រាជធានីភ្នំពេញ ៖ ពុទ្ធ ហ៊ុច មកពីក្លិបពុទ្ធសេរីវង្សព្រែកតាទែន ត្រូវបានផ្គូផ្គងឱ្យជួបប្រកួតជាមួយហ៊ីម សារ៉ាន់ មកពីសមាគមកីឡាប្រដាល់ក្រសួងការពារជាតិ នៅលើសង្វៀនស្ថានីយទូរទស្សន៍រាជធានីភ្នំពេញប៉ុស្តិ៍លេខ៣ ថ្ងៃសៅរ៍ទី២២ មិថុនា ស្អែកនេះ ចំណែកវង្ស ណយ មកពីក្លិបកងពលតូចលេខ៣១ ប្រកួតជាមួយឡន លឿប មកពីក្លិបកងពលតូចលេខ៧០ ។
ហ៊ីម សារ៉ាន់ ជួប ពុទ្ធ ហ៊ុច លើកនេះមិនហា៊នប្រហែសឡើយ បើទោះជាគេចាស់វស្សាជាងបន្តិចក្តី ក៏គេមិនអាចមើលស្រាលលើពុទ្ធ ហ៊ុច បានដែរ ព្រោះកីឡាកររូបនេះមិនមែនដំឡូងមូល ដែលងាយស្រួលផ្តួលឡើយ ។ បើនិយាយពីល្បិចប្រយុទ្ធហ៊ីម សារ៉ាន់ អាចល្អជាង ប៉ុន្តែបើកម្លាំងស៊ុហ្វ គឺមិនអាចទៅរួចជាមួយ ពុទ្ធ ហ៊ុច ឡើយ ។ ទោះបីហ៊ីម សារ៉ាន់ មានបទពិសោធន៍ខាងវាយយូរឆ្នាំជាង ពុទ្ធ ហ៊ុច មែនប្រហែលជាគេមិនហា៊នវាយលុកផ្តេសផ្តាសទេ ព្រោះបើហា៊នតែវាយដោយខ្វះការប្រុងប្រយ័ត្នអាចនឹងភ្លាត់ស្នៀតដោយសារ ពុទ្ធ ហ៊ុច វិញមិនខានទេ ។
ពុទ្ធ ហ៊ុច មានស្នៀតជើងល្អជាងស្នៀតដៃ បើទោះជាការទាត់ចេញរបស់គេមិនសូវរហ័សរហួន តែមានទម្ងន់ធ្ងន់ បើហ៊ីម សារ៉ាន់ បណ្តោយឱ្យទាត់ត្រូវវិញនោះច្បាស់ជាវីវរមិនខាន ។ ចាំមើលហ៊ីម សារា៉ាន់ អាចធ្វើអីពុទ្ធ ហ៊ុច បានទៅ ។ ឡន លឿប ជួបវង្ស ណយ លើកនេះគេគ្មានសង្ឃឹមថាអាចយកឈ្នះបានឡើយ ព្រោះគេល្អបានតែស្នៀតកណ្តាប់ដៃនិងស្នៀតជើងបន្តិចប៉ុណ្ណោះ ឯស្នៀតកែង និងជង្គង់ចេញមិនរួចទេ ម្យា៉ងវិញទៀតរាល់ការវាយចេញរបស់គេមានភាពយឺតយ៉ាវខ្លាំងណាស់ ។ រីឯវង្ស ណយ វិញជាកំពូលអ្នកប្រើស្នៀតកែងយ៉ាងស្ទាត់ជំនាញបំផុត អ្នកដែលជួបគេគឺមិនអាចមានការធ្វេសប្រហែសបានឡើយ ។
វង្ស ណយ ចរិតរបស់គេមិនចូលចិត្តអូសបន្លាយពេលវេលាយូរនោះទេ តែបើឡន លឿប អាចតស៊ូជាមួយគេបានត្រឹម៣ទឹកនោះគឺអាចមានសង្ឃឹមខ្លះ ព្រោះវង្ស ណយ តែងវាយសង្គ្រុបគូប្រកួតនៅទឹកដំបូងនិងតែងទទួលបានផលល្អទៀតផង ជាពិសេសស្នៀតកែងរបស់គេពេលវាយចេញម្តងៗបង្កគ្រោះថ្នាក់ខ្លាំងណាស់ ។ ទោះបីយ៉ាងណាគេក៏មិនត្រូវមើលស្រាលលើឡន លឿប ពេកដែរ ព្រោះពេលខ្លះការប្រកួតក៏ពឹងលើសំណាងផងដែរ ។
ក្រៅពីគូចាប់អារម្មណ៍២គូនេះទៅនៅមានការប្រកួតរវាង ម៉ន ភិរម្យ មកពីក្លិបវិស្វកម្មបច្ចេកទេសព្រែកឯងទ័ពជើងគោក និង ជន សាវុធ មកពីក្លិបពោធិ៍សែនជ័យ ។ លី ជិនហឺរ មកពីក្លិបសិង្ហកីឡា ជួបជាមួយរាជសីហ៍ ចាន់ ឌី មកពីក្លិបសម្រែករាជសីហ៍បង្ក្រាបគ្រឿងញៀន និងសល់ ពិសិដ្ឋ មកពីក្លិបអាស៊ីកីឡា ជួបជាមួយតក់ សោភ័ណ្ឌ មកពីក្លិបអេភូថងកីឡា ៕
ចែករំលែកព័តមាននេះ