ទីក្រុងគូឡាឡាំពួ ៖ វិស័យទេសចរណ៍របស់ប្រទេសម៉ាឡេស៊ី ត្រូវបានកំណត់សម្រាប់កំណើនរឹងមាំជាបន្តបន្ទាប់នៅឆ្នាំ ២០២៥ ហើយប្រទេសអាស៊ីអាគ្នេយ៍មួយនេះ កំពុងខិតខំបន្ថែមទៀត ដើម្បីឆ្ពោះទៅរកកំណើនភ្ញៀវទេសចរបរទេសចំនួន ៤៧ លាននាក់…
ទីក្រុងគូឡាឡាំពួ ៖ វិស័យទេសចរណ៍របស់ប្រទេសម៉ាឡេស៊ី ត្រូវបានកំណត់សម្រាប់កំណើនរឹងមាំជាបន្តបន្ទាប់នៅឆ្នាំ ២០២៥ ហើយប្រទេសអាស៊ីអាគ្នេយ៍មួយនេះ កំពុងខិតខំបន្ថែមទៀត ដើម្បីឆ្ពោះទៅរកកំណើនភ្ញៀវទេសចរបរទេសចំនួន ៤៧ លាននាក់ និងប្រាក់ចំណូលចំនួន ៨០ ពាន់លានដុល្លារអាមេរិក សម្រាប់កម្មវិធី «Visit Malaysia 2026»។
ម៉ាឡេស៊ីជាប្រទេសស្វាគមន៍ភ្ញៀវទេសចរបរទេសច្រើនជាងគេនៅអាស៊ីអាគ្នេយ៍ ពោល ចំនួន ២៤,៥លាននាក់ ត្រូវបានកត់ត្រាក្នុងរយៈពេល ៧ ខែដំបូង នៃឆ្នាំនេះ ដែលកើនឡើង ១៦,៨% បើធៀបនឹងរយៈពេលដូចគ្នា កាលពីឆ្នាំមុន។ បើតាមរបាយការណ៍ពីក្រសួងទេសចរណ៍ សិល្បៈ និងវប្បធម៌ម៉ាឡេស៊ី បានឱ្យដឹងថា ការចំណាយលើវិស័យទេសចរណ៍បានកើនឡើង ១៧៤% ដល់ជិត ៤០ ពាន់លានដុល្លារ។
តាមរបាយការណ៍ Tourism Satellite Account 2024 របស់នាយកដ្ឋានស្ថិតិម៉ាឡេស៊ី បានឱ្យដឹងថា វិស័យទេសចរណ៍បានរួមចំណែក ១៥.១% នៃផលិតផលក្នុងស្រុកសរុប GDP ឬ ២៩១,៩ពាន់លានរីងហ្គីត (៧០,២ពាន់លានដុល្លារ)។ នេះបានកើនឡើងពី ១៤,៩% ឬ ៦៥,៤ពាន់លានដុល្លារក្នុងឆ្នាំ ២០២៣។
ប្រទេសម៉ាឡេស៊ីបានស្វាគមន៍ភ្ញៀវទេសចរបរទេស ៣៨ លាននាក់ នៅក្នុងឆ្នាំ ២០២៤ កើនឡើង ៣១,១% ធៀបនឹងរយៈពេលដូចគ្នា កាលពីឆ្នាំ ២០២៣ ហើយការចំណាយរបស់ភ្ញៀវទេសចរបរទេសបានកើនឡើង ៤៣,៧% ដល់ ២៥,៧ពាន់លានដុល្លារ។
លោក Tiong King Sing រដ្ឋមន្ត្រីក្រសួងទេសចរណ៍ សិល្បៈ និងវប្បធម៌ម៉ាឡេស៊ី បានឱ្យដឹងថា សន្ទុះវិជ្ជមាននេះ បង្ហាញពីទំនុកចិត្តកាន់តែខ្លាំងឡើងនៅក្នុងប្រទេសម៉ាឡេស៊ី ក្នុងនាមជាគោលដៅទេសចរណ៍ដ៏ពេញនិយមមួយរបស់ពិភពលោក។ លោកបានបន្តថា ប្រទេសម៉ាឡេស៊ីនឹងពង្រឹងការផ្សព្វផ្សាយ និងទីផ្សារអន្តរជាតិ ដោយផ្តោតលើការតភ្ជាប់ជើងហោះហើរ ហើយព្រឹត្តិការណ៍ទេសចរណ៍ វប្បធម៌ និងអាជីវកម្មជាច្រើនទៀត នឹងត្រូវបានរៀបចំឡើងផងដែរ៕ ប្រភព ៖ VNA
ចែករំលែកព័តមាននេះ