រាជធានីភ្នំពេញ ៖ ការប្រកួតលើកទី២ រវាងកីឡាករសងសឹកពីរគូនៅសង្វៀនបឹងស្នោ កាលពីថ្ងៃអាទិត្យបានបង្ហាញលទ្ធផលដូចការគ្រោងទុកមែនថា កីឡាករដែលធ្លាប់ចាញ់កាលពីលើកមុនបានក្លាយជាអ្នកឈ្នះវិញម្តង ។ កីឡាករ ផាន់ គ្រាន់ ដែលធ្លាប់ចាញ់កីឡាករ សារឿន ចាន់ និងកីឡាករ ចាន់ ស៊ីណាត ដែលធ្លាប់ចាញ់កីឡាករ ស៊ឹម ប៊ុនឆៃ បានទទួលជោគជ័យគួរឱ្យសរសើរក្នុងផែនការសងសឹក
រាជធានីភ្នំពេញ ៖ ការប្រកួតលើកទី២ រវាងកីឡាករសងសឹកពីរគូនៅសង្វៀនបឹងស្នោ កាលពីថ្ងៃអាទិត្យបានបង្ហាញលទ្ធផលដូចការគ្រោងទុកមែនថា កីឡាករដែលធ្លាប់ចាញ់កាលពីលើកមុនបានក្លាយជាអ្នកឈ្នះវិញម្តង ។ កីឡាករ ផាន់ គ្រាន់ ដែលធ្លាប់ចាញ់កីឡាករ សារឿន ចាន់ និងកីឡាករ ចាន់ ស៊ីណាត ដែលធ្លាប់ចាញ់កីឡាករ ស៊ឹម ប៊ុនឆៃ បានទទួលជោគជ័យគួរឱ្យសរសើរក្នុងផែនការសងសឹក បើទោះជាលទ្ធផលនោះស្ថិតក្នុងភាពប្រផិតប្រផើយខ្លះ ។
មានអ្នកដឹងច្រើនមកហើយថា កីឡាករ ផាន់ គ្រាន់ មកពីក្លិបព្រះខ័នរាជ និងកីឡាករ ចាន់ ស៊ីណាត មកពីក្លិបនិរោធន៍មានជ័យ ធ្លាប់អាម៉ាស់មុខក្រោមដៃកីឡាករ សារឿន ចាន់ មកពីក្លិបសម្រែករាជសីហ៍បង្ក្រាបគ្រឿងញៀន និងកីឡាករ ស៊ឹម ប៊ុនឆៃ មកពីក្លិបព្រៃទទឹងខេត្តបាត់ដំបង ។ យោងតាមប្រវត្តិចាស់នេះ ទើបម្នាក់ៗមានផ្តល់សម្រែកហ៊ោកញ្ជ្រៀវគួរសម បន្ទាប់ពីកីឡាករដែលធ្លាប់ចាញ់កាលពីពេលមុនអាចបញ្ចេញស្នៀតវាយសម្រុក ហើយទទួលបានជោគជ័យលើដៃគូចាស់ព្រមគ្នាវិញ ។
ក្រឡេកមើលគូប្រកួតរវាងកីឡាករ ស៊ឹម ប៊ុនឆៃ និងកីឡាករ ចាន់ ស៊ីណាត គេឃើញថា គ្រាន់តែដើមទឹកចូលមកដល់ភ្លាម កីឡាករ ចាន់ ស៊ីណាត ដែលលាក់ទុកឆន្ទៈសងសឹកនោះបានស្ទុះចូលវាយ និងទាត់មិនដកដៃ-ជើងឡើយ ដើម្បីសម្រេចគោលដៅ ។ ទាំងដៃ ទាំងជើងកីឡាកររូបនេះហាក់មិនទុកឱ្យទំនេរសោះ ទើបជំរុញឱ្យការប្រកួតរបស់គូនេះក្លាយជាផ្លេកបន្ទោរបែកផ្កាភ្លើង បន្ទាប់ពីកីឡាករ ស៊ឹម ប៊ុនឆៃ វាយបកវិញ។ ទោះយ៉ាងណា កីឡាករ ចាន់ ស៊ីណាត នៅតែអាចសងសឹកដូចការគ្រោងទុក បន្ទាប់ពីត្រូវគណៈកម្មការប្រកាសឱ្យឈ្នះពិន្ទុស្របតាមសំឡេងភាគច្រើននៅវគ្គចុងក្រោយ ។
ចំពោះគូសងសឹកទី២វិញ ជើងខ្លាំងវ័យក្មេងបង្គោលក្រហម ផាន់ គ្រាន់ ដ្បិតថាមិនសូវស៊ីដាច់ដូចកីឡាករ ចាន់ ស៊ីណាត ដែលជាគូសងសឹកទី១ ប៉ុន្តែសមត្ថភាពរបស់គេក៏ធ្វើឱ្យម្នាក់ៗកោតសរសើរផងដែរ ។ ឈានដល់ទឹកទី២ និងទី៣ កីឡាករ សារឿន ចាន់ ដែលទំនងភ័យខ្លួនខ្លាចគូប្រកួតសងសឹកបានសម្រេច បានបោះពួយកណ្តាប់ដៃ កែង និងរន្ទះជើងផ្ទួនៗ ប៉ុន្តែនៅតែធ្វើកីឡាករ ផាន់ គ្រាន់ មិនបែកដូចពេលដែលលោកជួបប្រកួតជាមួយកាលពីលើកមុន ។ នៅ ទឹកទី៤ និងទី៥ ឱកាសវាយលុករបស់ ផាន់ គ្រាន់ កាន់តែមានសន្ទុះល្អជាងដើមទី បើទោះជាគេបានទទួលកណ្តាប់ដៃ កែង និងជង្គង់របស់កីឡាករ សារឿន ចាន់ ស្ទើរត្រដាបត្រដួសម្តងៗក៏ដោយ ។
រវាងគូនេះមិនត្រឹមតែអ្នកទស្សនានោះទេដែលសម្តែងការអបអរ និងស្រែកហ៊ោកញ្ជ្រៀវ សូម្បីតែកីឡាករ ផាន់ គ្រាន់ ខ្លួនឯងក៏លោតស្ទើរហោះដូចគ្នានៅពេលមានការប្រកាសថា លោកគឺជាអ្នកឈ្នះពិន្ទុលើកីឡាករ សារឿន ចាន់ ។ អ្នកទស្សនាគ្រប់គ្នាលើកឡើងថា វាមិនមែនជារឿងចៃដន្យទេដែលកីឡាករ ផាន់ គ្រាន់ និង ចាន់ ស៊ីណាត អាចស្វែងរកលទ្ធផលសងសឹកបានសម្រេចដូចគ្នា ដែលនេះគឺបណ្តាលមកពីពួកគេប្រឹងប្រែងហ្វឹកហាត់មុនឡើងរេញ ហើយវាយសម្រុកបានល្អលើគូប្រកួត ៕
ចែករំលែកព័តមាននេះ