ខេត្តព្រះសីហនុ ៖ ជនសង្សយ័២នាក់ដែលពាក់ពន្ធ័នឹងអំពើចោរកម្មលួចទ្រព្យសម្បត្តិរបស់ប្រជាពលរដ្ឋ ត្រូវបាននគរបាលស្រុកព្រៃនប់ស្រាវជ្រាវរកឃើញនិងបង្ក្រាបបានហើយ កាលពីវេលាម៉ោងជិត៥ល្ងាចថ្ងៃទី២៤ វិច្ឆិកា ឆ្នាំ២០១៨នេះ នៅចំណុចផ្លូវរថភ្លើងខាងក្រោយផ្សារវាលរេញ។
របាយការណ៍ពីនគរបាលបញ្ជាក់ថា នៅចន្លោះវេលាម៉ោង១១យប់កាលថ្ងៃទី២១ ខែវិច្ឆិកា ឆ្នាំ២០១៨ រហូតដល់ម៉ោង៥ព្រឹកថ្ងៃទី២២ វិច្ឆិកា ឆ្នាំ២០១៨ នៅចំណុចភូមិបឹងវែង ឃុំវាលរេញ ស្រុកព្រៃនប់ ខេត្តព្រះសីហនុ មានករណីលួចបានកើតឡើងដែលបង្កដោយជនសង្ស័យឈ្មោះ ស៊ឹម សំណាង ភេទប្រុស អាយុ៣១ឆ្នាំ មុខរបរមិនពិតប្រាកដ មានទីលំនៅភូមិបឹងវែង ឃុំវាលរេញ ស្រុកព្រៃនប់ ខេត្តព្រះសីហនុ បានធ្វើសកម្ម
ភាពលួចលុយចំនួន៧៥០០ដុល្លារ លុយខ្មែរចំនួន២លានរៀល ទូរស័ព្ទដៃម៉ាក Iphone x មួយគ្រឿង ទូរសព្ទ័ដៃម៉ាកហូវៃ មួយគ្រឿង ទូរសព្ទ័ដៃម៉ាកធូហ្គើរ មួយគ្រឿង និងអត្តសញ្ញាណប័ណ្ណមួយសន្លឹកជារបស់ជនរងគ្រោះឈ្មោះ ស៊ុន រតនា ភេទប្រុស អាយុ៣៣ឆ្នាំ មុខរមរលក់ដូរ មានទីលំនៅចំណុចកើតហេតុ។
ក្រោយពេលធ្វើសកម្មភាពលួចបានហើយ ឈ្មោះ ស៊ឹម សំណាង បានប្រើឲ្យឈ្មោះ កែវ ភារម្យ ភេទប្រុស អាយុ១៨ឆ្នាំ មុខរបរកម្មករសំណង់ មានទីលំនៅភូមិបឹងវែង ឃុំវាលរេញ ស្រុកព្រៃនប់ ខេត្តព្រះសីហនុ យកទូរសព្ទ័ Iphone x ទៅលក់នៅផ្សារស្មាច់ដែង ឃុំរាម ហើយក៏ត្រូវបានម្ចាស់ទូរសព្ទ័ដឹង និងបានរាយការណ៍ដាក់ពាក្យបណ្តឹងមកកាន់សមត្ថកិច្ច។
បច្ចុប្បន្នជនសង្សយ័ទាំងពីរនាក់ ត្រូវបាននគរបាលកំពុងសាកសួរ និងកសាងសំណុំរឿងបញ្ជូនទៅផ្តន្ទាទោសតាមច្បាប់៕
ចែករំលែកព័តមាននេះ