ខេត្តសៀមរាប ៖ រដ្ឋបាលខេត្តសៀមរាបបានប្រកាសទទួលថវិកា គ្រឿងឧបភោគ បរិភោគ និងសម្ភារៈប្រើប្រាស់ ពីសប្បុរសជន យកទៅជួយផ្គត់ផ្គង់ជីវភាពរស់នៅរបស់បងប្អូនភៀសសឹក ក្រោយពីការចូលឈ្លានពាននៅតាមបណ្តោយព្រំដែនកម្ពុជា-ថៃ បានភៀសខ្លួនចេញពីតំបន់…
ខេត្តសៀមរាប ៖ រដ្ឋបាលខេត្តសៀមរាបបានប្រកាសទទួលថវិកា គ្រឿងឧបភោគ បរិភោគ និងសម្ភារៈប្រើប្រាស់ ពីសប្បុរសជន យកទៅជួយផ្គត់ផ្គង់ជីវភាពរស់នៅរបស់បងប្អូនភៀសសឹក ក្រោយពីការចូលឈ្លានពាននៅតាមបណ្តោយព្រំដែនកម្ពុជា-ថៃ បានភៀសខ្លួនចេញពីតំបន់ ដែលមានភាពវឹកវរពីសង្គ្រាម មកស្នាក់នៅទីកន្លែងមានសុវត្ថិភាព នៅក្នុងភូមិសាស្ត្រខេត្តសៀមរាប និង ផ្គត់ផ្គង់ដល់កងកម្លាំងជួរមុខ ផងដែរ ។
នៅថ្ងៃទី១៣ ខែធ្នូ ឆ្នាំ២០២៥នេះ ឯកឧត្តម លី សំរិទ្ធ ប្រធានក្រុមប្រឹក្សាខេត្តសៀមរាប រួមទាំងសមាគមនារីកម្ពុជា ដើម្បីសន្តិភាព និងអភិវឌ្ឍន៍ និង សាលាឯកជន បានធ្វើការប្រគល់នូវគ្រឿងឧបភោគបរិភោក ជូនដល់កងកម្លាំង ជួរមុខ ។
ឯកឧត្តម លី សំរិទ្ធ បានបញ្ជាក់ថា នៅពេលដែលទាហានសៀម បានចូលឈ្លានពានកម្ពុជា បានធ្វើឱ្យបងប្អូនប្រជា ពលរដ្ឋ រស់នៅតាមបណ្តាខេត្តជាប់ព្រំដែនកម្ពុជា ថៃ បានភៀសសឹក មកស្នាក់នៅទីសុវត្ថិភាព ក្នុងភូមិសាស្ត្រខេត្តសៀមរាប ។
មកដល់ពេលនេះ ក្រុមការងារនៃរដ្ឋបាលសាលាខេត្តសៀមរាប សហការជាមួយសហ ភាពសហព័ន្ធយុវជនកម្ពុជាខេត្តសៀមរាប រងចាំទទួលអំណោយពីសប្បុរសជន ខណៈសប្បុរសជនជាច្រើន បាននិងកំពុងបន្តនាំយកអំណោយទាំងនេះ មកប្រគល់ជូនរដ្ឋបាលខេត្ត ដើម្បីត្រៀមរៀបចំបែងចែក ជូនបងប្អូនកងទ័ពជួរមុខកម្ពុជា និង បងប្អូនប្រជាពលរដ្ឋភៀសសឹក ទៅតាមមណ្ឌលសុវត្ថិភាពនានា ក្រោយពីក្រុមទាហានថៃ បានបាញ់ផ្លោងចូលឈ្លានពានបូរណៈភាពទឹកដីកម្ពុជា ។
ក្នុងនោះដែរឯកឧត្តមប្រធានក្រុមប្រឹក្សាខេត្ត បានថ្លែងអំណរគុណពីទឹក ចិត្តស្មារតីសេ្នហាជាតិ ក្នុងការបូជាពលីជីវិត ដើម្បី ការពារបូរណៈភាពទឹកដី និង សេចក្តីសុខដល់ប្រជាពលរដ្ឋកម្ពុជា ព្រមទាំងបានបួងសួងដល់វត្ថុស័ក្តសិទ្ធដែលគ្រប់គ្រង ដែនកម្ពុជរដ្ឋ សំខាន់បារមីព្រះអង្គចេក ព្រះចម លោកយាយទេព តាដំបងដែក លោកតារាជ្យ ព្រះអង្គគោកធ្លក ព្រះអង្គ ធំ ខ្នងភ្នំគូលែន និង ទេវតាថែរក្សានៅតាមប្រាង្គប្រាសាទ ជួយតាមថែរក្សាដល់កងកម្លាំងជួរមុខ ឱ្យជួបតែសេចក្តីសុខ និងទទួលបានជោគជ័យគ្រប់សមរភូមិ ។
ឯកឧត្តមក៏បានថ្លែងអំណរគុណយ៉ាងជ្រាលជ្រៅ ចំពោះអំណោយ សប្បុរស ធម៌របស់បងប្អូនប្រជាពលរដ្ឋ ដែលបានចូលរួមឧបត្ថម្ភ តាមរយៈរដ្ឋបាលសាលាខេត្ត ដើម្បីត្រៀមរៀបចំបែងចែកជូនបងប្អូនកងទ័ពជួរមុខកម្ពុជា និងបងប្អូនប្រជាពលរដ្ឋភៀសសឹកស្នាក់នៅតាមមណ្ឌលសុវត្ថិភាព ក្នុងខេត្តសៀមរាប ទាំងមូលផងដែរ៕
ចែករំលែកព័តមាននេះ