ខេត្តព្រះសីហនុ ៖ នៅក្នុងចំណាត់ការរបស់ក្រសួងទេសចរណ៍ក្នុងគោលបំណងផ្សព្វផ្សាយដល់ពិភពលោកឱ្យស្គាល់កាន់តែច្រើនអំពីព្រះរាជាណាចក្រកម្ពុជាអច្ឆរិយៈពិសេសតំបន់រមណីយដ្ឋានទេសចរណ៍សំខាន់ៗតាមបណ្តាខេត្តនិងរាជធានីភ្នំពេញ។ លោកថោង ខុន រដ្ឋមន្ត្រីក្រសួងទេសចរណ៍បានចាត់បញ្ជូនមន្ត្រីជំនាញដឹកនាំក្រុមបុគ្គលិកអ្នកកាសែត និងទូរទស្សន៍មកពីទូរទស្សន៍ VIP VISUAL PRO DUCCIONS.SL ក្នុងប្រទេសអេស្ប៉ាញ ចុះមកថតយកសក្តានុពលចំរុះអំពីតំបន់ទេសចរណ៍សំខាន់ៗដែលមាននៅក្នុងខេត្តព្រះសីហនុ មានដូចជា តំបន់ឆ្នេរសមុទ្រ តំបន់ដីកោះ រមណីយដ្ឋានក្បាលឆាយ និងសណ្ឋាគារលំដាប់អន្តរជាតិជាដើម។
លោកអឿ វិបុល ប្រធានការិយាល័យទេសចរណ៍សហគមន៍គ្រប់គ្រងតំបន់ឆ្នេរថ្លែងបញ្ជាក់ឱ្យដឹងថា សកម្មភាពដែលក្រុមអ្នកកាសែត និងទូរទស្សន៍ប្រទេសអេស្ប៉ាញចុះមកថតយកព័ត៌មាននេះនឹងជួយឱ្យខេត្តព្រះសីហនុ ទទួលបានភ្ញៀវទេសចរកាន់តែច្រើនឡើង ខណៈពេលដែលតំបន់ឆ្នេរសមុទ្រនេះត្រូវបានដាក់បញ្ចូលជាសមាជិកក្លឹបឆ្នេរសមុទ្រដែលស្អាតលើសាកលលោក។ ជាមួយគ្នានេះលោកពា ភាព មន្ត្រីសំរបសំរួលមកពីក្រសួងទេសចរណ៍បានឱ្យដឹងផងដែរថា ក្រុមអ្នកកាសែត និងទូរទស្សន៍អេស្ប៉ាញនឹងថតយកសក្តានុពលទេសចរណ៍ក្នុងព្រះរាជាណាចក្រកម្ពុជា រួមមាននៅរាជធានីភ្នំពេញ ខេត្តសៀមរាប និងក្រុងព្រះសីហនុ ខេត្តព្រះសីហនុ រយៈពេល២សបា្តហ៍ ដែលតាមការគ្រោងទុកសកម្មភាពថតនេះ នឹងបញ្ចប់នៅថ្ងៃទី១១ វិច្ឆិកា ឆ្នាំ២០១០។
គេសង្ឃឹមថា ព័ត៌មានស្តីពីសក្តានុពលទេសចរណ៍ចំរុះរបស់ព្រះរាជាណាចក្រកម្ពុជា នឹងត្រូវបានផ្សព្វផ្សាយពាសពេញពិភពលោក នៅពេលដែលក្រុមការងារបញ្ចប់សកម្មភាពថតយករូបភាពតាមគមរោងដែល ក្រសួងទេសចរណ៍បានកំណត៕
ចែករំលែកព័តមាននេះ