ខេត្តបាត់ដំបង ៖ យុវជនមួយក្រុមនៅស្រុកបវេល ដឹកនាំដោយយុវជនវ័យក្មេងម្នាក់ ដែលទើបវិលត្រឡប់មកពីស្រុកបារាំង បានគៀងគរគ្នាចំណាយថវិការផ្ទាល់ខ្លួន ទិញនំចំណី ភេសជ្ជះ ឬ អាហារផ្សេងៗ…
ខេត្តបាត់ដំបង ៖ យុវជនមួយក្រុមនៅស្រុកបវេល ដឹកនាំដោយយុវជនវ័យក្មេងម្នាក់ ដែលទើបវិលត្រឡប់មកពីស្រុកបារាំង បានគៀងគរគ្នាចំណាយថវិការផ្ទាល់ខ្លួន ទិញនំចំណី ភេសជ្ជះ ឬ អាហារផ្សេងៗ វេចខ្ចប់យកទៅចែកជូនកុមារតូចៗ ដែលភៀសសឹក មកពីតំបន់ព្រំដែនខ្មែរ ថៃ កាលពីរសៀលថ្ងៃទី ១៣ ធ្នូ ដែលមានជនភៀសសឹកប្រមាណ២០០០គ្រួសារ កំពុងជ្រកកោណនៅមណ្ឌលសុវត្ថិភាព ក្នុង«វត្តអូរដូនពៅ» ស្ថិតក្នុង ឃុំឃ្លាំងមាស ស្រុកបេវេល។
នេះជាកាយវិការដ៏គូរឲ្យកោតសសើរ ប្រកបដោយមនុស្សធម៏ ដែលពួកគេបានចូលរួមចំណែកជួយសង្គមជាតិ ក្នុងគ្រាមានអាសន្ន។ ពួកគេបានរៀបចំ ចំណីអាហារជាវេចជាកញ្ចប់ៗ សម្រាប់ចែកជូនដល់កុមារតូចៗ នៅក្នុងមណ្ឌលសុវត្ថិភាព«វត្តអូរដូនពៅ» ក្នុងស្រុកបវេល បើទោះជាកញ្ចប់មនុស្សធម៏របស់ពួកគេ ស្ដូចស្ដើងមិនបានដល់ដៃកុមារគ្រប់គ្នាក្ដី។
ក្នុងវ័យជាង២០ឆ្នាំ យុវជន នី ប៊ុនថាន ជាអ្នកផ្ដើមគំនិតបង្កើតកញ្ចប់មនុស្សធម៌នេះឡើង។ គេក៏ជាអ្នកចំណាយថវិកាផ្ទាល់ខ្លួនដែរ អស់ប្រមាណ៣០០ដុល្លា ដើម្បីទិញចំណីអាហារវេចជាកញ្ចប់ យកទៅចែកជូនកុមារភៀសសឹក។ ក្រោមបញ្ចប់ការចែកនំចំណីដល់កុមារ យុវជន នី ប៊ុនថាន បានឆក់ឪកាសផ្ដល់បទសម្ភាសន៏យ៉ាងខ្លី ជាមួយកោះសន្តិភាព យ៉ាងដូច្នេះថា «ខ្ញុំទើបត្រឡប់មកពីប្រទេសបាំរាំ ចំថ្ងៃទាហានថៃ បាញ់ទាហានកម្ពុជា នៅតាមបន្ទាត់ព្រំដែន។ ខ្ញុំមានស្រុកកំណើត នៅស្រុកបវេល បច្ចុប្បន្នឪពុក ម្ដាយខ្ញុំក៏នៅស្រុកកំណើតនេះដែរ។ ខ្ញុំទៅស្រុកបារាំងក៏ទៅធ្វើការឲ្យគេដែរ»។
យុវជន នី ប៊ុនថាន បានបន្តទៀតថា «ខ្ញុំបានឃើញប្រជាពលរដ្ឋភៀសសឹកចូលមកស្នាក់នៅស្រុកបវេល ច្រើនកកុញនៅតាមទីវត្តអារាម គូរឲ្យអាសូរចិត្តណាស់ ជាពិសេសកុមារតូចៗ។ ដូច្នេះហើយ ទើបខ្ញុំ សម្រេចចិត្តចំណាយថវិកាផ្ទាល់ខ្លួនបន្តិចបន្តូច ជាមួយមិត្តភក្ដិនៅស្រុកកំណើត ដើម្បីទិញនំចំណី ភេសជ្ជៈផ្សេង ច្រកជាកញ្ចប់យកទៅចែកជូនកុមារតូចៗ នៅមណ្ឌលសុវត្ថិភាពនៅ «វត្តអូរដូចពៅ»នេះ ព្រោះនៅទីនោះមានជនភៀសសឹកច្រើនជាងគេ ក្នុងស្រុកបវេល»។
យោងតាមរបាយការណ៏បឋមរបស់រដ្ឋបាលស្រុកបវេល ស្ដីពីជនភៀសសឹកដែលកំពុងស្នាក់នៅបណ្ដោះអាសន្ន បានឲ្យដឹងថា គិតត្រិមម៉ោង៥ល្ងាច ថ្ងៃទី ១៣ ធ្នូ សម្រាប់មណ្ឌលសុវត្ថិភាព«វត្តអូរដូនពៅ» មានប្រជាពលរដ្ឋភៀសសឹកច្រើនជាងគេ បើប្រៀបធៀបទៅនឹងមណ្ឌលសុវត្ថិភាពដទៃទៀត នៅក្នុងស្រុកបវេល។ បើតាមរបាយការណ៏ខាងលើនេះ ប្រជាពលរដ្ឋដែលភៀសសឹកមកពីតាមបណ្ដាស្រុកនានា រស់នៅតាមបន្ទាត់ព្រំដែនខ្មែរ ថៃ មានចំនួនជាង១.៥៦០គ្រួសារ ដែលបាននិងកំពុងស្នាក់នៅបណ្ដោះអាសន្នក្នុងមណ្ឌលសុវត្ថិភាព «វត្តអូរដូនពៅ» មានមនុស្សរាយចំនួនជាង៦.៣៤០នាក់។
ពេលនេះអាជ្ញាធរ និង កាក្កបាទក្រហម រួមជាមួយសប្បុរជននានាផង បាននិងកំពុងផ្ដល់ស្បៀងអាហារ ទឹកសុទ្ធ និង សម្ភារៈប្រើប្រាស់ផ្សេងៗទៀត ចែកជូនពលរដ្ឋ ដើម្បីដោះស្រាយជាបណ្ដោះអាសន្ន៕
ចែករំលែកព័តមាននេះ