2​ឆ្នាំ​ទៀត កម្ពុជា​នឹង​មាន​អគ្គិសនី​ប្រើប្រាស់​គ្រប់គ្រាន់​ទូ​ទាំង​ប្រទេស


រាជធានី​ភ្នំពេញ ៖ រដ្ឋមន្ត្រីក្រសួង​រ៉ែ និង​ថាមពល​បាន​អះអាង​ថា ឆ្នាំ​២០២០ នឹង​ទទួល​បាន​ជោគជ័យ​ទាំងស្រុង​លើ​ការ​ផ្គត់ផ្គង់​អគ្គិសនី​គ្របដណ្តប់​គ្រប់​ភូមិ​ទាំងអស់​នៅ​ទូ​ទាំង​ប្រទេស ជា​អគ្គិសនី​ដែល​មានគុណ​ភាព និង​ស្ថិរភាព ។

លោក ស៊ុ​យ សែ​ម រដ្ឋមន្ត្រីក្រសួង​រ៉ែ និង​ថាមពល បាន​ថ្លែង​លើក​ឡើង​បែប​នេះ​នៅ​ក្នុង​ជំនួប​ពិភាក្សា​ការងារ​ជាមួយ​លោក​ជំទាវ Sunniya Durrani-Jamal នាយិកា​ស្ថាន​តំណាង​ធនាគារអភិវឌ្ឍន៍អាស៊ី​(ADB)​នៅ​ទីស្តីការក្រសួង ថ្ងៃ​ទី​២៨ ខែ​វិ​ច្ឆ​កា​កន្លង​មក ។

លោក​រដ្ឋមន្ត្រី​បាន​លើក​ឡើង​ថា គោលនយោបាយ​អភិវឌ្ឍន៍​វិស័យ​ថាមពល​ឆ្នាំ​២០២០ របស់​រាជរ​ដ្ឋា​ល​ភិ​បាល នឹង​ទទួល​បាន​ជោគជ័យ​ទាំងស្រុង​លើ​ការ​ផ្គត់ផ្គង់​អគ្គិសនី ដោយ​គ្របដណ្តប់​គ្រប់​ភូមិ​ដែល​មាន​ជាង​១​ម៉ឺន​ភូមិ​នៅ​ទូ​ទាំង​ប្រទេស ដោយ​មក​ដល់​ពេល​នេះ រាជរដ្ឋាភិបាល​បាន​ត​ភ្ជាប់​ទៅ​តាម​ភូមិ​ទូ​ទាំង​ប្រទេស​បាន​ចំនួន​៨៦,៨៥% និង​បាន​ត​ភ្ជាប់​ដល់​ខ្នង​ផ្ទះ​ប្រជាពលរដ្ឋ​បាន​៧៣%​ហើយ ។ « ដូច្នេះ​នៅ​ក្នុង​ផែនការ​ដល់​ឆ្នាំ​២០២០ យើង​នឹង​អា​ចត​ភ្ជាប់​បាន​គ្រប់​ភូមិ​១០០%​នៅ​ទូ​ទាំង​ប្រទេស ។

លោក​រដ្ឋមន្ត្រី​បាន​រំលឹក​ថា ៖« ការ​អភិវឌ្ឍន៍​វិស័យ​អគ្គិសនី ចាប់តាំងពី​ក្រោយ​ពី​របប​ខ្មែរក្រហម​មក កម្ពុជា​បាន​ដើរ​ចេញពី​ចំណុចសូន្យ មក​មាន​អគ្គិសនី​ផ្គត់ផ្គង់​គ្រប់គ្រាន់ និង​ឯករាជ្យ​ភាព​ដោយ​ខ្លួនឯង »​។

