធឲ្យចាញ់ ។ ដូច្នេះមានន័យថា រវាងកីឡាករទាំងពីរ គឺពិតជាប្រឹងប្រកួតមិនអាចប្រហែសបានឡើយសម្រាប់ល្ងាចនេះ ។ នៅថ្ងៃសៅរ៍នេះដែរ ក៏មានការប្រកួតរវាងកីឡាការិនី វី ស្រីឆាយ មកពីក្លិបនាគមានជ័យ និងកីឡាការិនី ម៉ុន សម្រស់ មកពីក្លិបមិត្តប៉ូលិស ។
កីឡាករម៉ន លីហួ មកពីក្លិបព្រែកឯង និងកីឡាករផាន់ ពិសិដ្ឋ មកពីក្លិបគជសារកីឡា។ កីឡាកររឿម វណ្ណៈ មកពីក្លិបក្រសួងការពារជាតិ និងកីឡាករនឿន សាវឌី មកពីក្លិបអេភូថង កីឡា ដែលជាគូទទួលការចាប់អារម្មណ៍ផងដែរ ។ នៅថ្ងៃអាទិត្យស្អែកសង្វៀនបឹងស្នោដដែលក៏នឹងមានការប្រកួតរវាងកីឡាករឡង់ ភារម្យ មកពីក្លិបរាហ៊ូកីឡា និងកីឡាករ ឡៅ ចន្ទ្រា មកពីក្លិបទ័ពពិសេសឆត្រយោង៩១១ និងមួយគូទៀតគឺរវាងកីឡាករ ឯម លីថូ មកពីក្លិបឫទ្ធិពោធិ៍សែនជ័យ និងកីឡាករផាន់ សារុន មកពីក្លិបព្រះខ័នរាជ ដែលជាគូទាក់ទាញការចាប់អារម្មណ៍ខ្លាំងដូចគ្នា ៕
ចែករំលែកព័តមាននេះ