ក្រសួងមហាផ្ទៃបានចាត់ទុកការផ្តួលរំលំនិងការយកស្រ្ពៃទៅបាញ់បំផ្លាញស្លាកសញ្ញាគណបក្សសង្គ្រោះជាតិចំនួន១៦ស្លាក នៅក្នុងខេត្តព្រៃវែង និង ស្វាយរៀង គឺជាអំពើដ៏ថោកទាប ដែលធ្វើឡើងតាមការចាត់តំាងមានលក្ខណៈជាប្រព័ន្ឋសំដៅធ្វើឲ្យខូចបរិយាកាសល្អប្រសើរមុនពេលបោះឆ្នោត និង បម្រើឲ្យគោលបំណងអគតិបដិសេធលទ្ឋផលនៃការបោះឆ្នោតខាងមុខដូចដែលមេបក្សប្រឆាំងធ្លាប់បានលើកឡើងថា នឹងចូលរួមបោះឆ្នោត ប៉ុន្តែមិនទទួលស្គាល់លទ្ឋផលការបោះឆ្នោត ។
បើយោងតាមសេចក្តីប្រកាសព័ត៌មានរបស់អ្នកនំាពាក្យក្រសួងមហាផ្ទៃចុះថ្ងៃទី១៩ មិថុនា ២០១៣ បានបញ្ជាក់ឲ្យដឹងទៀតថា កាលពីវេលាយប់ថ្ងៃទី១៨ មិថុនា ២០១៣នៅតាមផ្លូវជាតិលេខ១ និង ផ្លូវគ្រួសក្រហមមានជនល្មើសបានយកស្ព្រៃទៅបាញ់ ឬ ផ្តួលរំលំស្លាកសញ្ញាគណបក្សសង្គ្រោះជាតិចំនួន១៦ស្លាកក្នុងខេត្តព្រៃវែង និង ខេត្តស្វាយរៀង។
ហេតុការណ៏នេះបានកើតឡើងនៅឃុំល្វា ស្រុកព្រះស្តេចចំនួន០១ស្លាក ឃុំក្រំាងស្វាយ ស្រុកព្រះស្តេចចំនួន០៣ស្លាក ឃុំកំពង់ត្របែក ស្រុកកំពង់ត្របែកចំនួន០១ស្លាក នៅឃុំព្រៃឈរ ស្រុកកំពង់ត្របែកចំនួន០១ស្លាក ឃុំក្រោលគោ ឃុំឈើទាល ឃុំតាសួស ឃុំគោកព្រីង ស្រុកស្វាយជ្រុំ ខេត្តស្វាយរៀងចំនួន០៥ស្លាក នៅសង្កាត់ចេក ក្រុងស្វាយរៀងចំនួន០១ស្លាក នៅឃុំស្វាយតាយាន ស្រុកកំពង់រោទិ៍ចំនួន០៣ស្លាក និង ឃុំកណ្តៀងរាយ ស្រុកស្វាយទាបចំនួន០១ស្លាក ។
សេចក្តីប្រកាសព័ត៌មានរបស់អ្នកនំាពាក្យក្រសួងមហាផ្ទៃដដែលក៏បានបន្ថែមទៀតថា ចំពោះការបាញ់ស្ព្រៃលើស្លាកសញ្ញានេះ គឺបាញ់ស្ព្រៃចំមុខ លោក សម រង្ស៊ី និង លោក កឹម សុខា ។ ចំពោះស្លាកសញ្ញាណាដែលមានរូប និង បាញ់ស្ព្រៃលើរូបសញ្ញាព្រះអាទិត្យ ឬ ពាក្យស្លោកចំពោះស្លាកសញ្ញាដែលគ្មានរូប ។
ពាក់ព័ន្ឋនឹងហេតុការណ៏ខាងលើនេះ ក្រសួងមហាផ្ទៃកំពុងធ្វើការស៊ើបអង្កេតស្វែងរកចាប់ខ្លួនជនល្មើសបញ្ជូនទៅតុលាការផ្តន្ទាទោសតាមច្បាប់ជាធរមាន ៕
ចែករំលែកព័តមាននេះ