រាជធានីភ្នំពេញ ៖ ភ្ញៀវទេសចរជាតិ និងអន្តរជាតិ បានសម្រុកទៅទស្សនាកម្សាន្ដតាមបណ្តាខេត្តនានានៅភូមិភាគឦសានក្នុងឱកាសឈប់សម្រាកនៃពិធីបុណ្យអុំទូករយៈពេល៣ថ្ងៃកន្លងមកនេះ ។
ប្រធានមន្ទីរទេសចរណ៍ខេត្តរតនគិរី លោកង៉ែត ពិទូ បានឲ្យដឹងតាមទូរស័ព្ទនាព្រឹកថ្ងៃទី២៦ វិច្ឆិកា ថា ក្នុងឱកាសឈប់សម្រាកបុណ្យអុំទូកឆ្នាំនេះ ភ្ញៀវទេសចរជាតិ និងអន្តរជាតិមកទស្សនានៅខេត្តរតនៈគិរី មានចំនួនជាង១,៨ម៉ឺននាក់ កើនឡើង១១២% បើធៀបរយៈពេលដូចគ្នាកាលពីឆ្នាំមុន ។ លោកបន្តថា ជាមួយនឹងកំណើនទេសចរនេះ បន្ទប់សណ្ឋាគារ និងផ្ទះសំណាក់ដែលមានជាង១.៤០០បន្ទប់នៅក្នុងខេត្ត គឺមានការខ្វះខាតដែរ ប៉ុន្តែតម្លៃមិនកើនឡើងខ្ពស់ខ្លាំងនោះទេ ទោះជាការផ្គត់ផ្គង់ មិនឆ្លើយតបនឹងតម្រូវការក្តី ។ លោកមានប្រសាសន៍ថា ៖« កំណើនភ្ញៀវទេសចរមកតំបន់នេះ ដោយសារកត្តាសន្តិភាព សុវត្ថិភាព កំណើនប្រាក់ចំណូលរបស់ប្រជាពលរដ្ឋ បណ្តាញគមនាគមន៍មានភាពងាយស្រួល ការឈប់សម្រាកមានរយៈពេលវែង ពិសេសតំបន់ភូមិភាគឦសានជាគោលដៅទេសចរណ៍ធំមួយ ក្រៅពីខេត្តសៀមរាប និងតំបន់ឆ្នេរ »។
លោក ង៉ែត ពិទូ បានបន្តថា ខេត្តរតនគិរីមានរមណីយដ្ឋាន និងសហគមន៍ទេសចរណ៍ដែលស្ថិតក្នុងការចងក្រងរៀបចំដោយមន្ទីរទេសចរណ៍ខេត្តមានចំនួន១៤កន្លែង ប៉ុន្តែរមណីយដ្ឋានជាច្រើនទៀតក៏អាចកម្សាន្តបានដែរ តែភាគច្រើនស្ថិតនៅក្នុងព្រៃជ្រៅ ។
ចំណែកខេត្តមណ្ឌលគិរី ក៏ទទួលបានភ្ញៀវទេសចរជាតិ និងអន្តរជាតិកើនឡើងខ្ពស់ផងដែរ ដោយរយៈពេលបីថ្ងៃនេះ ភ្ញៀវទេសចរទៅទស្សនាកើនឡើងខ្ពស់រហូតដល់៦០%ដែលមានចំនួនជាង២,២ម៉ឺននាក់ ។ នេះបើតាមលោក គង់ វិមាន ប្រធានមន្ទីរទេសចរណ៍ខេត្តមណ្ឌលគិរី ។ លោកបន្តថា ៖« ដោយសារកំណើនភ្ញៀវទេសចរកើនឡើងច្រើនបែបនេះ ធ្វើឲ្យបន្ទប់សណ្ឋាគារ និងផ្ទះសំណាក់ដែលមានជាង១.០០០បន្ទប់ មិនអាចឆ្លើយតបបានឡើយ »។ លោកថា ៖« ភ្ញៀវទេសចរមួយចំនួនបានបោះតង់ស្នាក់នៅតាមវត្តអារាម និងតាមផ្ទះរបស់អ្នកស្រុកជាដើម »។ ខេត្តមណ្ឌលគិរីបច្ចុប្បន្នមានរមណីយដ្ឋាន និងសហគមន៍ទេសចរណ៍សរុបជាង២០ទីតាំង ដែលភ្ញៀវទេសចរជាតិ និងអន្តរជាតិអាចទស្សនាកម្សាន្ដបាន ។
យោងតាមរបាយការណ៍របស់ក្រសួងទេសចរណ៍បានឲ្យដឹងថា ចំនួនភ្ញៀវទេសចរជាតិ និងអន្តរជាតិបានដើរកម្សាន្ដនៅតាមបណ្ដាខេត្តនានាក្នុងឱកាសពិធីបុណ្យអុំទូក មានចំនួនជាង៩២ម៉ឺននាក់ កើនឡើងប្រមាណ១៥,៦% បើធៀបនឹងរយៈពេលដូចគ្នាកាលពីឆ្នាំមុន ។ ក្នុងនោះភ្ញៀវជាតិមានប្រមាណ៨៤,២ម៉ឺននាក់ ក្នុងអត្រាកំណើន១៥,៣% និងភ្ញៀវអន្តរជាតិប្រមាណ៨,៣ម៉ឺននាក់ ក្នុងអត្រាកំណើន១៨,៥% ៕
ចែករំលែកព័តមាននេះ