លោក​បញ្ជាក់​ថា ៖« មក​ដល់​បច្ចុប្បន្ន ការ​អភិវឌ្ឍន៍​វិស័យ​អគ្គិសនី​កម្ពុជា មាន​វា​រី​អគ្គិសនី​ចំនួន​៦​កន្លែង​កំពុង​ដំណើរការ ក្នុង​នោះ​ប្រភព​ចេញពី​ធ្យូងថ្ម ប្រភព​មក​ពី​រោងចក្រ​ដុត​ប្រេង​ខ្មៅ ប្រភព​ថាមពល​កកើត​ឡើង​វិញ និង​ប្រភព​អគ្គិសនី​ចែកចាយ​អគ្គិសនី​តូច​ៗ សរុប​ទាំងអស់​កម្ពុជា​មាន​ថាមពល​ដែល​កំពុង​ផ្គត់ផ្គង់​ជាង​២​ពាន់​មេ​ហ្គា​វ៉ា​ត់ ដែល​បាន​និង​កំពុង​ដំណើរការ » ។

លោក​ជំទាវ Sunniya Durrani-Jamal នាយិកា​ធនាគារអភិវឌ្ឍន៍អាស៊ី​(ADB)​ប្រចាំ​កម្ពុជា បាន​ថ្លែង​នូវ​ការ​កោត​ស​សើរ​អំពី​ការ​អភិវឌ្ឍ​ក្នុង​ការ​បំពេញ​តាម​សេចក្តី​ត្រូវការ​ក្នុង​ប្រទេស ។ ទោះជា​យ៉ាងនេះ​ក្ដី លោក​ជំទាវ​បាន​ថ្លែង​ថា ដើម្បី​ជំរុញ​ការ​គ្រប់គ្រង​វិស័យ​នេះ​ឲ្យ​កាន់តែ​មាន​តម្លាភាព ការ​រៀបចំ​ផែនការមេ (Master Plan) មាន​សារសំខាន់​ណាស់​សម្រាប់​កម្ពុជា ។

លោក​ជំទាវ​បន្ត​ថា ៖« បច្ចុប្បន្ន​ក្រុមបច្ចេកទេស​របស់​ធនាគារ​ADB​កំពុង​ពិ​ភា​គ្សា​ដើម្បី​ជួយ​ដល់​ការ​រៀបចំ​គម្រោង​នេះ ដែល​ជា​ផ្នែក​មួយ​ជំរុញ​ឲ្យ​វិស័យ​អគ្គិសនី​នៅ​កម្ពុជា ទទួល​បាន​ជោគជ័យ​មួយ​យ៉ាង​ធំ សម្រាប់​ឆ្លើយ​តប​នឹង​តម្រូវការ​នៃ​ការ​ប្រើប្រាស់ ជា​ពិសេស​ការ​ផ្តល់​ផលប្រយោជន៍ ដល់​ការ​អភិវឌ្ឍ​របស់​ប្រទេស​ជាតិ​កាន់តែ​ខ្លាំងក្លា​ថែម​ទៀត »​។

នៅ​ក្នុង​គោលនយោបាយ​អភិវឌ្ឍន៍​វិស័យ​ឧស្សាហកម្ម​ឆ្នាំ​២០១៥-២០២៥ រាជរដ្ឋាភិបាល​កម្ពុជា បាន​ដាក់​ចេញ​នូវ​ការ​បញ្ចុះតម្លៃ​អគ្គិសនី​, ការ​រៀបចំ​តំបន់ឧស្សាហកម្ម​, ការ​បណ្តុះបណ្តាល​ធនធានមនុស្ស ដើម្បី​ប្រែក្លាយ​ពី​ឧស្សាហកម្ម​ដោយ​ប្រើប្រាស់​អតិពលកម្ម ទៅ​ជា​កម្លាំង​ពលកម្ម​ជំនាញ​ដែល​អាច​បង្កើត និង​ទាញ​យក​តម្លៃបន្ថែម​កាន់តែ​ច្រើន ។

ជាមួយ​គ្នា​នេះ ប្រមុខ​រាជរដ្ឋាភិបាល​បាន​បញ្ជាក់​ជា​សាធារណៈ​ថា នៅ​ឆ្នាំ​២០១៩​ខាង​មុខ​នេះ នឹង​បញ្ចុះ​តម្លៃ​អគ្គិសនី​បន្ថែម​ទៀត ដើម្បី​ផ្តល់​ផលប្រយោជន៍​ដល់​ប្រជាពលរដ្ឋ និង​វិស័យ​ឧស្សាហកម្ម​កម្ពុជា។

