រាជធានីភ្នំពេញ ៖ ស្ត្រីម្នាក់ចេញពីហាងខារ៉ាអូខេបើករថយន្តថយក្រោយជ្រុលទៅបុករះអាជីវករលក់ដូរនៅផ្សារនាគមាស បណ្តាលឱ្យស្រីម្នាក់របួសធ្ងន់ និងបុរសម្នាក់របួសស្រាល ។ ហេតុការណ៍ខាងលើនេះបានកើតឡើងកាលពីវេលាម៉ោង១០យប់ ថ្ងៃទី២៧ ខែវិច្ឆិកា ឆ្នាំ២០២៥…
រាជធានីភ្នំពេញ ៖ ស្ត្រីម្នាក់ចេញពីហាងខារ៉ាអូខេបើករថយន្តថយក្រោយជ្រុលទៅបុករះអាជីវករលក់ដូរនៅផ្សារនាគមាស បណ្តាលឱ្យស្រីម្នាក់របួសធ្ងន់ និងបុរសម្នាក់របួសស្រាល ។
ហេតុការណ៍ខាងលើនេះបានកើតឡើងកាលពីវេលាម៉ោង១០យប់ ថ្ងៃទី២៧ ខែវិច្ឆិកា ឆ្នាំ២០២៥ លើកំណាត់ផ្លូវលេខ២៣០ នៅទល់មុខហាងដាប់ប៊ែលយូ ខេធីវី ស្ថិតនៅក្បែរផ្សារនាគមាស សង្កាត់ផ្សារដើមគ ខណ្ឌទួលគោក រាជធានីភ្នំពេញ ។
តាមប្រភពពីអ្នកលក់ដូរនៅកន្លែងកើតហេតុបានឲ្យដឹងថា មុនពេលកើតហេតុ គេឃើញមានមនុស្សប្រុសស្រីចេញពី ខេធីវីមួយកន្លែងខាងលើ និងឡើងជិះរថយន្តមួយគ្រឿង FORD EVEREST ពណ៌ស ពាក់ផ្លាកលេខ ភ្នំពេញ 2AT-8209 អ្នកបើកជាមនុស្សស្រី ។ លុះពេលបើករថយន្តថយក្រោយ ក៏ជ្រុលចង្កូតបុករះរ៉ឺម៉កលក់ផ្លែឈើ និងម៉ូតូ រួមទាំងកង់បីឥណ្ឌាចំនួន២គ្រឿងទៀតបង្កការខូចខាត និងជ្រុះផ្លែឈើរាយប៉ាយលើថ្នល់ ចំណែករថយន្តមិនទាន់អស់ល្បឿន ក៏រុញកង់បីឥណ្ឌាទៅបុកធ្លាយជញ្ចាំងសង្កសីរបងអតីតមជ្ឈមណ្ឌលម៉ុងឌីយ៉ាល់ថែមទៀត ។
អ្នកឃើញហេតុការណ៍បានបន្តថា នៅក្នុងហេតុការគ្រោះថ្នាក់ចរាចរណ៍នេះ បង្កអោយមានមនុស្សរងរបួសធ្ងន់ស្រាល២នាក់ ក្នុងនោះមានស្ត្រីម្នាក់ជិះម៉ូតូស្កូពី ពណ៌ក្រហម កំពុងឈប់ទិញផ្លែឈើ ត្រូវរថយន្តបង្កថយបុកអោយរបួសធ្ងន់ ត្រូវបងប្អូនបញ្ជូនទៅមន្ទីរពេទ្យ ចំណែកបុរសម្នាក់ទៀត ជាអ្នកបើករ៉ឺម៉កដឹកផ្លែមៀន ត្រូវរថយន្តថយបុករងរបួសស្រាល ។
ក្រោយកើតហេតុ សមត្ថកិច្ចមូលដ្ឋានបានទាក់ទងទៅកាន់សមត្ថកិច្ចជំនាញចរាចរណ៍ ដើម្បីចុះមកធ្វើការវាស់វែង និងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់រថយន្តចូលខ្លួនទៅដោះស្រាយតាមនីតិវិធីនៅពេលក្រោយ ៕
ចែករំលែកព័តមាននេះ