សហរដ្ឋអាមេរិកនិងពួកតាលីបង់នឹងភ្ជាប់ការចរចាគ្នាក្នុងប៉ុន្មានថ្ងៃខាងមុខនេះ ដែលនោះជាព្រឹត្តិការណ៍ប្រវត្តិសាស្ត្រមួយក្រោយ១២ឆ្នាំ នៃជម្លោះនៅអាហ្វហ្គានីស្ថាន ហើយដែលជួនពេលគ្នាជាមួយការបើកការិយាល័យតំណាងមួយរបស់ពួកតាលីបង់ នៅប្រទេសកាតា នាថ្ងៃទី១៨ មិថុនា ដើម្បីសម្រួលដល់ការចរចាសន្តិភាពជាមួយក្រុងកាបុល ។
សហរដ្ឋអាមេរិកនិងពួកតាលីបង់នឹងភ្ជាប់ការចរចាគ្នាក្នុងប៉ុន្មានថ្ងៃខាងមុខនេះ ដែលនោះជាព្រឹត្តិការណ៍ប្រវត្តិសាស្ត្រមួយក្រោយ១២ឆ្នាំ នៃជម្លោះនៅអាហ្វហ្គានីស្ថាន ហើយដែលជួនពេលគ្នាជាមួយការបើកការិយាល័យតំណាងមួយរបស់ពួកតាលីបង់ នៅប្រទេសកាតា នាថ្ងៃទី១៨ មិថុនា ដើម្បីសម្រួលដល់ការចរចាសន្តិភាពជាមួយក្រុងកាបុល ។
ការប្រកាសទាំងនេះក៏ធ្វើផងដែរចំថ្ងៃដែលរដ្ឋាភិបាលអាហ្វហ្គានីស្ថានទទួលគ្រប់គ្រងជាផ្លូវការលើសន្តិសុខរបស់ប្រទេសជំនួសកងកម្លាំងអូតង់ ដែលភាគច្រើននៃកងទាហានរបស់ខ្លួនទាំង១០០.០០០នាក់ដាក់ពង្រាយនៅអាហ្វហ្គានីស្ថានត្រូវដកចេញនាដំណាច់ឆ្នាំ២០១៤ ។
ទោះបីយ៉ាងណាផ្លូវទៅរកសន្តិភាពពិតជានៅឆ្ងាយ ហើយជួបប្រទះការលំបាកដោយសារជំហររបស់ក្រុងកាបុល និងបណ្តាសម្ព័ន្ធមិត្តលោកខាងលិច ព្រមទាំងដោយសារជំហររបស់ពួកតាលីបង់ ពិសេសលើអនាគតនៃរបបអាហ្វហ្គានីស្ថាននាពេលអនាគតមួយនិងលើវត្តមានយោធាអាមេរិកក្រោយឆ្នាំ២០១៤ ។
អ្នកទទួលខុសត្រូវអាមេរិកម្នាក់និយាយនៅ ក្រុងវ៉ាស៊ីនតោនថា សហរដ្ឋអាមេរិកនឹងជួបចរចាលើកដំបូងជាមួយពួកតាលីបង់ក្នុងប៉ុន្មានថ្ងៃខាងមុខនេះនៅក្រុងដូហា ។ អ្នកទទួលខុសត្រូវរូបនេះបញ្ជាក់ថា ការជួបគ្នានោះកំណត់ពីការចាប់ផ្តើមត្រួសត្រាយផ្លូវដ៏លំបាកបំផុតមួយ។
បេសកជនពិសេសរបស់សហរដ្ឋអាមេរិកទទួលបន្ទុកកិច្ចការអាហ្វហ្គានីស្ថាននិងប៉ាគីស្ថាន លោក JAMES DORBINS នឹងទៅកាន់ប្រទេសទាំង២នោះក្នុងសប្តាហ៍នេះ ហើយដំបូងឈប់សំចតនៅប្រទេសតួកគី ព្រមទាំងប្រទេសកាតា ។ ក្រសួងការបរទេសអាមេរិកពុំបានបញ្ជាក់ថា តើបេសកជនរូបនេះនឹងជួបពួកតាលីបង់ដែរ ឬយ៉ាងណាឡើយ ។
នៅក្រុងដូហា បណ្តាតំណាងរបស់ប្រទេសកាតា និងពួកតាលីបង់អាហ្វហ្គានីស្ថាន ប្រមាណជា១០នាក់ បានចូលរួមបើកការិយាល័យនយោបាយរបស់អេមីរ៉ាតអ៊ិស្លាមអាហ្វហ្គានីស្ថាន(ឈ្មោះប្រទេសដាក់ដោយពួកតាលីបង់) នៅក្រុងដូហា ។
រដ្ឋមន្ត្រីការបរទេសអាមេរិកលោកចន គ័ររីសម្តែងការ អបអរសាទរចំពោះដំណឹងល្អនោះ ។ លោកមានប្រសាសន៍ថា យើងមានការពេញចិត្តយ៉ាងខ្លាំងចំពោះអ្វីដែលកើតមាននេះ ។
