ទីក្រុងតេអេរ៉ង់៖ អគ្គមគ្គុទ្ទេសក៍អ៊ីរ៉ង់ លោកអាយ៉ាតូឡា អាលី ខាមេនី (Ayatollah Ali Khamenei) បាននិយាយវាយប្រហារលោកត្រាំយ៉ាងចាស់ដៃដោយចាត់ទុកថាលោកត្រាំជាឧក្រិដ្ឋជនម្នាក់ដែលប្រកាសគាំទ្រចលនាបាតុកម្មប្រឆាំងរដ្ឋាភិបាល។ អគ្គមគ្គុទ្ទេសក៍រូបនេះក៏បានដាក់ការស្ដីបន្ទោសទៅលើក្រុមបាតុករផងដែរដែលបង្កការបះបោរនាំទៅដល់ការស្លាប់មនុស្សរាប់ពាន់នាក់។…
ទីក្រុងតេអេរ៉ង់៖ អគ្គមគ្គុទ្ទេសក៍អ៊ីរ៉ង់ លោកអាយ៉ាតូឡា អាលី ខាមេនី (Ayatollah Ali Khamenei) បាននិយាយវាយប្រហារលោកត្រាំយ៉ាងចាស់ដៃដោយចាត់ទុកថាលោកត្រាំជាឧក្រិដ្ឋជនម្នាក់ដែលប្រកាសគាំទ្រចលនាបាតុកម្មប្រឆាំងរដ្ឋាភិបាល។ អគ្គមគ្គុទ្ទេសក៍រូបនេះក៏បានដាក់ការស្ដីបន្ទោសទៅលើក្រុមបាតុករផងដែរដែលបង្កការបះបោរនាំទៅដល់ការស្លាប់មនុស្សរាប់ពាន់នាក់។
នៅក្នុងការថ្លែងសុន្ទរកថាតាមទូរទស្សន៍របស់រដ្ឋអ៊ីរ៉ង់ អគ្គមគ្គុទ្ទេសក៍រូបនេះចាត់ទុកចលនាបាតុកម្មដែលបានកើតឡើងទូទាំងប្រទេសអ៊ីរ៉ង់នោះបានបន្សល់ទុកសាកសពមនុស្សស្លាប់រាប់ពាន់នាក់។ ពាក្យសម្ដីនេះជាការទទួលស្គាល់ថាពិតជាមានមនុស្សស្លាប់ដោយសារបាតុកម្មយ៉ាងច្រើនសន្ធឹកសន្ធាប់ដូចអ្វីដែលក្រុមអ្នកសង្កេតការណ៍បានអះអាងមែន។
លោកខាមេនីថ្លែងថានៅក្នុងអំពើបះបោរនេះ លោកត្រាំបានប្រកាសដោយផ្ទាល់មាត់របស់គាត់ និងនិយាយញុះញង់ឱ្យប្រជាជនអ៊ីរ៉ង់ងើបបះបោរឱ្យមានភាពវឹកវរដល់សន្តិសុខសង្គម។ គាត់ (លោកត្រាំ) ប្រកាសថាអាមេរិកនឹងគាំទ្រពួកបាតុករ ហើយត្រៀមធ្វើអន្តរាគមន៍យោធានៅអ៊ីរ៉ង់ថែមទៀត។ លោកខាមេនីចោទប្រកាន់ថាអាមេរិកចង់គ្រប់គ្រងសេដ្ឋកិច្ច និងនយោបាយរបស់អ៊ីរ៉ង់។
លោកថ្លែងបន្តទៀតថាយើងចាត់ទុកប្រធានាធិបតីអាមេរិកជាឧក្រិដ្ឋជនដោយសារអត្រាស្លាប់មនុស្ស និងការខូចខាតទ្រព្យសម្បត្តិមានច្រើនសន្ធឹកសន្ធាប់ និងដោយសារប្រទេសអ៊ីរ៉ង់ត្រូវរងការចោទប្រកាន់ទាំងអយុត្តិធម៌។ លោកខាមេនីចាត់ទុកក្រុមបាតុករជា «ទាហានជើងគោក» របស់អាមេរិក។ ពួកគេបំផ្លិចបំផ្លាញវិហារឥស្លាម និងគ្រឹះស្ថានអប់រំជាច្រើនកន្លែង។
អគ្គមគ្គុទ្ទេសក៍អ៊ីរ៉ង់ថ្លែងដូច្នេះមួយថ្ងៃបន្ទាប់ពីលោកត្រាំទើបតែបង្អន់វោហារសាស្ត្ររបស់លោកកាលពីម្សិលមិញ។ លោកត្រាំថ្លែងថាអ៊ីរ៉ង់បានលុបចោលគម្រោងប្រហារជីវិតអ្នកជាប់ឃុំជាង៨រយនាក់ដោយព្យូរកពួកគេនឹងខ្សែពួរ។ ដូច្នេះលោកយល់ថានេះជាសញ្ញាវិជ្ជមាន។ លោកត្រាំថាលោកសូមវាយតម្លៃខ្ពស់ចំពោះការសម្រេចចិត្តនេះ។ មានន័យថាការដែលលោកប្រកាសថានឹងធ្វើអន្តរាគមន៍ជួយហ្វូងបាតុករនោះត្រូវលោកលេបពាក្យសម្ដីនេះវិញហើយ៕ ប្រភព៖ អេភី (AP) និងប្រភពដទៃទៀត
ចែករំលែកព័តមាននេះ