សម្តេច​នាយករដ្ឋមន្រ្តី​ ហ៊ុន សែន​ បានប្រកាស​ជាសាធារណៈ​នៅព្រឹកថ្ងៃទី១៩​ មិថុនា២០១៣​នេះថា​ សម្តេចគ្មានFacebook ​ដូចការលើក​ឡើងរបស់​បក្សប្រឆាំង​នោះទេ ។​

ការប្រកាស​របស់សម្តេច​អគ្គមហាសេនា​បតីតេជោ​ ហ៊ុន សែន​ យ៉ាងដូច្នេះ​ធ្វើឡើងបន្ទាប់​ពីទណ្ឌិត សម រង្ស៊ី​ ប្រធាន​គណបក្ស​សង្រ្គោះជាតិ​កាលពីថ្ងៃទី​ ១៦ មិថុនា កន្លង​មក​នេះ​ បានធ្វើពិធី​សំណេះសំណាល​ជាមួយក្រុម​យុវជន​តាមរយៈវីដេអូខន​ហ្វ័ររិនពីក្រៅប្រទេស​ ដែលពិធីនេះ​ត្រូវបានលោក សមរង្ស៊ី អះអាងពីការ​ទទួលជោគ​ជ័យលើ​សម្តេចតេជោ​ ហ៊ុន សែន ​តាមរយៈការគំាទ្រ​ (Like)​ របស់ក្រុមយុវជន​តាមបណ្តាញ​សង្គម​ Facebook ។

ដោយឡែក​ក្នុងពិធីសម្ពោធ​ដាក់ឲ្យដំណើរ​ការជាផ្លូវការ​នូវវិទ្យាល័យ​២កន្លែង​ក្នុងស្រុកអង្គស្នួល ​ខេត្តកណ្តាល​កាលពីព្រឹកថ្ងៃពុធនេះ​ដែរ​ សម្តេចនាយក​រដ្ឋមន្រ្តី ​ហ៊ុន សែន ក៏បានប្រកាស​ទៀតថា​ ឯកសារនិងខ្សែអាត់​សំឡេង​មេបក្សប្រឆាំង​ដែលធ្វើការជេរប្រមាថ​ និងរិះគន់​មកលើគណបក្ស​ប្រជាជនកម្ពុជា បានរៀបចំរួចរាល់ហើយ នឹងត្រៀម​បញ្ជូនទៅកាន់​ស្ថានទូតនានា​ប្រចំាកម្ពុជា​ក្នុងពេលឆាប់ៗនេះ ៕