រាជធានីភ្នំពេញ ៖ រថយន្តម៉ាកហ៊ីយ៉ាន់ដាយ១គ្រឿង បានផ្ទុកស៊ីម៉ង់ត៍ទម្ងន់រាប់សិបតោន និងបើកបរ លើផ្លូវលំអែបប្រឡាយ រហូតធ្វើឲ្យផ្លូវមិនអាចទ្រទម្ងន់បានក៏បានផុងកង់ និងបាក់ដី បណ្ដាលឲ្យក្រឡាប់ ធ្លាក់ចូលទៅក្នុងប្រឡាយទឹក ចាក់ស៊ីម៉ង់ត៍ចោលរងការខូចខាតរាប់សិបបាវ។ ចំណែករថយន្តខាងលើ ក៏បានរងការខូចខាតយ៉ាងដំណំផងដែរ ប៉ុន្តែសំណាងល្អមិនបណ្ដាលឲ្យអ្នកបើកបរ និងអ្នកជិះនៅក្នុង រថយន្តនេះគ្រោះថ្នាក់ឡើយ។
ឧប្បត្តិហេតុនោះបានកើតឡើង កាលពីវេលាម៉ោង៩ និង២០នាទីព្រឹក ថ្ងៃទី២៧ ខែវិច្ឆិកា ឆ្នាំ២០១៨ នៅលើផ្លូវលំចូលភូមិស្រែរាជ្ជះ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។ រថយន្តខាងលើម៉ាកហ៊ីយ៉ាន់ដាយ ពណ៌ក្រហម ពាក់ស្លាកលេខ ភ្នំពេញ 3B-8777។ តាមប្រភពព័ត៌មានបានឲ្យដឹងថា នៅមុនពេលកើតហេតុរថយន្តដឹកស៊ីម៉ង់ត៍១គ្រឿងនេះ បានបើកបរ ធ្វើដំណើរតាមបណ្តោយផ្លូវអូរដឹមកប់ស្រូវក្នុងទិសដៅ ពីត្បូងទៅជើងបន្ទាប់មកបានបត់ឆ្វេង ចូលតាមផ្លូវលំខាងលើ។
លុះពេលទៅដល់ត្រង់ចំណុចកើតហេតុ ដោយសាររថយន្តដឹកធ្ងន់ពេក ធ្វើឧ្យផ្លូវមិនអាចទ្រទម្ងន់រួច ម្យ៉ាងបើកក្បែរមាត់ប្រឡាយផង ក៏បណ្ដាលឲ្យផុងកង់ក្រោយក្រឡាប់ ធ្លាក់ចូលទឹកប្រឡាយតែម្ដង។ ខណៈនោះមិនមាននរណាម្នាក់រងគ្រោះថ្នាក់ឡើយ ហើយក្រោយពេលកើតហេតុ រថយន្តខាងលើ ត្រូវបានម្ចាស់យករថយន្តស្ទូចទៅស្ទូចឡើងគោក យកទៅធ្វើការជួសជុល៕
https://www.youtube.com/watch?v=7zwS5UwQvjs
ចែករំលែកព័តមាននេះ