ហ្សឺណែវ ៖ នៅរសៀលថ្ងៃទី១៦ ខែធ្នូ ឆ្នាំ២០២៥ ទោះបីមានការជូនដំណឹងក្នុងរយៈពេលខ្លី បងប្អូនពលរដ្ឋខែ្មរ និងមិត្តភក្តិ ប្រមាណជាង ៨០នាក់…
ហ្សឺណែវ ៖ នៅរសៀលថ្ងៃទី១៦ ខែធ្នូ ឆ្នាំ២០២៥ ទោះបីមានការជូនដំណឹងក្នុងរយៈពេលខ្លី បងប្អូនពលរដ្ឋខែ្មរ និងមិត្តភក្តិ ប្រមាណជាង ៨០នាក់ មកជាបន្តបន្ទាប់ពីទូទាំងប្រទេសស្វីស រួមជាមួយ សិស្សជនជាតិស្វីស និងអ៊ីតាលី ប្រមាណជាង ៣០នាក់ បានប្រមូលផ្តុំគ្នា នៅមុខអង្គការសហប្រជាជាតិ ក្នុងទីក្រុងហ្សឺណែវ នៅទីលានកៅអីបាក់ជើង ដើម្បីថ្កោលទោសការឈ្លានពានដោយអាវុធរបស់ថៃ និងដើម្បីឈរជាមួយសន្តិភាព ។
ពីទីតាំងនិមិត្តរូបដ៏មានអត្ថន័យជ្រាលជ្រៅសម្រាប់ស្មារតីមនុស្សជាតិនេះ បងប្អូនពលរដ្ឋខែ្មរ បានបដិសេធការប្រើកម្លាំងយោធារបស់ថៃ អំពាវនាវឲ្យមានការគោរពពេញលេញចំពោះបទឈប់បាញ់ និងកិច្ចព្រមព្រៀងសន្តិភាព ហើយបានបញ្ជាក់ឡើងវិញថា វិវាទទាំងអស់ត្រូវដោះស្រាយដោយសន្តិវិធី និងស្របតាមច្បាប់អន្តរជាតិ ។
ពួកគេបានថ្កោលទោសយ៉ាងខ្លាំងចំពោះការវាយប្រហារយ៉ាងឃោរឃៅ និងមិនរើសអើងលើជនស៊ីវិល ទីតាំងស៊ីវិល និងបេតិកភណ្ឌវប្បធម៌ រួមទាំង ប្រាសាទព្រះវិហារ ដែលបានចុះបញ្ជីជាបេតិកភណ្ឌពិភពលោករបស់យូណេស្កូ ហើយបានអំពាវនាវឲ្យអង្គការសហប្រជាជាតិ និងសហគមន៍អន្តរជាតិ ដាក់សម្ពាធលើប្រទេសថៃ ឲ្យបញ្ឈប់សកម្មភាពឈ្លានពាន និងត្រឡប់ទៅរកការទូតដោយសុចរិតភាព និងការដោះស្រាយវិវាទដោយសន្តិវិធី ។
ក្នុងឱកាសនោះ ឯកឧត្តមឯកអគ្គរាជទូត អ៊ិន តារា បានសំដែងការកោតសរសើរ និងអំណរគុណយ៉ាងជ្រាលជ្រៅចំពោះបងប្អូន ដែលបានមកចូលរួម ដោយបានលើកឡើងថា វត្តមានរបស់បងប្អូនមានសម្លេងរំញ័រឆ្លងកាត់ឆ្ងាយលើសពីទីលាននេះទៅទៀត។
ឯកឧត្តម ឯកអគ្គរាជទូត បានមានប្រសាសន៍ថា នេះគឺជា«ការក្រោកឈរដើម្បីសន្តិភាព ដើម្បីយុត្តិធម៌ និងដើម្បីអធិបតេយ្យភាពរបស់កម្ពុជា សំឡេងរួមរបស់បងប្អូន អត់ធ្មត់តែម៉ឺងម៉ាត់ ក្រោកឈរប្រឆាំងនឹងការឈ្លានពាន និងមានមូលដ្ឋានយ៉ាងមាំមួនលើច្បាប់ និងសេចក្តីថ្លៃថ្នូរ» ៕
ចែករំលែកព័តមាននេះ