រាជធានីភ្នំពេញ ៖ កម្លាំងសមត្ថកិច្ចជំនាញនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ កាលពីថ្ងៃទី២៥ វិច្ឆិកា បានធ្វើការស្រាវជ្រាវឃាត់ខ្លួនជនសង្ស័យចំនួន៣នាក់ នៅចំណុចកន្លែងបើកលេងល្បែងហ្គេមបាញ់ត្រី ស្ថិតនៅផ្ទះលេខ១២ ផ្លូវលេខ១៤៤ សង្កាត់ផ្សារកណ្តាលទី២ ខណ្ឌដូនពេញ ពាក់ព័ន្ធករណីយកកូនកាំបិតភ្ជង់ប្លន់យកម៉ូតូមួយគ្រឿងពីស្ត្រីម្នាក់ ។
ជនសង្ស័យទាំង៣នាក់ខាងលើ ១-ឈ្មោះ លី សឿង ភេទប្រុស អាយុ២២ ឆ្នាំ មុខរបរ និងស្នាក់នៅ មិនពិតប្រាកដ ២-ឈ្មោះ យស់ សុវណ្ណឌី ហៅតូ ភេទប្រុស អាយុ២០ឆ្នាំ មុខរបរមិនពិតប្រាកដស្នាក់នៅផ្ទះលេខ៦BE៣ ផ្លូវសុធារស សង្កាត់ជ័យជំនៈ ខណ្ឌដូនពេញ និង៣-ឈ្មោះ ប្រាក់ ធី ភេទប្រុស អាយុ២៥ឆ្នាំ មុខរបរមិនពិតប្រាកដ ស្នាក់នៅផ្ទះលេខ២ ស្ថិតក្នុងសង្កាត់ចោមចៅ១ ខណ្ឌពោធិសែនជ័យ ។
ជនសង្ស័យបានសារភាពនៅចំពោះសមត្ថកិច្ចថា កាលពីវេលាម៉ោង៤ទៀបភ្លឺថ្ងៃទី២២ វិច្ឆិកា ពួកខ្លួនបានស្ទាក់ធ្វើសកម្មភាពប្លន់យកម៉ូតូ១គ្រឿងម៉ាកស៊ុយហ្សុយគីនិក ពណ៌ស ពាក់ស្លាកលេខ ភ្នំពេញ ១BV-៥៨៦៤ ពីស្ត្រីម្នាក់នាក់ នៅចំណុចមុខវត្តឧណ្ណាលោម ផ្លូវសុធារស សង្កាត់ជ័យជំនៈ ខណ្ឌដូនពេញ ដោយយកដែកចុងស្រួចភ្ជង់កជនរងគ្រោះ ។
ក្រោយពីធ្វើសកម្មភាពប្លន់ម៉ូតូបាន១គ្រឿងនោះ ពួកខ្លួនបាននាំគ្នាគេចខ្លួន លុះបាន៣ថ្ងៃក្រោយមកពួកខ្លួនក៏នាំគ្នាទៅលេងល្បែងហ្គេមបាញ់ត្រី នៅក្នុងសង្កាត់ផ្សារកណ្តាលទី២ ទើបត្រូវសមត្តកិច្ចចាប់ខ្លួនតែម្តង ។
ម៉ូតូ១គ្រឿងដែលដកហូត សមត្ថកិច្ចបានប្រគល់ឲ្យជនរងគ្រោះវិញ ចំណែកជនសង្ស័យបានកសាងសំណុំរឿងបញ្ជូនទៅសាលាដំបូងរាជធានីភ្នំពេញតាមនីតិវិធី ៕
ចែករំលែកព័តមាននេះ