ក្រុម​ហ៊ុន​ Samsung Electronics Co គ្រោង​ដាក់​លក់​ទូរស័ព្ទ​ស្មាត​ហ្វូន​ Galaxy S4 ដែល​នឹង​បញ្ជូន​ទិន្នន័យ​លឿន​ជាង​ល្បឿន​ធម្មតា​ដល់​ទៅ​២ដង​ ។ លោក​ J.K.Shin នាយក​ប្រតិបត្តិ​ក្រុម​ហ៊ុន​បច្ចេក​វិទ្យា​យក្ស​នេះ​និយាយ​ថា​ ទូរស័ព្ទ​នេះ​នឹង​ដាក់​លក់​នៅ​កូរ៉េ​ខាង​ត្បូង​ឱ្យ​បាន​ឆាប់​បំផុត​នៅ​ក្នុង​ខែ​មិថុនា ។ លោក​ Shin បាន​ថ្លែង​ប្រាប់​សារព័ត៌​មាន​ រ៉យ​ទ័រ​ នៅ​ទីក្រុង​ស៊ូវុន​ថា​ ក្រុម​ហ៊ុន​កំពុង​ពិភាក្សា​ជាមួយ​ក្រុម​ហ៊ុន​នាំ​ចេញ​ក្រៅ​ប្រទេស​ជា​ច្រើន​ ដើម្បី​ទទួល​យក​ទូរស័ព្ទ​នេះ​ ។

លោក​បន្ត​ថា​ «យើង​ជា​ក្រុម​ហ៊ុន​ដំបូង​គេ​ដែល​ដំណើរ​ការ​ពាណិជ្ជ​កម្ម​កំណែ​ទម្រង់​ថ្មី​ 4G នៃ​ទូរស័ព្ទ​ស្មាត​ហ្វូន​» ។ ទូរស័ព្ទ​ Galaxy S4 ថ្មី​នឹង​ប្រើ​ប្រាស់​បច្ចេក​វិទ្យា​ LTE-Advanced 4G (long term evelution) ទំនើប​ជាង​មុន​ ហើយ​ទូរស័ព្ទ​នឹង​ដំណើរ​ការ​ដោយ​ឈីប​ Qualcomm ។ ក្រុម​ហ៊ុន​នេះ​និយាយ​ថា​ កាល​ពី​មុន​ប្រសិន​បើ​គេ​ដោន​ឡូត​វីដេអូ​ដោយ​ប្រើ​បច្ចេក​វិទ្យា​ 4G ធម្មតា​ចំណាយ​ពេល​៣​នាទី​ តែ​ឥឡូវ​នេះ​គេ​ប្រើ​ពេល​តែ​១នាទី​ប៉ុណ្ណោះ​ ៕