រាជធានីភ្នំពេញ ៖ ក្រោយបំបាក់កីឡាករសៅ ប៊ុននឿន នៅលើរេញប៉ុស្ដិ៍លេខ៥ កាលពីថ្ងៃទី៣០ ឧសភា កីឡាករបាត់មុខយូរ ភុំសារ៉ាយ កំពុងក្លាយជាបេក្ខភាពដ៏សំខាន់មួយរូប ក្នុងបញ្ជីដែលមានមុខប្រកួតជាមួយកីឡាករបរទេសនៅថ្ងៃទី២៧ មិថុនា ដូចការគ្រោងទុក នៅលើសង្វៀន Beeline Arena ជ្រោយចង្វា ។ ឱកាសឡើងរេញអន្តរជាតិលើកទី១ បន្ទាប់ពីដកខ្លួនអស់មួយរយៈនេះភុំ សារ៉ាយ
រាជធានីភ្នំពេញ ៖ ក្រោយបំបាក់កីឡាករសៅ ប៊ុននឿន នៅលើរេញប៉ុស្ដិ៍លេខ៥ កាលពីថ្ងៃទី៣០ ឧសភា កីឡាករបាត់មុខយូរ ភុំសារ៉ាយ កំពុងក្លាយជាបេក្ខភាពដ៏សំខាន់មួយរូប ក្នុងបញ្ជីដែលមានមុខប្រកួតជាមួយកីឡាករបរទេសនៅថ្ងៃទី២៧ មិថុនា ដូចការគ្រោងទុក នៅលើសង្វៀន Beeline Arena ជ្រោយចង្វា ។ ឱកាសឡើងរេញអន្តរជាតិលើកទី១ បន្ទាប់ពីដកខ្លួនអស់មួយរយៈនេះភុំ សារ៉ាយ អះអាងថា នឹងពុះពារមិនឲ្យបាក់មុខឡើយ ដើម្បីផ្ដួលឲ្យខាងតែបានក្នុងការបង្ក្រាបកីឡាករបរទេសនៅលើរេញ ។
ភុំ សារ៉ាយ និយាយថា ជ័យជម្នះរបស់ខ្លួន លើកីឡាករ សៅ ប៊ុននឿន មកពីក្លិបក្រសួងមហាផ្ទៃ គឺជារឿងដែលធ្វើឲ្យលោកសប្បាយចិត្តផង និងមិនសប្បាយចិត្ត
ផង ។ មូលហេតុដែលនាំឲ្យលោកផុសចេញនូវអារម្មណ៍ពីរក្នុងពេលតែមួយបែបនេះ គឺដោយសារតែទី១ បានសម្រេចផែនការឡើងប្រកួតជាមួយកីឡាករបរទេស ដូចការគ្រោងទុកបន្ទាប់ពីបានដាក់ចិត្តវិលចូលរេញជាថ្មី និងទី២ គឺដោយសារខ្លាចចាញ់ដោយអាម៉ាស់ក្រោមដៃកីឡាករបរទេស ធ្វើឲ្យការសន្សំប្រជាប្រិយភាពរបស់លោកក្លាយជាអសារបង់ ។ អញ្ចឹងហើយ ទើបលោកស្ទុះស្ទាប្រឹងប្រែងមិនហ៊ានប្រហែសឡើយ ក្នុងការហ្វឹកហាត់ ព្រោះសង្ឃឹមថា ការពុះពារដែលកំពុងធ្វើឡើងក្នុងរយៈពេលនេះនឹងក្លាយជាជោគជ័យ ។
មកទល់ពេលនេះ នៅមិនទាន់ដឹងនៅឡើយទេថា កីឡាករភុំ សារ៉ាយ នឹងត្រូវឡើងរេញប៉ះជាមួយកីឡាករបរទេសឈ្មោះអ្វី និងជាជនជាតិអ្វីដែលត្រូវគេបញ្ជូនមកពីប្រទេសថៃ ។ ប្រភពពីប៉ុស្ដិ៍លេខ៥បានត្រឹមតែអះអាងថា ភុំ សារ៉ាយ មានឈ្មោះឡើងរេញប្រដាល់ក្នុងគូអន្តរជាតិ នៅថ្ងៃទី២៧ មិថុនា ប៉ុន្តែនៅមិនទាន់បញ្ជាក់នៅឡើយទេថាកីឡាករបរទេសដែលសម្ងំហ្វឹកហាត់ប្រដាល់នៅក្នុងប្រទេសថៃរូបណា គឺជាដៃគូរបស់គេ ។ ភុំ សារ៉ាយ អះអាងថា ជំនួបជាមួយកីឡាករជនជាតិណា ឬមានប្រវត្តិប្រកួតដូចម្ដេចមិនសំខាន់ទាំងស្រុងចំពោះលោកនោះទេ ប៉ុន្តែអ្វីដែលលោកត្រូវធ្វើឲ្យប្រាកដ គឺការពុះពារហ្វឹកហាត់ ហើយស្ទុះស្ទាបង្កើនកម្លាំងឲ្យកាន់តែប្រសើរ ដើម្បីយកឈ្នះលើគូប្រកួតនោះតែប៉ុណ្ណោះ។ លោកបញ្ជាក់ដោយមុតមាំថា ឱកាសនៅលើរេញអន្តរជាតិប៉ុស្ដិ៍លេខ៥លើកដំបូងរបស់ខ្លួនក្រោយពីផ្អាកអស់មួយសន្លប់ធំគឺមិនអាចចាញ់ការប្រកួតបានទេ ដើម្បីកុំឲ្យប្រជាប្រិយភាពដែលលោកសង្ឃឹមថា នឹងស្ដារបានដូចដើម ក្នុងពេលត្រឡប់មកកាន់សង្វៀនជាថ្មីលើកនេះត្រូវរលាយ ។
ភុំ សារ៉ាយ ដែលកំពុងជ្រកក្នុងក្លិបអាជ្ញាធរជាតិអាវុធគីមីត្រូវគេកត់សម្គាល់ថា ជាកីឡាករជើងចាស់តែម្នាក់គត់ ដែលមានវ័យជ្រេ ហើយបែរជានៅតែខ្លាំងក្រោយពេលសម្រាកពីអាជីពប្រដាល់អស់មួយរយៈ ។ អ្វីដែលគេភ្ញាក់ផ្អើលខ្លាំង គឺនៅពេលដែលលោកវិលចូលរេញប្រដាល់ជាថ្មី ហើយបែរជាអាចបំបាក់ជើងខ្លាំងល្បីៗ ដូចជាបានប៉ែងជើងកីឡាករសៅ ប៊ុននឿន ហើយដណ្ដើមយកឱកាសឡើងប្រកួតនៅលើរេញបរទេសនាចុងខែនេះជាដើម ។ ជាមួយនឹងសមត្ថភាពដ៏កម្រនេះ ទើបគេជឿដូចគ្នាថា ជើងចាស់ភុំ សារ៉ាយ ពិតជាអាចឈ្នះកីឡាករបរទេស ដូចការសម្ដែងឆន្ទៈ។ ចាំមើលតើជ័យជម្នះរបស់លោកនឹងអាចកើតមាន ឬមិនមាននៅលើសង្វៀនបរទេសលើកដំបូងបន្ទាប់ពីផ្អាកប្រកួតមួយរយៈមកនោះ ៕
ចែករំលែកព័តមាននេះ