ទីក្រុងវ៉ាស៊ីនតោន៖ អាមេរិកជួបនឹងហេតុការណ៍បាញ់ប្រហារនៅក្នុងបរិវេណសាកលវិទ្យាល័យទៀតហើយ លើកនេះកើតឡើងនៅសាកលវិទ្យាល័យប្រោន (Brown) នៃរដ្ឋរ៉ូតអាយលេន (Rhode Island) បណ្ដាលឱ្យស្លាប់មនុស្ស២នាក់ និងរបួសធ្ងន់៨នាក់។ អាជ្ញាធរកំពុងស្វែងរកជនសង្ស័យដែលកំពុងរត់គេចខ្លួន។…
ទីក្រុងវ៉ាស៊ីនតោន៖ អាមេរិកជួបនឹងហេតុការណ៍បាញ់ប្រហារនៅក្នុងបរិវេណសាកលវិទ្យាល័យទៀតហើយ លើកនេះកើតឡើងនៅសាកលវិទ្យាល័យប្រោន (Brown) នៃរដ្ឋរ៉ូតអាយលេន (Rhode Island) បណ្ដាលឱ្យស្លាប់មនុស្ស២នាក់ និងរបួសធ្ងន់៨នាក់។ អាជ្ញាធរកំពុងស្វែងរកជនសង្ស័យដែលកំពុងរត់គេចខ្លួន។ ការបាញ់ប្រហារនេះកើតឡើងនៅថ្ងៃទី២នៃការប្រឡងបញ្ចប់ការសិក្សា។
ជនសង្ស័យជាបុរសស្លៀកពាក់ឈុតខ្មៅ ហើយត្រូវគេឃើញគេចចេញពីអគារដែលកើតមានការបាញ់ប្រហារ។ នេះបើតាមការបញ្ជាក់របស់លោកធីម៉ូធី អូហារ៉ា (Timothy O’Hara) ជាអធិការរងនគរបាល។ អភិបាលក្រុងប្រូវីដឹន (Providence) នៃរដ្ឋរ៉ូតអាយលេន លោកប្រិតស្មាលលី (Brett Smiley) ថ្លែងថាទីតាំងនោះត្រូវស្ថិតនៅក្នុងការប្រុងប្រយ័ត្ន។ លោកជំរុញឱ្យអ្នករស់នៅម្ដុំនោះស្នាក់នៅក្នុងផ្ទះ។ ចំណែកអ្នកដែលស្ថិតនៅខាងក្រៅផ្ទះសូមកុំទាន់វិលត្រឡប់មកវិញ រង់ចាំអាជ្ញាធរពិនិត្យឃើញថាមានសុវត្ថិភាពគ្រប់គ្រាន់ជាមុនសិន។
លោកស្មាលលីអះអាងថាអាជ្ញាធរមានធនធានគ្រប់គ្រាន់ដើម្បីតាមចាប់ជនដៃដល់។ មន្ត្រីដែលបម្រើការនៅក្នុងសាកលវិទ្យាល័យប្រាប់និស្សិត និងបុគ្គលិកថាជនសង្ស័យត្រូវបានចាប់ខ្លួនហើយ ហើយកំពុងស្ថិតនៅក្នុងការឃុំឃាំង។ ប៉ុន្តែក្រោយមក ពួកគេប្រាប់ថាមិនទាន់ចាប់ខ្លួនបានទេ។ នគរបាលនៅតែបន្តតាមរកជនសង្ស័យដែលអាចមានគ្នាតែម្នាក់គត់ ឬមានគ្នាច្រើនជាងនេះ។ នេះបើយោងតាមសេចក្ដីប្រកាសព័ត៌មានរបស់សាកលវិទ្យាល័យប្រោន។
អភិបាលក្រុងខាងលើនេះថ្លែងបន្តទៀតថាកាលពីមុននេះ សមត្ថកិច្ចបានចាប់ខ្លួនមនុស្សម្នាក់យកទៅឃុំឃាំងមែន។ ប៉ុន្តែបន្ទាប់ពីឆ្លងកាត់ការសាកសួរទៅឃើញថាបុគ្គលរូបនោះគ្មានពាក់ព័ន្ធនឹងករណីបាញ់ប្រហារនេះទេ។ ដូច្នេះ គេក៏ដោះលែងវិញទៅ។ សមាជិកក្រុមប្រឹក្សាក្រុងប្រូវីដឹន លោកចន ហ្កុងខាលវេស (John Goncalves) ថ្លែងថាយើងកំពុងប្រមូលព័ត៌មានពាក់ព័ន្ធនឹងហេតុការណ៍នេះ។
យើងសូមអំពាវនាវឱ្យប្រជាជនបិទទ្វារដាក់គន្លឹះឱ្យជិត និងបង្កើនការប្រុងប្រយ័ត្ន។ ក្នុងនាមជានិស្សិតជាន់ចាស់នៃសាកលវិទ្យាល័យប្រោន លោកពិតជារន្ធត់នៅក្នុងចិត្តឥតឧបមា។ ចិត្តរបស់លោកនឹកភ្នកទៅរកក្រុមគ្រួសារ និងមិត្តភក្ដិរបស់ជនរងគ្រោះ។ ការបាញ់ប្រហារនេះកើតឡើងនៅក្បែរអគារកម្ពស់៧ជាន់នៃដេប៉ាតឺម៉ង់វិស្វកម្ម និងរូបវិទ្យា។ យោងតាមការបង្ហោះសារនៅលើគេហទំព័ររបស់សាកលវិទ្យាល័យប អគារនោះមានមន្ទីរពិសោធជាង១រយ, មានថ្នាក់រៀន និងមានការិយាល័យធ្វើការ។
នៅពេលបាញ់ប្រហារនោះ និស្សិតកំពុងប្រឡងផ្នែកវិស្វកម្មនៅក្នុងអគារ។ និស្សិតនៅមន្ទីរពិសោធក្បែរនោះគ្រាន់តែស្ដាប់ឮសំឡេងគ្រាប់កាំភ្លើងក៏បានក្រាបចុះក្រោមតុ និងកាច់កុងតាក់បិទភ្លើងឱ្យងងឹត។ ដំណឹងនេះបានលេចឮដល់លោកដូណាល់ត្រាំរួចហើយ។ សាកលវិទ្យាល័យប្រោនជាគ្រឹះស្ថានអប់រំឯកជនមាននិស្សិតកំពុងសិក្សាថ្នាក់បរិញ្ញាបត្រ៧៣០០នាក់ និងនិស្សិតសិក្សាថ្នាក់បរិញ្ញាបត្រជាន់ខ្ពស់ជាង៣ពាន់នាក់។ នេះបើតាមការផ្សាយរបស់សារព័ត៌មានឡឺម៉ុង (Le Monde) និងប្រភពដទៃទៀត៕
ចែករំលែកព័តមាននេះ