ពួកតាលីបង់បានប្រាស្រ័យទាក់ទងកាលពីដើមឆ្នាំ២០១២ ជាមួយអាមេរិក ក៏ប៉ុន្តែពួកនោះតែងបដិសេធពីការចូលរួមក្នុងការចរចាសន្តិភាពបើដរាបណាកងទាហានបរទេសជាពួកឈ្លានពាន បន្តស្ថិតនៅអាហ្វហ្គានីស្ថាន ។ ក៏ប៉ុន្តែកាលពីខែមករា ឆ្នាំ២០១២ ពួកតាលីបង់និយាយថា ត្រៀមបើកការិយាល័យនយោបាយមួយនៅក្រៅប្រទេសដើម្បីសម្រួលដល់ការចរចាសន្តិភាពហើយជ្រើសរើសយកក្រុងដូហា ។
អ្នកនាំពាក្យម្នាក់របស់ពួកតាលីបង់នៅក្រុងដូហា លោកម៉ូហាម៉េដ ណៃអីុម និយាយទៅកាន់សារព័ត៌មានថា ការិយាល័យនេះសំដៅសម្រួលដល់ការចរចា និងការជួបគ្នាជាមួយបណ្តាប្រទេសលើពិភពលោក ។ក្នុងសេចក្តីប្រកាសមួយពួកបះបោរអ៊ិស្លាមដែលធ្វើសង្គ្រាមចាប់តាំងពីដំណាច់ឆ្នាំ២០០១ មកប្រឆាំងក្រុងកាបុល និងកងកម្លាំងអូតង់អះ អាងថា ពួកគេចង់ស្វែងរកដំណោះស្រាយដោយសន្តិវិធីមួយដើម្បីបញ្ចប់ការកាន់កាប់ប្រទេសអាហ្វហ្គានីស្ថានដោយពួកបរទេស ហើយបង្កើតរបបអ៊ិស្លាមឯករាជ្យមួយ ។ ពួកគេសន្យាថា នឹងមិនអនុញ្ញាតឱ្យនរណាមួយប្រើប្រាស់ដែនដីអាហ្វហ្គានីស្ថានដើម្បីគំរាមកំហែងសន្តិសុខរបស់ប្រទេសដទៃៗទៀតឡើយ ។
ទោះជាយ៉ាងណា ក្នុងសេចក្តីប្រកាសរបស់ខ្លួន ពួកតាលីបង់ពុំមាននិយាយដោយចំៗលើពួកអាល់កៃដា ដែលស្ថិតនៅតែជាសម្ព័ន្ធមិត្តប្រវត្តិសាស្ត្ររបស់ពួកគេឡើយ ។អ្នកនាំពាក្យម្នាក់របស់ក្រសួងការបរទេសអាមេរិកលោកស្រី JENNIFER PSAKI ឱ្យដឹង ម្យ៉ាងទៀតថា ការកាត់ផ្តាច់ទំនាក់ទំនងតាលីបង់-អាល់កៃដា ពុំមែនជាលក្ខខណ្ឌជាមុនមួយឡើយ តែគឺការឈានទៅរកដំណើរការនៃការចរចា ។
អ្នកនាំពាក្យការិយាល័យតាលីបង់នៅក្រុងដូហា អះអាងពីការប្រាស្រ័យទាក់ទង នាពេលអនាគតជាមួយសហរដ្ឋអាមេរិក ។ អ្នកនាំពាក្យរូបនេះលោកណៃអីុមនិយាយថា យើងនឹងចាប់ផ្តើមនាពេលខាងមុខនេះ នូវការចរចាជាមួយភាគីអាមេរិក ។ បញ្ហាបណ្តាមេដឹកនាំតាលីបង់ដែលជាប់ឃុំឃាំងនៅហ្គង់តាណាម៉ូ ស្ថិតក្នុងចំណោមសំណុំរឿង ដែលត្រូវពិភាក្សាគ្នាដើម្បីឱ្យមានដំណោះស្រាយមួយ ។
ប្រធានាធិបតីអាហ្វហ្គានីស្ថានលោកហាមី ដកាហ្សៃ ក៏ប្រកាសផងដែរថាលោកនឹងបញ្ជូនទៅកាន់ប្រទេសកាតានូវបណ្តាបេសកជននៃឧត្តមក្រុមប្រឹក្សាដើម្បីសន្តិភាពHCP ជាស្ថាប័នមួយបង្កើតឡើងប៉ុនប៉ងធ្វើការចរចាជាមួយពួកបះបោរ ។ លោកមានប្រសាសន៍ថា យើងសង្ឃឹមចំពោះការបើកការិយាល័យនោះដែលអាចចាប់ផ្តើមការចរចាតាមដែលអាចធ្វើទៅបានរវាងHCP និងពួកតាលីបង់ ។ លោកបញ្ជាក់ ថាការចរចាសន្តិភាពបន្ទាប់មកនឹងបន្តនៅអាហ្វហ្គានីស្ថាន ៕
ចែករំលែកព័តមាននេះ