រាជធានីភ្នំពេញ ៖ មន្ដ្រីយោធាម្នាក់បើករថយន្ដ ពាក់ស្លាកលេខខេមរភូមិន្ទ 01-2-1502 ទាំងស្រវឹងជោកជាំក្នុងល្បឿនលឿនគេចម៉ូតូមួយគ្រឿង ក៏ជ្រុលទៅបុកក្បាលរបាំងថ្មចែកទ្រូងផ្លូវបាក់អស់២កង់ នៅតាមបណ្ដោយមហាវិថីព្រះមុនីវង្ស ជិតក្រសួងសង្គមកិច្ច ក្នុងសង្កាត់បឹងត្របែក ខណ្ឌចំការមន កាលពីវេលាម៉ោង៧និង២០នាទីយប់ថ្ងៃទី១៧ មិថុនា ។
មន្ដ្រីប៉ូលិសអន្ដរាគមន៍នៅកន្លែងកើតហេតុឱ្យដឹងថា មន្ដ្រីយោធាឈ្មោះ ងួន សំបូរ បើករថយន្ដម៉ាកស្ដាដា ពណ៌ត្រេអីុ ពាក់ស្លាកលេខ ខេមរភូមិន្ទ 01-2-1502 ធ្វើដំណើរតាមមហាវិថីព្រះមុនីវង្សក្នុងទិសដៅពីជើងទៅត្បូង ខណៈមកដល់ចំណុចកើតហេតុបានគេចម៉ូតូមួយគ្រឿង ក៏ជ្រុលចង្កូតទៅបុកក្បាលរបាំងថ្មចែកទ្រូងផ្លូវពេញទំហឹង បណ្ដាលឱ្យបាក់អស់២កង់ ហើយរថយន្ដបែកកង់ខាងមុខព្យាយាមបើករត់បានប្រហែល៥០ម៉ែត្រ ទើបទៅមុខលែងរួច ។
លោក ងួន សំបូរ ជាអ្នកបើករថយន្ដឱ្យដឹងថា រូបគាត់ចេញពីផឹកស៊ីជាមួយមិត្ដភក្ដិនៅកន្លែងធ្វើការ ហើយបើករថយន្ដមកលំនៅឋាន តែពេលមកដល់កន្លែងកើតហេតុ បានគេចម៉ូតូមួយគ្រឿង ក៏ជ្រុលល្បឿនបុកក្បាលរបាំងថ្មទាំងកម្រោលតែម្ដង ។ មន្ដ្រីប៉ូលិសចរាចរខណ្ឌចំការមន និងប៉ុស្ដិ៍បឹងត្របែកចុះមកអន្ដរាគមន៍វាស់វែងរួចស្ទូចរថយន្ដ និងឃាត់ខ្លួនអ្នកបើកបរយកទៅការិយាល័យចរាចរណ៍ជើងគោករាជធានីភ្នំពេញ៕
ចែករំលែកព័តមាននេះ