រាជធានីភ្នំពេញ ៖ ឆ្លងកាត់ការប្រកួតចំនួន៦៧ដងកីឡាករយុគ យក្សផ្លែ ទើបតែធ្វើឲ្យមហាជនអ្នកស្នេហាកីឡាប្រដាល់ទូទៅសម្ដែងការកោតសរសើរនារយៈពេលចុងក្រោយប៉ុណ្ណោះ បន្ទាប់ពីគេឡើងរេញប្រកួតម្ដងៗគឺរមែងធ្វើឲ្យគូប្រកួតរបស់ខ្លួនសន្លប់ភ្លឹងៗ ដោយឆ្លងមិនដល់៥ទឹក ។ អ្វីដែលគេភ្ញាក់ផ្អើលខ្លាំងនោះ គឺបន្ទាប់ពីកីឡាករជើងខ្លាំង ហែម ថង បានក្លាយជាជនទី១០ ដែលត្រូវសន្លប់ក្រោមដៃរបស់គេ កាលពីថ្ងៃអាទិត្យទី១៦ មិថុនា ។
មិនខុសពីការតាំងចិត្តទាល់តែសោះ កីឡាករយុគ យក្សផ្លែ ដែលអ្នកណាក៏ស្គាល់ថា ជាប្អូនប្រុសបង្កើត និងជាគ្រាប់ពូជថ្មីរបស់កីឡាករយុគ យក្សគីល មកពីក្លិបអប់រំកាយ និងកីឡាខេត្តបាត់ដំបងកាន់តែបង្ហាញឲ្យឃើញច្បាស់ថាខ្លួនគេខ្លាំងពីមួយដំណាក់កាលទៅមួយដំណាក់កាល ។ ប្រមាណកន្លះឆ្នាំចុងក្រោយ លទ្ធផលចាញ់របស់កីឡាកររូបនេះត្រូវគេកត់សម្គាល់ថា កម្រកើតមានដូចអំឡុងពេលមុន ដោយក្នុងនោះលទ្ធផលផ្ដួលគូប្រកួតឲ្យសន្លប់ ត្រូវគេឃើញថាកើតមានឡើងស្ទើរតែជាប់សូរគ្នាផ្ទួនៗ ហួសពីការប៉ាន់ស្មាន ។
មិនត្រឹមតែអ្នកស្នេហាក្បាច់គុនប្រដាល់ប៉ុណ្ណោះទេ ពោលគឺសូម្បីតែកីឡាករភាគច្រើន នៅក្នុងពិភពប្រដាល់ ដែលធ្លាប់មើលស្រាលគេកន្លងមកក៏ញាក់សាច់ដូចគ្នាថាយុគ យក្សផ្លែ ពេលនេះ មិនខុសពីដំរីចុះប្រេង ដែលអ្នកណាឡើងប្រកួតជាមួយបើមិនចាញ់ដោយពិន្ទុក៏សន្លប់ដែរ ។ មកទល់ពេលនេះ មានកីឡាករចំនួន១០រូបហើយបានក្លាយជាអ្នកដួលសន្លប់នៅលើរេញ ក្រោមដៃរបស់យុគ យក្សផ្លែ ខណៈដែលតួលេខអ្នកឆ្លងមិនដល់ទឹកទី៥ទាំងនោះ គឺទើបតែកើតមានក្នុងរយៈពេលចុងក្រោយនាកន្លះឆ្នាំនេះប៉ុណ្ណោះ គឺចំពេលដែលយុគ យក្សផ្លែ តាំងចិត្តថា នឹងស្ដារមុខមាត់របស់បងប្រុសឲ្យខាងតែបាន ដើម្បីលើកស្ទួយត្រកូលអ្នកប្រដាល់របស់ខ្លួន ។
ក្នុងចំណោមអ្នកសន្លប់ទាំងនោះមិនមែនជាកីឡាករជើងថ្មីនោះឡើយ ដោយហោចណាស់ក៏ដៃគូរបស់គេធ្លាប់ឆ្លងកាត់ការប្រកួតច្រើនជាង៣០ដងដែរ ។ ជាក់ស្ដែងកីឡាករម៉ន រ៉ៃយ៉ា ដែលអ្នកណាក៏ទទួលស្គាល់ថា មិនធម្មតានោះ បានត្រឹមតែឈានដល់ទឹកទី៣ប៉ុណ្ណោះ ដើម្បីក្លាយជាជនទី៩ ដែលត្រូវគេចុះបញ្ជីថា បានសន្លប់ក្រោមដៃរបស់គេ ។ ដោយឡែកចំពោះកីឡាករ ហែម ថង មកពី មជ្ឈមណ្ឌលកីឡាខេមរភូមិន្ទ ដែលជាជនទី១០នេះវិញត្រូវគេដឹងថា បានឡើងរេញចំនួន៤៨ដងរួចមកហើយ ខណៈដែលនាពេលកន្លងមក យុគ យក្សផ្លែ ក៏សឹងមិនមែនជាដៃគូរបស់គេផង បើទោះជាយុគ យក្សផ្លែ ឆ្លងកាត់ការប្រកួតបានច្រើនជាង ។
កីឡាករហែម ថង បានក្លាយជាជនទី១០ សន្លប់ក្រោមដៃយុគ យក្សផ្លែ ក្នុងការប្រកួត កាលពីថ្ងៃអាទិត្យទី១៦ មិថុនា នៅសង្វៀនបឹងស្នោ ។ លទ្ធផលសន្លប់ក្នុងទឹកទី២ របស់ហែម ថង កំពុងរុញឲ្យយុគ យក្សផ្លែ រអិលចូលក្នុងបញ្ជីជាកីឡាករស្ទុះឡើងកូដ ។ ក្រុមអ្នកទស្សនានិយាយថា បើយុគ យក្សផ្លែ ចេះថែរក្សាសមត្ថភាព និងកម្លាំងឲ្យល្អបានយូរ នោះភាពល្បីល្បាញរបស់កីឡាកររូបនេះ ពិតជាខ្ទរខ្ទារមិនចាញ់យុគ យក្សផ្លែ នោះឡើយ បើធៀបនឹងរយៈពេលយុគ យក្សផ្លែ ឡើងកូដខ្លាំង។
ម្នាក់ៗចាំមើលថា កីឡាកររូបនេះ អាចស្វែងរកជនទី១១ ឲ្យសន្លប់ក្រោមដៃរបស់ខ្លួនបាន ឬមិនបាន ក្នុងការប្រកួតលើកក្រោយ ដើម្បីឲ្យជាប់ពាក្យថា អ្នកណាឡើងរេញជាមួយ ក៏ឆ្លងមិនផុត៥ទឹក ផ្ទួនៗគ្នានោះ ៕
ចែករំលែកព័តមាននេះ