រាជធានីភ្នំពេញ ៖ នៅខែកក្កដា ខាងមុខនេះសហព័ន្ធកីឡាវាយកូនឃ្លីលើតុកម្ពុជា នឹងបញ្ជូនកីឡាករ៥រូបទៅចូលរួមប្រកួតជើងឯកអាស៊ីអាគ្នេយ៍នៅទីក្រុងម៉ានីល ប្រទេសហ្វ៊ីលីពីន។ ការដែលសហព័ន្ធកីឡាវាយកូនឃ្លីលើតុកម្ពុជាបញ្ជូនទៅនោះក្នុងគោលបំណងចង់ពង្រឹងសមត្ថភាពកីឡាករ ដើម្បីត្រៀមចូលរួមព្រឹត្តិការណ៍SEA Games នៅប្រទេសមីយ៉ាន់ម៉ា នាចុងឆ្នាំនេះ ។ លោកស៊ុន សុទ្ធារិទ្ធិ អគ្គលេខាធិការសហព័ន្ធកីឡាវាយកូនឃ្លីលើតុកម្ពុជា បានមានប្រសាសន៍ ថា សហព័ន្ធរបស់លោកនឹងបញ្ជូនកីឡាករ៥នាក់ទៅចូលរួមប្រកួតជើងឯកអាស៊ីអាគ្នេយ៍នៅទីក្រុងម៉ានីល ប្រទេសហ្វ៊ីលីពីន ។
កីឡាករទាំង៥រូបនោះរួមមានកីឡាករអឹុង ស្រូយហួរ ,កីឡាករសឺន តុលា , កីឡាករ អ៊ុក ចាន់រតនា , កីឡាករ ទៀ តិអ៊ួួយ និងកីឡាករថាំង ឃាង ក្នុងនោះក៏មានគ្រូ បង្វឹកទៅជាមួយដែរ ។ សម្រាប់កីឡាករកម្ពុជាបានត្រៀមខ្លួនរួចហើយក្នុងការលេងវិញ្ញាសាឯកត្តជន វិញ្ញាសាវាយគូ និងការប្រកួតជាក្រុម ។ លោកបន្តថា នៅមិនទាន់ដឹងថានឹងមានប្រទេសប៉ុន្មានចូលរួមនោះទេ តែលោកមានជំនឿចិត្តថាប្រទេសខ្លាំងៗក្នុងតំបន់អាស៊ានដូចជាវៀតណាម ថៃ សិង្ហបុរី ម៉ាឡេស៊ី ឥណ្ឌូណេស៊ី គេប្រាកដជាទៅចូលរួម ។ ម្យ៉ាងទៀតឆ្នាំនេះជាឆ្នាំ SEA Games អាចថាគ្រប់ប្រទេសទាំង១១ក្នុងតំបន់នឹងបញ្ជូនអត្តពលិកវាយកូនឃ្លីលើតុរបស់គេទៅចូលរួមព្រោះនេះជាការប្រកួតកម្តៅសាច់ដុំដ៏សំខាន់ ម្យ៉ាងទៀតគេក៏ចង់ដឹងពីសមត្ថភាពកីឡាករនៃប្រទេសនានាផងដែរ ៕
ចែករំលែកព័តមាននេះ