ទីក្រុងហ្សាការតា ៖ លោក Zulkifli Hasan រដ្ឋមន្ត្រីសម្របសម្រួលកិច្ចការស្បៀងអាហារប្រទេសឥណ្ឌូណេស៊ី បានរិះគន់ការចង់ធ្វើឱ្យផ្លែទុរេនក្លាយជាផ្លែឈើនិមិត្តរូបជាតិរបស់ប្រទេសម៉ាឡេស៊ី ដោយលោកបានអះអាងថា ការធ្វើបែបនេះ គួរតែជាឥណ្ឌូណេស៊ីឯណេះវិញទេ…
ទីក្រុងហ្សាការតា ៖ លោក Zulkifli Hasan រដ្ឋមន្ត្រីសម្របសម្រួលកិច្ចការស្បៀងអាហារប្រទេសឥណ្ឌូណេស៊ី បានរិះគន់ការចង់ធ្វើឱ្យផ្លែទុរេនក្លាយជាផ្លែឈើនិមិត្តរូបជាតិរបស់ប្រទេសម៉ាឡេស៊ី ដោយលោកបានអះអាងថា ការធ្វើបែបនេះ គួរតែជាឥណ្ឌូណេស៊ីឯណេះវិញទេ ដោយសារតែការផលិតកម្មខ្ពស់ជាង។ នេះបើតាមប្រភពពីសារព័ត៌មាន VnExpress ចេញផ្សាយនៅថ្ងៃទី២៣ ខែវិច្ឆិកា ឆ្នាំ២០២៥។
លោក Zulkifli Hasan ដែលត្រូវបានស្គាល់ថា Zulhas បានប្រាប់ប្រព័ន្ធផ្សព្វផ្សាយនៅក្នុងស្រុក កាលពីថ្មីៗនេះថា «ឥណ្ឌូណេស៊ីបានផលិតផ្លែទុរេនបានជិត ២ លានតោនក្នុងឆ្នាំ ២០២៤។ តួលេខនេះ លើសពីតួលេខរបស់ម៉ាឡេស៊ីឆ្ងាយណាស់។ ដោយការពិតនេះ ខ្ញុំគិតថា ទុរេនគួរតែជាផ្លែឈើនិមិត្តរូបជាតិរបស់ប្រទេសឥណ្ឌូណេស៊ី» ដោយលោកបានកត់សម្គាល់បន្ថែមទៀតថា ទុរេន គឺជាវប្បធម៌ និងជាប្រភពចំណូលដ៏សំខាន់សម្រាប់កសិកររាប់លាននាក់នៅក្នុងប្រទេសឥណ្ឌូណេស៊ី។
ទោះបីជាលោកទទួលស្គាល់ថា ការនាំចេញទុរេនរបស់ម៉ាឡេស៊ីបានកើនឡើងគួរឱ្យកត់សម្គាល់ ដោយសារពូជល្អៗដូចជា Musang King ក៏ដោយ ក៏លោកសង្កត់ធ្ងន់ថា «នៅពេលនិយាយអំពីនិមិត្តរូបជាតិ អ្នកគួរតែឈរលើទិន្នន័យ និងការពិត។ ដ្បិតផ្លែទុរេន Nusantara គឺជាចំណុចខ្លាំងរបស់ប្រទេសឥណ្ឌូណេស៊ីនៅអាស៊ី»។
ប្រទេសឥណ្ឌូណេស៊ីមានពូជទុរេនចំនួន ២១ ប្រភេទក្នុងចំណោម ២៧ ប្រភេទដែលត្រូវបានទទួលស្គាល់ទូទាំងពិភពលោក ហើយរហូតដល់ឆ្នាំ ២០២៤ ឥណ្ឌូណេស៊ីមានពូជថ្មីល្អៗប្រមាណ ១១៤ ប្រភេទ ដែលត្រូវបានចុះបញ្ជី។
ការកត់សម្គាល់ដ៏ច្បាស់លាស់របស់រដ្ឋមន្ត្រីឥណ្ឌូណេស៊ីរូបនេះបានកើតឡើង បន្ទាប់ពីសំណើមួយពីសមាគមអ្នកផលិតផ្លែទុរេនម៉ាឡេស៊ី ដែលស្នើឱ្យអាជ្ញាធរមូលដ្ឋានរបស់ខ្លួនដាក់បញ្ចូលផ្លែទុរេនជាផ្លែឈើនិមិត្តរូបជាតិរបស់ប្រទេសម៉ាឡេស៊ី និងកំណត់ថ្ងៃទី៧ ខែកក្កដា ដើម្បីប្រារព្ធទិវាផ្លែទុរេនជាតិផងដែរ។
