រាជធានីភ្នំពេញ ៖ ការប្រកួតជុំចុងក្រោយក្នុងពូលA នៅសង្វៀនបាយ័នស្ទឹងមានជ័យនាល្ងាចថ្ងៃសុក្រទី២១ មិថុនា នេះ កំពុងធ្វើឱ្យកីឡាករម្នាក់ក្លាយជាអ្នកជិះសេះលែងដៃ និងធ្វើឱ្យកីឡាករ២រូបទៀត ស្ថិតក្នុងភាពប្រទាញប្រទង់គ្នា ។ ក្នុងចំណោមកីឡាករទាំង៦រូបមានតែកីឡាករកែវ វិរៈ ម្នាក់ប៉ុណ្ណោះ ដែលមានមុខឡើងប្រកួតវគ្គខ្វែងដោយស្វ័យប្រវត្តិ ទោះឈ្នះ ឬចាញ់ រីឯឈិន ក្វាន់ង៉ុុយ កំពុងភ័យរឿងហាលអាវ បើភ្លាត់ឱ្យចាញ់ដៃគូរបស់ខ្លួននោះច្បាស់ជាលែងមានឱកាសដណ្តើមខ្សែក្រវាត់របស់ក្រុមហ៊ុន សេង ហុងហេង មិនខាន ។
៤ប្រកួតកន្លងមក កីឡាករកែវ វិរៈ មកពីក្លិបគជសារកីឡា និងកីឡាករសាន វិចិត្រ មកពីក្លិបផ្សារបឹងទំពុន ក្ដោប១០ពិន្ទុស្មើគ្នា ។ ប៉ុន្តែមានតែកីឡាករ កែវ វិរៈ ម្នាក់ប៉ុណ្ណោះ ដែលជាប់ដោយស្វ័យប្រវត្តិ បើទោះជាគេត្រូវឈ្នះ ឬចាញ់ ចំណែកកីឡាករសាន វិចិត្រ គឺលុះត្រាតែអាចឈ្នះឈិន ក្វាន់ង៉ុយ មកពីក្លិបមកុដរាជសីហ៍ ទើបគេអាចក្លាយជាអ្នកឡើងទៅប្រកួតខ្វែងបាន ។ មូលហេតុដែលនាំឲ្យកីឡាករកែវ វិរៈ ឆ្ពោះទៅមុខដោយមិនបាច់ប្រឹង គឺដោយសារតែកីឡាករសាន វិចិត្រ និងកីឡាករឈិន ក្វាន់ង៉ុយ ដែលមានពិន្ទុប្រទាញប្រទង់គ្នា គឺជាគូប្រកួតគ្នាក្នុងវគ្គនេះ ដែលក្នុងចំណោមពួកគេ នឹងមានតែម្នាក់មានមុខនៅវគ្គខ្វែងជាមួយពូលB ។
យោងតាមលទ្ធផល កែវ វិរៈ បើចាញ់កែវ រំជោត មកពីក្លិបដំបងគ្រញូងនាល្ងាចនេះក៏មាន១១ពិន្ទុ ចំណែកសាន វិចិត្រ បើភ្លាត់ឲ្យចាញ់ឈិន ក្វាន់ង៉ុយ គេក៏មាន១១ពិន្ទុដូចគ្នា ប៉ុន្តែមិនអាចឆ្ពោះទៅកាន់វគ្គខ្វែងបានទេ ដោយសារកែវ វិរៈ មានក្រេឌីតផ្ដួលគូប្រកួតឲ្យសន្លប់ក្នុងទឹកបានល្អជាង ។ ចំពោះកីឡាករឈិន ក្វាន់ង៉ុយ ពេលនេះ មានតែ៨ពិន្ទុប៉ុណ្ណោះ ប៉ុន្តែគេគឺជាឧបសគ្គតែម្នាក់គត់របស់កីឡាករសាន វិចិត្រ ក្នុងអំឡុង៥ជុំនេះ ។ សរុបមកបើ ឈិន ក្វាន់ង៉ុយ ឈ្នះសាន វិចិត្រ ហើយឧបមាថាកែវ វិរៈ ចាញ់នាល្ងាចនេះ មានន័យថា ពួកគេទាំង៣ នឹងមានពិន្ទុ១១ស្មើគ្នា ខណៈដែលឈិន ក្វាន់ង៉ុយ នឹងក្លាយជាអ្នកឈរលេខ១ក្នុងពូល កែវ វិរៈ លេខ២ក្នុងពូល និងសាន វិចិត្រ បានត្រឹមលេខ៣ក្នុងពូល ដោយសារតែផ្អែកលើប្រវត្តិដែលពួកគេ អាចផ្ដួលគូប្រកួតឲ្យសន្លប់នៅលើរេញកន្លងមក ។
យ៉ាងណាមិញ បើសាន វិចិត្រ ឈ្នះ ឈិន ក្វាន់ង៉ុយ ហើយកែវ វិរៈ នៅតែចាញ់ នោះមានន័យថា សាន វិចិត្រ ឈរលេខ១ក្ដាប់១៣ពិន្ទុ ,កែវ វិរៈ ឈរលេខ២ ក្ដាប់១១ពិន្ទុ ឯឈិន ក្វាន់ង៉ុយ នឹងត្រូវហាលអាវ ។ អញ្ចឹងហើយទើបការប្រកួតក្នុងជុំចុងក្រោយនេះ កីឡាករ៣រូបពិតជាត្រូវការឈ្នះដាច់ខាត ដោយសារកែវ វិរៈ ក៏ត្រូវការឈ្នះ កែវ រំជោត ដើម្បីឈរលេខ១ក្នុងពូលដើម្បីគេចកីឡាករ នូវ ស៊ីថា មកពីក្លិបតាឡីដំរីមានឫទ្ធិ ក្នុងពូលB រីឯកីឡាករសាន វិចិត្រ និងឈិន ក្វាន់ង៉ុយ ក៏រឹតតែត្រូវការឈ្នះគ្នាដាច់ខាតដើម្បីបញ្ចៀសរឿងហាលអាវ ។
ចំពោះកីឡាករផ្សេងទៀត បូករួមទាំងកីឡាករម៉ាប់ ឆាយ៉ា មកពីក្លិបខ្លារខិនមានឫទ្ធិ ដែលមាន៨ពិន្ទុស្រាប់នោះផង បើទោះជាអាចឈ្នះក្នុងជុំចុងក្រោយនេះ ហើយក្ដាប់១១ពិន្ទុ ក៏មិនអាចឡើងវគ្គប្រកួតខ្វែងបានដែរ ដោយសារតែគេមានក្រេឌីតចាញ់កីឡាករកែវ វិរៈ សាន វិចិត្រ និងឈិន ក្វាន់ង៉ុយ ព្រោះគេមិនធ្លាប់ផ្ដួលគូប្រកួតឲ្យសន្លប់កន្លងមក ។ ចាំមើលមើល៍រវាងកីឡាករឈិន ក្វាន់ង៉ុយ និងសាន វិចិត្រ តើអ្នកណាហាលអាវ ដោយឡែក កែវ វិរៈ វិញ ដ្បិតថា ត្រូវឈ្នះស្វ័យប្រវត្តិ ហើយត្រូវជួបកែវរំជោត ដែលខ្សោយជាងគេក្នុងពូលផងនោះ តើនឹងប្រឹងយកឈ្នះឲ្យបានល្អកម្រិតណា ដើម្បីដណ្ដើមយកពិន្ទុលេខ១ក្នុងពូល ៕
ចែករំលែកព័តមាននេះ