ខេត្តកំពង់ស្ពឺ ៖ បទល្មើសព្រៃឈើនៅតែបន្តកើតមាននៅក្នុងភូមិពោធិមាស ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ប៉ុន្តែអាជ្ញាធរ និងសមត្ថកិច្ចពាក់ព័ន្ធសង្ស័យមិនដែលអើពើអន្តរាគមន៍ទប់ស្កាត់ និងបង្ក្រាបបានម្តងណាឡើយ បណ្តែតបណ្តោយឱ្យក្រុមមេឈ្មួញល្បីឈ្មោះ…
ខេត្តកំពង់ស្ពឺ ៖ បទល្មើសព្រៃឈើនៅតែបន្តកើតមាននៅក្នុងភូមិពោធិមាស ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ប៉ុន្តែអាជ្ញាធរ និងសមត្ថកិច្ចពាក់ព័ន្ធសង្ស័យមិនដែលអើពើអន្តរាគមន៍ទប់ស្កាត់ និងបង្ក្រាបបានម្តងណាឡើយ បណ្តែតបណ្តោយឱ្យក្រុមមេឈ្មួញល្បីឈ្មោះ ដែលមានឈ្មោះ ធឺន ដឹកជញ្ជូនឈើគ្រឿងផ្ទះបានដោយរលូន ចាយលុយត្រឹមតែ១លានរៀលតែប៉ុណ្ណោះ ចេញពីស្រុកឱរ៉ាល់ ឆ្លងកាត់ស្រុកថ្ពងបានដោយរលូន ។
ជាក់ស្តែង កាលពីរំលងអធ្រាត្រឈានចូលថ្ងៃទី៨ ឧសភា ឆ្នាំ២០២៤ កន្លងទៅថ្មីៗនេះ មេឈ្មួញឈ្មោះ ធឺន អាយុជិត៥០ឆ្នាំ រស់នៅក្នុងភូមិពោធិមាស ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ បានដឹកឈើតាមគោយន្តកន្ត្រៃមួយគ្រឿង ជាប្រភេទឈើលេខ១ (គ្រឿងផ្ទះ) ចេញពីស្រុកឱរ៉ាល់ ចំណុចខាងជើងរង្វង់មូលស្ពានដែក តាមបណ្តោយផ្លូវក្រាលកៅស៊ូលេខ៤៤ ឆ្ពោះទៅទិសខាងកើត ឆ្លងកាត់ស្នាក់ការសមត្ថកិច្ចតាមដងផ្លូវជាច្រើន មានដូចជានគរបាលប៉ុស្តិឃុំត្រពាំងជោ ស្នាក់ការរងបរិស្ថានភ្នំតូច និងស្នាក់ការអាវុធហត្ថស្រុកឱរ៉ាល់ ស្នាក់ការសង្កាត់រដ្ឋបាលព្រៃឈើត្រពាំងជោ រួចហួសទៅដល់ព្រំប្រទល់ស្រុកថ្ពង មានប៉ុស្តិនគរបាល និងស្នាក់ការជាច្រើនថែមទៀតផង ប៉ុន្តែការដឹកជញ្ជូនឈើតាមគោយន្តកន្ត្រៃរបស់មេឈ្មួញឈ្មោះ ធឺន រូបនោះ មិនត្រូវបានចាប់បង្ក្រាបម្តងណាឡើយ ដោយលោកថៅកែ ធឺន បានចំណាយលុយគ្រប់សមត្ថកិច្ចជំនាញទាំងអស់មិនឱ្យរំលងស្ថាប័នណាឡើយ បើទោះបីសមត្ថកិច្ចណាចុះមកចាប់ ក៏ចាប់មិនបានជាប់ដែរ ថៅកែ ធឺន មានខ្នងបង្អែកធំៗ គ្រាក់ៗនៅចាំជួយអន្តរាគមន៍រហូតដល់គោលដៅ។
បើតាមការបង្ហើបឱ្យដឹងពីប្រជាពលរដ្ឋថា ថៅកែល្បីឈ្មោះរកស៊ីមិនខ្លាចញញើតសមត្ថកិច្ចនេះ ជារៀងរាល់ថ្ងៃដើរប្រមូលទិញឈើគ្រឿងផ្ទះនៅក្នុងភូមិស្ពានដែក ភូមិស្រែច្រាប និងភូមិពោធិមាស ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ដោយបញ្ជារឱ្យកូនចៅដឹកតាមគោយន្តកន្ត្រៃ ពេលប្រមូលបានគ្រប់ចំនួនពេញគោយន្តហើយ(ចាប់ពី៣ទៅ៥ម៉ែត្រគូប) ទើបធ្វើដំណើរយកទៅលក់បន្តទៅតាមដេប៉ូ ឬឈ្មួញធំៗបន្តទៀត ។
លោកថៅកែឈើល្បីល្បាញរកស៊ីដឹកជញ្ជូនឈើមិនខ្លាចញញើតសមត្ថកិច្ចខាងលើនេះ ធ្លាប់ព្រលយពាក្យថា ចាយលុយត្រឹម១លានរៀលទៅ គ្មានសមត្ថកិច្ចណាហ៊ានចាប់បង្ក្រាបឈើរបស់គេ ។ ម្យ៉ាងវិញទៀតខ្នងបង្អែករបស់គេក៏ធំ គ្មានសមត្ថកិច្ចណាហ៊ានបង្ក្រាបឬចាប់អីវ៉ាន់របស់គេឡើយ។ទង្វើររបស់ថៅកែធឺន បំផ្លិចបំផ្លាញបទល្មើសព្រៃឈើ និងអាងខ្នងបង្អែកអ្នកមានលុយ មានអំណាចនៅពីក្រោយខ្នងនេះ ធ្វើឱ្យព្រៃឈើនៅក្នុងស្រុកឱរ៉ាល់រងនូវក្តីវិនាសហិនហោចប្រាកដណាស់ ។
ព័ត៌មានបន្ថែមនឹងមានផ្សាយជូនលើកាសែតកោះសន្តិភាព ។
ចែករំលែកព័តមាននេះ