លោកស្រី Datuk Nor Sam Alwi អគ្គនាយកនៃក្រសួងកសិកម្មម៉ាឡេស៊ី បានឱ្យដឹងថា ក្រសួងបានទទួលសំណើនេះ នៅថ្ងៃទី៨ កញ្ញា កន្លងទៅ ប៉ុន្តែមិនទាន់មានការសម្រេចចិត្តផ្លូវការណាមួយត្រូវបានធ្វើឡើងលើការស្នើទាំងពីរនេះនៅឡើយទេ។
លោក Eric Chan ប្រធានសមាគមអ្នកផលិតផ្លែទុរេនម៉ាឡេស៊ីបានថ្លែងថា សំណើនេះមានបំណងអបអរសាទរទំនាក់ទំនងពិសេសរបស់ម៉ាឡេស៊ីជាមួយផ្លែទុរេន និងជំរុញការផ្សព្វផ្សាយពាណិជ្ជសញ្ញាសកលរបស់ខ្លួន មិនមែនទាមទារជាកម្មសិទ្ធិផ្តាច់មុខនោះទេ។ លោកថា ផ្លែទុរេនជាផ្នែកសំខាន់មួយនៃបេតិកភណ្ឌវប្បធម៌ ទេសភាពកសិកម្ម ក៏ដូចជាអត្តសញ្ញាណសកលរបស់ម៉ាឡេស៊ីជាយូរមកហើយ។
លោកបានទទួលស្គាល់អំពីទិន្នផលខ្ពស់ជាង និងទំនាក់ទំនងយូរអង្វែងរបស់ឥណ្ឌូណេស៊ីទៅនឹងផ្លែទុរេន ប៉ុន្តែលោកក៏បានកត់សម្គាល់ថា និមិត្តរូបជាតិ ក៏អាចត្រូវបានជ្រើសរើសសម្រាប់សារៈសំខាន់វប្បធម៌ ឫសគល់ប្រវត្តិសាស្ត្រ និងសមាគមសកលផងដែរ។ លោកបានដសង្កត់ធ្ងន់ថា «ទាំងម៉ាឡេស៊ី និងឥណ្ឌូណេស៊ី មានចំណងវប្បធម៌ និងប្រវត្តិសាស្ត្រជ្រាលជ្រៅជាមួយផ្លែទុរេន និងរីកចម្រើនពាសពេញតំបន់របស់យើង។ ដូច្នេះការធ្វើឱ្យផ្លែទុរេនក្លាយជាផ្លែឈើនិមិត្តរូបជាតិរបស់ប្រទេសម៉ាឡេស៊ី មិនបានបញ្ឈប់សិទ្ធិរបស់ប្រទេសឥណ្ឌូណេស៊ីក្នុងការធ្វើដូចគ្នានោះទេ»។
សូមជម្រាបថា ផ្លែទុរេនបានក្លាយជាផ្នែកមួយដ៏សំខាន់កាន់តែខ្លាំងឡើងនៃសេដ្ឋកិច្ចរបស់ម៉ាឡេស៊ី។ ឥឡូវនេះ ផ្លែទុរេនត្រូវបានដឹកជញ្ជូនទៅកាន់ទីផ្សារជាង ៤០ រួមទាំងប្រទេសចិន កូរ៉េខាងត្បូង ចក្រភពអង់គ្លេស និងអារ៉ាប់រួម ដោយទំហំនាំចេញសរុបបានកើនឡើងពី ១៣៧,៥លានដុល្លារអាមេរិកក្នុងឆ្នាំ ២០២០ ដល់ ៣៦៣,៦លានដុល្លារក្នុងឆ្នាំ ២០២៣ មុនពេលធ្លាក់ចុះមកត្រឹម ២៨៤លានដុល្លារ កាលពីឆ្នាំមុន។ តាមទីភ្នាក់ងារសារព័ត៌មានជាតិ Bernama បានឱ្យដឹងថា ក្រសួងកសិកម្ម និងសន្តិសុខស្បៀងម៉ាឡេស៊ីបានព្យាករណ៍ថា ការនាំចេញផ្លែទុរេនអាចឈានដល់ ៦៩ ០០០ តោន ដែលមានតម្លៃ ៤៣៣,៥លានដុល្លារ នៅឆ្នាំ ២០៣០៕
ចែករំលែកព័តមាននេះ