រាជធានីភ្នំពេញ ៖ ធនាគារវិនិយោគ និងអភិវឌ្ឍន៍កម្ពុជា ភីអិលស៊ី (BIDC) សហការជាមួយសហព័ន្ធកីឡាបាល់ទាត់កម្ពុជា ដែលមានលោកនាយឧត្តមសេនីយ៍ សៅ សុខា ជាប្រធានសហព័ន្ធ កាលពីថ្ងៃទី១៧ មិថុនា នៅសណ្ឋាគារភ្នំពេញបានធ្វើសន្និសីទសារព័ត៌មានមួយប្រកាសបន្តធ្វើជាម្ចាស់ផ្ទះឧបត្ថម្ភធំសម្រាប់ការប្រកួតបាល់ទាត់ជាលក្ខណៈអន្តរជាតិនៅកម្ពុជា
រាជធានីភ្នំពេញ ៖ ធនាគារវិនិយោគ និងអភិវឌ្ឍន៍កម្ពុជា ភីអិលស៊ី (BIDC) សហការជាមួយសហព័ន្ធកីឡាបាល់ទាត់កម្ពុជា ដែលមានលោកនាយឧត្តមសេនីយ៍ សៅ សុខា ជាប្រធានសហព័ន្ធ កាលពីថ្ងៃទី១៧ មិថុនា នៅសណ្ឋាគារភ្នំពេញបានធ្វើសន្និសីទសារព័ត៌មានមួយប្រកាសបន្តធ្វើជាម្ចាស់ផ្ទះឧបត្ថម្ភធំសម្រាប់ការប្រកួតបាល់ទាត់ជាលក្ខណៈអន្តរជាតិនៅកម្ពុជា ដណ្តើមពានរង្វាន់ BIDC Cup 2013 ជាលើកទី៣ ដែលគ្រោងរៀបចំធ្វើនៅពាក់កណ្តាលខែវិច្ឆិកាខាងមុខនេះ ។
យោងតាមប្រភពព័ត៌មានឱ្យដឹងថា សម្រាប់ការប្រកួតលើកនេះអាចមានកីឡាករចូលរួមចំនួន៨ក្រុមច្រើនជាងបណ្តាឆ្នាំមុនៗ ។ BIDC Cup បានបង្កើតឡើងតាំងពីឆ្នាំ២០០៩ ក្នុងគោលបំណងលើកកម្ពស់ទំនាក់ទំនងមិត្តភាព និងកិច្ចសហប្រតិបត្តិការលើគ្រប់វិស័យរវាងប្រទេសទាំង៣នៅឥណ្ឌូចិន គឺកម្ពុជា វៀតណាម និងឡាវ ក្នុងក្របខ័ណ្ឌយុវជនអាយុក្រោម១៣ឆ្នាំ ដោយកាលណោះកីឡាករចូលរួមមានចំនួន៤ក្រុម គឺក្រុមកម្ពុជា, ឡាវ និងវៀតណាមដែលមាន២ក្រុម ហើយក្រុមកម្ពុជាទទួលបានចំណាត់ថ្នាក់ជាម្ចាស់ជើងឯក ។ BIDC Cup បានបន្តធ្វើឡើងនៅឆ្នាំ២០១១ ទៀតដែលជាព្រឹត្តិការណ៍នៃការប្រកួតរយៈពេល២ឆ្នាំម្តង ។
នៅលើកទី២នេះមានកីឡាករចូលរួមចំនួន៦ក្រុម ដែលសុទ្ធសឹងជាក្រុមមកពីប្រទេសតំបន់ទន្លេមេគង្គ ក្នុងនោះមានកម្ពុជា, វៀតណាម, ឡាវ, ថៃ, មីយ៉ាន់ម៉ា និងចិន ហើយកាលណោះក្រុមមីយ៉ាន់ម៉ាទទួលបានតំណែងជាម្ចាស់ជើងឯក ។ ភាពជោគជ័យដែលបានកើតឡើងជាបន្តបន្ទាប់មកនេះបានធ្វើឱ្យ BIDC ដែលជាម្ចាស់ឧបត្ថម្ភធំកាន់តែមានភាពសប្បាយរីករាយ និងចង់ពង្រីកការប្រកួតឱ្យកាន់តែធំឡើងទៀត ដោយឆ្នាំនេះមានកីឡាករចូលរួមរហូតដល់ទៅ៨ក្រុម ក្នុងនោះមាន៦ក្រុមមកពីបណ្តាប្រទេសតំបន់ទន្លេមេគង្គ និង២ក្រុមទៀតមកពីប្រទេសជប៉ុន ។
គួររំលឹកផងដែរថា ការប្រកួតបាល់ទាត់ដណ្តើមពានរង្វាន់ BIDC នេះគឺជាគំនិតផ្តួចផ្តើមឡើងរបស់លោកនាយឧត្តមសេនីយ៍ សៅ សុខា និងលោក ជិន បាក់ហា ប្រធានក្រុមប្រឹក្សាភិបាលធនាគារវិនិយោគ និងអភិវឌ្ឍន៍វៀតណាម ។ នៅក្នុងឱកាសនោះផងដែរ ក៏មានការចុះហត្ថលេខារវាងតំណាង BIDC និងលោកនាយឧត្តមសេនីយ៍ សៅ សុខា ស្តីពីការឯកភាពគ្នាលើគម្រោងរៀបចំឱ្យមានព្រឹត្តិការណ៍នៃការប្រកួតបាល់ទាត់នេះឡើង ហើយខាង BIDC និងធនាគារមេ BIDV បានធ្វើការឧបត្ថម្ភទឹកប្រាក់ចំនួន២២ម៉ឺនដុល្លារសហរដ្ឋអាមេរិកសម្រាប់រៀបចំការប្រកួត និងធនាគារ BIDC បានឧបត្ថម្ភ១០ម៉ឺនដុល្លារសហរដ្ឋអាមេរិកដល់សហព័ន្ធកីឡាបាល់ទាត់កម្ពុជាសម្រាប់ចំណាយផ្សេងៗលើវិស័យបាល់ទាត់ ។
ជាមួយគ្នានេះផងដែរ BIDC ក៏បានធ្វើការប្រកាសស្តីពីការទទួលបាននូវពានរង្វាន់របស់ខ្លួនពីស្ថាប័ន International Data Croup ដែលពានរង្វាន់នេះមានឈ្មោះថា “The Most Outstanding Promising Growth Bank Award”។ ពានរង្វាន់នេះគឺជាការបញ្ជាក់ពីភាពរីកចម្រើនរបស់ធនាគារ BIDC ក្នុងរយៈពេល៤ឆ្នាំកន្លងមកនេះ ។ ធនាគារ BIDC បានបង្កើតឡើងនៅកម្ពុជាជាផ្លូវការនៅក្នុងខែសីហា ឆ្នាំ២០០៩ ជាមួយនឹងការបោះទុនវិនិយោគក្នុងទឹកប្រាក់៧០លានដុល្លារសហរដ្ឋអាមេរិក ។ ធនាគារ BIDC មានទ្រព្យសកម្មបច្ចុប្បន្ននៅទីផ្សារកម្ពុជា ស្មើនឹងលំដាប់ថ្នាក់ Top5 ក្នុងចំណោមធនាគារពាណិជ្ជទាំង៣២ នៅកម្ពុជា ៕
ចែករំលែកព័តមាននេះ