រាជធានីភ្នំពេញ ៖ ម៉ូតូកង់បី១គ្រឿង មិនដឹងថា ប្រញាប់ទៅណានោះទេ បានបើកបរក្នុងល្បឿនដូចហោះ វ៉ាជែងយានយន្តជាច្រើនគ្រឿងនៅខាងមុខ ស្រាប់តែជ្រុលទៅកៀរពីក្រោយម៉ូតូម៉ាកហុងដា គុបចង្កៀងជ្រុង ១គ្រឿង…
រាជធានីភ្នំពេញ ៖ ម៉ូតូកង់បី១គ្រឿង មិនដឹងថា ប្រញាប់ទៅណានោះទេ បានបើកបរក្នុងល្បឿនដូចហោះ វ៉ាជែងយានយន្តជាច្រើនគ្រឿងនៅខាងមុខ ស្រាប់តែជ្រុលទៅកៀរពីក្រោយម៉ូតូម៉ាកហុងដា គុបចង្កៀងជ្រុង ១គ្រឿង ជិះគ្នា២នាក់ បណ្ដាលឲ្យដួលច្រងាប់ច្រងិលបោកផ្ទប់ថ្នល់ ខណៈនោះជនរងគ្រោះទាំង២នាក់ បានរងរបួសធ្ងន់ធ្ងរដួលដេកនៅលើផ្លូវ ក្រោមកម្ដៅថ្ងៃក្ដៅខ្លាំង បន្ទាប់មកម៉ូតូកង់បីនោះ បានបន្ថែមល្បឿនកាន់តែលឿនរត់គេចបាត់ ដោយសុវត្ថិភាព ។
ឧប្បត្តិហេតុនេះបានកើតឡើងកាលពីវេលាម៉ោង៤និង២៥នាទីនៅលើកំណាត់ផ្លូវជាតិលេខ៤ ត្រង់ចំណុចមុខបុរីអូដឹម ស្ថិតនៅក្នុងភូមិអូដឹម សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ជនរងគ្រោះ មិនត្រូវបានស្គាល់អត្តសញ្ញាណនោះទេ ម៉ូតូ១គ្រឿង ម៉ាកហុងដាគុបជ្រុង ពណ៍ទឹកប្រាក់ ពាក់ស្លាកលេខភ្នំពេញ 1AW-4263 ហើយក្រោយពេលកើតហេតុ ត្រូវបានក្រុមសង្គ្រោះអង្គភាព៧១១ បានដឹកយកជនរងគ្រោះទៅកាន់មន្ទីរពេទ្យព្រះសុមៈ ដើម្បីសង្គ្រោះបន្ទាន់ ។
អ្នកឃើញហេតុការណ៍ បានប្រាប់ឲ្យដឹងថា នៅមុនពេលកើតហេតុគាត់បានឃើញបុរសរងគ្រោះទាំង២នាក់ខាងលើ ជិះម៉ូតូឌុបគ្នា ធ្វើដំណើរតាមផ្លូវជាតិលេខ៤ ក្នុងទិសដៅពីកើតទៅលិច។ លុះពេលទៅដល់ត្រង់ចំណុចកើតហេតុខាងលើ ស្រាប់តែមានម៉ូតូកង់បី ១គ្រឿងបើកបរយ៉ាងលឿន ធ្វើដំណើរក្នុងទិសដៅស្របគ្នា ទៅដល់កៀរពីក្រោយ បណ្ដាលឲ្យដួលបោកផ្ទប់ថ្នល់រងរបួសធ្ងន់ទាំង២នាក់តែម្ដង ។
ប្រភពដដែល បានឲ្យដឹងបន្តទៀតថា ក្រោយពេលកើតហេតុ ម៉ូតូកង់បីនោះ បើករត់គេចបាត់ស្រមោល បន្ទាប់មកនគរបាលប៉ុស្តិ៍ចោមចៅទី៣ បានចុះទៅនាំយកម៉ូតូ ទៅរក្សាទុកបណ្ដោះអាសន្នរង់ចាំប្រគល់ ជូនជនរងគ្រោះវិញ នៅពេលក្រោយ ៕
ចែករំលែកព័តមាននេះ