រាជធានីភ្នំពេញៈយុវជនម្នាក់បោកក្បាលស្លាប់នៅនឹងកន្លែងនិងម្នាក់ទៀតបានរងរបួសធ្ងន់ខណៈពេលជិះម៉ូតូមួយគ្រឿងបុកពីក្រោយរថយន្តមួយគ្រឿងដែលខូច ឈប់ចតលើដងផ្លូវ។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង៤និង៣០នាទីព្រឹកថ្ងៃទី១១ខែមិនាឆ្នាំ២០២៦នៅតាមបណ្ដោយផ្លូវជាតិលេខ៦អា ក្នុងភូមិក្តីចាស់ សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ។
យុវជនរងគ្រោះពុំស្គាល់អត្តសញ្ញាណឡើយ ជិះម៉ូតូម៉ាក់ហុងដា ធុនសេ១២៥ ពាក់ស្លាកលេខ ភ្នំពេញ១MB៦៦៥៤ ។ ចំណែករថយន្តម៉ាកហ៊ីយ៉ាន់ដាយ ពណ៌បៃតង ពាក់ស្លាកលេខ ភ្នំពេញ ៣A-៤០៩៩ អ្នកបើកបរពុំស្គាល់អត្តសញ្ញាណឡើយបានគេចខ្លួនបាត់។
តាមព័ត៌មានបានអោយដឹងថា នៅមុនពេលកើតហេតុ ជនរងគ្រោះពីរនាក់បានជិះម៉ូតូមួយគ្រឿងខាងលើធ្វើដំណើរចេញពីរាជធានីភ្នំពេញ ក្នុងទិសដៅពីជើងទៅត្បូង ។ នៅពេលធ្វើដំណើរមកដល់ចំណុចកើតហេតុក៏បានបុកពីក្រោយរថយន្តមួយគ្រឿងខាងលើដែលខូចកំពុងឈប់ចតនៅលើដងផ្លូវ ដោយពុំបានបំពាក់ភ្លើងសញ្ញា។
នៅក្នុងគ្រោះថ្នាក់គឺជនរងគ្រោះបើកបុកពេញទំហឹង បណ្ដាលឲ្យយុវជនម្នាក់បោកក្បាលស្លាប់នៅនឹងកន្លែងនិងម្នាក់ទៀតបានរងរបួសធ្ងន់ត្រូវបានបញ្ជូនទៅ សង្គ្រោះនៅមន្ទីរពេទ្យ។
បន្ទាប់ពីកើតហេតុអ្នកបើកបររថយន្តបានគេចខ្លួនបាត់ហើយនគរបាលមូលដ្ឋានក៏បានទាក់ទងនគរបាលចរាចរណ៍ចុះទៅវាស់វែងរួចនាំយករថយន្តនិងម៉ូតូបញ្ជូនទៅកាន់ការិយាល័យចរាចរណ៍ផ្លូវគោកនៃស្នងការនគរបាលរាជធានីភ្នំពេញដើម្បីដោះស្រាយ៕
ចែករំលែកព័តមាននេះ