ខេត្តស្ទឹងត្រែង ៖ ខេត្តស្ទឹងត្រែងបានរំលេចដោយទេសចរណ៍ធម្មជាតិ និងវប្បធម៌ប្រពៃណីជនជាតិដើមភាគតិច ទាក់ទាញភ្ញៀវមកទស្សនាកម្សាន្ត នៅក្នុងពិធីបុណ្យអុំទូក អកអំបុក សំពះព្រះខែ បានជាង៤ម៉ឺននាក់ ក្នុងនោះ…
ខេត្តស្ទឹងត្រែង ៖ ខេត្តស្ទឹងត្រែងបានរំលេចដោយទេសចរណ៍ធម្មជាតិ និងវប្បធម៌ប្រពៃណីជនជាតិដើមភាគតិច ទាក់ទាញភ្ញៀវមកទស្សនាកម្សាន្ត នៅក្នុងពិធីបុណ្យអុំទូក អកអំបុក សំពះព្រះខែ បានជាង៤ម៉ឺននាក់ ក្នុងនោះ អ្វីជាទីចាប់អារម្មណ៍សំម្រាប់ការកម្សាន្តសប្បាយ គឺទស្សនាពិធីប្រណាំងទូកង ដែលរៀបចំឡើងដោយរដ្ឋបាល ខេត្តស្ទឹងត្រែង។ លោក អន ប៉ាវសឿន ប្រធានមន្ទីរទេសចរណ៍ខេត្តបានឱ្យដឹងថា ពីថ្ងៃទី១៨ ដល់ថ្ងៃទី២០ វិច្ឆិកា មានអ្នកមកលេងកម្សាន្តចំនួន៤០.៥០០នាក់ ហើយខេត្តស្ទឹងត្រែងបានបន្តប្រារព្ធអបអរព្រះរាជពិធី អុំទូក អកអំបុក សំពះព្រះខែ រយៈពេល៣ថ្ងៃទៀត គឺពីថ្ងៃទី២១ ដល់២៣ វិច្ឆិកា ឆ្នាំ២០១៨នេះ មានភ្ញៀវទេសចរណ៍ ហូរចូលជាង៣.០០០នាក់ទៀត កំណើន១៩.៩៩ភាគរយ បើធៀបឆ្នាំ២០១៧។
ដែលទេសចរណ៍ទាំងនោះ បានបន្តដំណើរកម្សាន្ត តាមរមណីដ្ឋានដូចជារមណីដ្ឋានទឹកធ្លាក់ព្រះនិម្មិត, អូរឫស្សីកណ្តាល បណ្តុំកោះនានា នៅដងទន្លេ មេគង្គ សេកុង និងសេសាន។ លោក អន ប៉ោសឿន ប្រធានមន្ទីរទេសចរណ៍ខេត្តបានលើកឡើងថា៖ ខេត្តស្ទឹងត្រែង ជាខេត្តមួយដែលស្ថិតនៅភូមិភាគឦសាន្ត ដែលមានចម្ងាយប្រមាណជា៤៥៥គីឡូម៉ែត្រ ពីរាជធានីភ្នំពេញ ខេត្តស្ទឹងត្រែងមានទេសភាពយ៉ាងស្រស់ត្រកាល មានសក្តានុពលទេសចរ សំបូរបែប ជាពិសេសមាន ទន្លេចំនួន៤ ទន្លេសេសាន ទន្លេមេគង្គ ទន្លេសេកុង និងទន្លេស្រែពក ជាលក្ខណៈពិសេសរបស់ខេត្ត និងសំបូរទៅដោយព្រៃលិចទឹក ព្រៃឈើ ផ្សោតមេគង្គ កោះតូចៗនៅតាមទន្លេ ពិសេសតំបន់រ៉ាំសា ដែលជាប្រភពនៃមច្ឆាជាតិ សម្រាប់ពងកូននៅរដូវវស្សា និងមានភ្នំឧទ្យានជាតិវរៈជ័យ និងមានទឹកជ្រោះជាដើម និងមានសក្តានុពលទេសចរណ៍ ផ្នែកវប្បធម៌ ទំនៀមទម្លាប់ប្រពៃណី សាសនា និងជនជាតិ ភាគតិចជាច្រើនថែមទៀត។
លោកប្រធានមន្ទីរបានបន្តទៀតថា៖ នៅក្នុង៩ខែ ដើមឆ្នាំ២០១៨នេះ ខេត្តស្ទឹងត្រែងទទួលបាន ភ្ញៀវជាតិ និងអន្តរជាតិសរុបទាំងអស់ដែលមកលេងកម្សាន្តមានចំនួន ២១៩.២៨០នាក់ ហើយការងារបន្តប្ដេជ្ញា រៀបចំរមណីដ្ឋានបន្ថែមទៀត មានសុវត្ថិភាពសន្តិសុខ សេវាកម្មល្អ ដើម្បីទាញភ្ញៀវទេស ចរមកកម្សាន្តឱ្យកាន់តែច្រើន។ លោក ដួង ពៅ អភិបាលរងខេត្ត បានមានប្រសាសន៍ លើកឡើងថា៖ ទោះជានៅក្នុង៩ខែ ដើមឆ្នាំ២០១៨ ទទួលបានភ្ញៀវជាង២០ម៉ឺនក៏ដោយ តែវាមិនគ្រប់នៅឡើយទេ ដោយដំណាក់កាលបន្ត និងខិតខំប្រឹងប្រែងឱ្យខេត្តស្ទឹងត្រែងក្លាយជាតំបន់ទេសចរណ៍ គោលដៅទី៤ ជាការរួមចំណែកអភិវឌ្ឍន៍សេដ្ឋកិច្ចតាមរយៈឧស្សាហកម្មគ្មានផ្សែងនេះ ដែលក្នុង១ឆ្នាំៗយើងទទួលបានប្រាក់ចំណូលពីវិស័យទេសចរណ៍ច្រើន ដោយគ្រាន់តែប្រជាពលរដ្ឋ និងមន្ត្រីទាំងអស់ចូលរួមចំណែកសម្អាត អនាម័យបរិស្ថាន សម្អាតលំនៅឋាន មានផាសុកភាពសម្រាប់ដំណើរកម្សាន្ត ក៏ដូចជាផ្តល់សេចក្តីសុខផ្នែកផ្លូវចិត្ត នោះភ្លៀវទេសចរណ៍ និងហូរចូលច្រើននៅខេត្តស្ទឹងត្រែង៕
