ការនាំចេញអង្ករពីប្រទេសថៃដែលជាប្រទេសនាំចេញធំបំផុតទី២ នឹងកើនឡើងដោយសាររដ្ឋាភិបាលបានកាត់បន្ថយតម្លៃដែលផ្តល់ដល់កសិករដើម្បីទប់ស្កាត់ការចំណាយ ។ នេះបើយោងតាមសមាគមនាំចេញអង្ករថៃបានឲ្យដឹងកាលពីថ្ងៃព្រហស្បតិ៍ ។ ប្រធានកិត្តិយសសមាគមលោកChookiat Ophaswongse និយាយថា ការលក់អង្ករអាចមានចំនួនសរុប៧លានតោននៅក្នុង
ការនាំចេញអង្ករពីប្រទេសថៃដែលជាប្រទេសនាំចេញធំបំផុតទី២ នឹងកើនឡើងដោយសាររដ្ឋាភិបាលបានកាត់បន្ថយតម្លៃដែលផ្តល់ដល់កសិករដើម្បីទប់ស្កាត់ការចំណាយ ។ នេះបើយោងតាមសមាគមនាំចេញអង្ករថៃបានឲ្យដឹងកាលពីថ្ងៃព្រហស្បតិ៍ ។ ប្រធានកិត្តិយសសមាគមលោកChookiat Ophaswongse និយាយថា ការលក់អង្ករអាចមានចំនួនសរុប៧លានតោននៅក្នុងឆ្នាំនេះហើយនៅឆ្នាំ២០១៤នឹងមានចំនួន៨លានតោន ។
គួរបញ្ជាក់ថា កាលពីថ្ងៃពុធ គណៈកម្មាធិការគោលនយោបាយអង្ករជាតិបានអនុម័តការកាត់បន្ថយតម្លៃអង្ករ២០%ពី១៥.០០០បាតដល់១២.០០០បាតក្នុងមួយតោនដើម្បីជួយគាំទ្រដល់តម្លៃស្រូវ ។ ការសម្រេចនេះចាំបាច់ត្រូវអនុម័តដោយគណៈរដ្ឋមន្ត្រី ។
ប្រទេសថៃបានចំណាយទិញស្រូវអង្ករកសិករដល់ទៅ៥០%លើសពីតម្លៃទីផ្សារក្នុងស្រុកចាប់តាំងពីខែតុលា ឆ្នាំ២០១១ ដើម្បីបង្កើនប្រាក់ចំណូល ។ ប្រទេសនេះបានចំណាយអស់៥៨៨,៧ពាន់លានបាតដើម្បីទិញអង្ករ២៧លានតោន ពោលគឺស្មើនឹង៧០%នៃការនាំចូលសាកលប្រចាំឆ្នាំ ។ រដ្ឋាភិបាលបានប៉ាន់ស្មានថា កម្មវិធីនេះបានខាតបង់ទឹកប្រាក់អស់១៣៦,៩ពាន់លានបាតនៅក្នុងឆ្នាំ២០១១-២០១២ ។
កាលពីថ្ងៃទី៣ មិថុនា ស្ថាប័នផ្តល់ចំណាត់ថ្នាក់ឥណទានMoody’sបាននិយាយថា ការខាតបង់នេះបានប៉ះពាល់ការសម្រេចគោលដៅលំនឹងថវិកានៅក្នុងឆ្នាំ២០១៧ ហើយមានភាពអវិជ្ជមានសម្រាប់ការផ្តល់ចំណាត់ថ្នាក់ថវិការបស់រដ្ឋាភិបាល ។លោកChookiat បានបន្តថា ការកាត់បន្ថយតម្លៃនឹងធ្វើឲ្យអង្ករថៃកាន់តែថោកនៅលើទីផ្សារអន្តរជាតិ បង្កើនការនាំចេញ និងដាក់សម្ពាធមកលើតម្លៃអង្ករពិភពលោក ។ទំហំនៃកំណើននាំចេញនឹងផ្អែកទៅលើប្រតិកម្មរបស់ប្រទេសវៀតណាម និងប្រទេសឥណ្ឌាដែលអាចទម្លាក់តម្លៃដើម្បីប្រកួតប្រជែងជាមួយថៃ ។
យោងតាមទិន្នន័យពីសមាគមនំាចេញបានបង្ហាញថា តម្លៃអង្ករ៥%របស់ថៃបានធ្លាក់ចុះ៨,៩%ដល់៥៣២ដុល្លារក្នុងមួយតោននៅក្នុងឆ្នាំនេះ ។ អត្រាដែលបានធ្លាក់ចុះនេះដោយសារមានការរំពឹងទុកពីការកាត់បន្ថយតម្លៃ និងកំណើនការផ្គត់ផ្គង់ពីប្រទេសឥណ្ឌា និងវៀតណាម ។ បើតាមទិន្នន័យដដែលបានឲ្យដឹងទៀតថា តម្លៃអង្ករប្រភេទដូចគ្នារបស់ឥណ្ឌាមានតម្លៃ៤៤៥ដុល្លារក្នុងមួយតោន ហើយអង្ករវៀតណាមមានតម្លៃ៣៧០ដុល្លារក្នុងមួយតោន ។
ចែករំលែកព័តមាននេះ