ខេត្តព្រះសីហនុ ៖ ក្នុងហេតុការណ៍គ្រោះថ្នាក់ចរាចរណ៍ដ៏រន្ធត់ស្ទើរតែមួយប៉ប្រិចភ្នែកប៉ុណ្ណោះបណ្តាលឲ្យជនជាតិចិនម្នាក់រងរបួសធ្ងន់សល់តែដង្ហើមចង្រិតរួមនឹងរថយន្តស៊េរីទំនើប១គ្រឿងត្រូវរងការខូចខាតមួយកំណាត់ខាងក្រោយស្ទើរទាំងស្រុង ។
ហេតុការណ៍ខាងលើបង្កឡើងដោយខ្លួនឯងដោយជនជាតិចិនមិនស្គាល់អត្តសញ្ញាណម្នាក់មិនមានអ្នករួមដំណើរជាមួយ បើកបររថយន្តម៉ាកស្តាររិច ស៊េរីទំនើប ១២កៅអី ពណ៏ស ពាក់ផ្លាកលេខ 2AP-1227 បើកទៅបុកជាមួយទូរកុងតឺន័រដឹកសម្ភារសំណង់ខាងមុខការដ្ឋានសណ្ឋារគារ «ណានហៃភល អាផាតមិន» ដែលដាក់ចោលរំលោភមកលើចញ្ចើមផ្លូវ ត្រង់ចំណុចប្រមាណជា២០០ម៉ែត្រចំណោតឡើងខាងលើកាស៊ីណូហូលីដេ ស្ថិតក្នុងភូមិ០១ សង្កាត់លេខ០៣ ក្រុង-ខេត្តព្រះសីហនុ ។
តាមការឲ្យដឹងពីសន្តិសុខឯកជនសណ្ឋារគារខាងលើបានឲ្យដឹងថា តាមការស្មានជនរងគ្រោះទើបចេញពីលេងល្បែងក្នុងកាស៊ីណូក្បែរកន្លែងកើតហេតុ ទំនងជាខឹង និងលេងចាញ់ទើបបើករថយន្តលឿនដូចហោះយ៉ាងនេះដោយហេតុថាមុនកើតហេតុគេឃើញរថយន្តខាងលើបើកចេញមកពីខាងមុខកាស៊ីណូហូលីដេតាមបណ្តោយវិថី០២ធ្នូពីលិចទៅកើត។
ក្នុងរយៈពេលមិនបាន១០នាទីផងមកដល់ចំណុចកើតហេតុ ស្រាប់តែរថយន្តរ៉េចង្កូតជ្រុលទៅខាងឆ្វេងបន្ទាប់មកក៏រ៉េមកខាងស្តាំវិញម្តងក្នុងល្បឿនលឿនក៏បោកខ្លួនរថយន្តពាក់កណ្តាលផ្នែកខាងក្រោយដាច់ទ្វារមួយផ្ទាំងផ្នែកខាងឆ្វេងជាប់ជាមួយទូរកុងតឺន័របណ្តាលឲ្យរថយន្តពាក់កណ្តាលផ្នែកខាងក្រោយរងការខូចខាតស្ទើរទាំងស្រុង ។
ដោយឡែកជនជាតិចិនជាអ្នកបើកបររងរបួសធ្ងន់ក្រោយកើតហេតុបានរថយន្តគ្លីនិកឯកជនដឹកយកទៅព្យាបាលរីឯរថយន្តបង្ករហេតុត្រូវបានសមត្ថកិច្ចនគរបាលការិយាល័យចរាចរណ៍ផ្លូវគោកស្ទូចយកទៅរក្សាទុករង់ចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