សម្តេច​តេ​ជោ ហ៊ុន សែន បាន​បញ្ជាក់​យ៉ាង​ដូច្នេះ​ថា ៖« ការ​បញ្ចុះ​ថ្លៃ​អគ្គិសនី វា​ក៏​នាំ​មក​នូវ​ការ​ប្រកួត​ប្រជែង​រវាង​កម្ពុជា ជាមួយនឹង​ប្រទេស​ជិតខាង ដែល​ក្នុង​នោះ​ការ​បញ្ចុះ​ថ្លៃ​អគ្គិសនី វា​មិន​គ្រាប់​តែ​សម្រួល​ដល់​ម្ចាស់​រោងចក្រ ម្ចាស់​សណ្ឋាគារ និង​ម្ចាស់​អាជីវកម្ម​ប៉ុណ្ណោះ​ទេ ក៏​ប៉ុន្តែ​ប្រាក់​ដែល​ចំណេញ ពី​ការ​បញ្ចុះ​ថ្លៃ​អគ្គិសនី វា​នឹង​បាន​ទៅ​ជា​ផលប្រយោជន៍ ដែល​ដំឡើង​ដល់​ប្រាក់បៀវត្សរ៍​សម្រាប់​កម្មករ កម្មការិនី ដែល​ធ្វើការ​នៅ​ទីនោះ » ។

លោក​បណ្ឌិត ម៉ី កល្យាណ ទីប្រឹក្សា​ជាន់ ខ្ពស់​ឧត្តម​ក្រុមប្រឹក្សា​សេដ្ឋកិច្ចជាតិ បាន​ថ្លែង​កន្លង​មក​ថា តម្រូវ​ការ​​ថាមពល​អគ្គិសនី​នៅ​កម្ពុជា​ពិតជា​ត្រូវការ​កាន់តែ​ច្រើន​ទៅ​ៗ​ហើយ ដោយសារ​កម្ពុជា​កំពុង​អភិវឌ្ឍន៍​យ៉ាង​ឆាប់រហ័ស ព្រោះ​វិស័យ​អ្វី​ក៏​ត្រូវការ​អគ្គិសនី​ដែរ​ដើម្បី​ធ្វើ​ឲ្យ​ខ្សែ​សង្វា​ក់​ផលិតកម្ម​បាន​រលូន ។

ទោះបី​យ៉ាងណា លោក​ថ្លែង​ថា ៖« ថាមពល​អគ្គិសនី​នៅ​កម្ពុជា​នៅ​មាន​តម្លៃ​ថ្លៃ​នៅឡើយ បើ​ធៀប​ជាមួយ​ប្រទេស​ជិតខាង ប៉ុន្តែ​នៅ​ក្នុង​គោលនយោបាយ​អភិវឌ្ឍន៍​វិស័យ​ឧស្សាហកម្ម ឆ្នាំ​២០១៥-២០២៥ រាជ​រដ្ឋាភិបាល​បាន​ផ្តោត​អាទិភាព​លើ​ការ​បញ្ចុះតម្លៃ​ថាមពល​អគ្គិសនី​ផង​ដែរ »៕

Facebook Google Twitter Email

Live

Sponsored News

០២:៣៩ | ក្នុងស្រុក

ក្រុមហ៊ុន ភីធីធី កម្ពុជា ផ្តល់អាហារូបករណ៍ ៣០០កន្លែងដល់សិស្សកម្ពុជា ដើម្បីបណ្តុះបណ្តាលអ្នកដឹកនាំវ័យក្មេងតាមរយៈវគ្គសិក្សាពីចម្ងាយ «ទម្លាប់ល្អទាំង ៧របស់យុវវ័យឆ្នើម»

ការស្ទង់មតិគេហទំព័រថ្មី




សូម​អរគុណ