ខេត្ដកំពង់ធំ ៖ កាលពីព្រឹកថ្ងៃទី១២ មិថុនា កន្លងមក នៅសាលាសង្កាត់ព្រៃតាហ៊ូ ក្រុងស្ទឹងសែន មានរៀបចំវេទិកាសាធារណៈស្ដីពីគោលនយោបាយភូមិ-ឃុំមានសុវត្ថិភាព ក្រោមអធិបតីភាពលោក ឡុង ផល អនុរដ្ឋលេខាធិការក្រសួងមហាផ្ទៃ និងជាប្រធានស្ដីទីក្រុមការងារទី១២ចុះជួយខេត្ដកំពង់ធំ ។ ចូលរួមក្នុងឱកាសនោះមានលោក សុខ លូ អភិបាលរងខេត្ដ និងលោក ហុក វិន អភិបាល
ខេត្ដកំពង់ធំ ៖ កាលពីព្រឹកថ្ងៃទី១២ មិថុនា កន្លងមក នៅសាលាសង្កាត់ព្រៃតាហ៊ូ ក្រុងស្ទឹងសែន មានរៀបចំវេទិកាសាធារណៈស្ដីពីគោលនយោបាយភូមិ-ឃុំមានសុវត្ថិភាព ក្រោមអធិបតីភាពលោក ឡុង ផល អនុរដ្ឋលេខាធិការក្រសួងមហាផ្ទៃ និងជាប្រធានស្ដីទីក្រុមការងារទី១២ចុះជួយខេត្ដកំពង់ធំ ។ ចូលរួមក្នុងឱកាសនោះមានលោក សុខ លូ អភិបាលរងខេត្ដ និងលោក ហុក វិន អភិបាលក្រុងស្ទឹងសែន និងប្រជាពលរដ្ឋយ៉ាងច្រើនកុះករ ។
ឮលោក ផៃ ឈុនអេង ចៅសង្កាត់ព្រៃតាហ៊ូបានអានរបាយការណ៍នៃការចាត់តាំងអនុវត្ដគោលនយោបាយភូមិ-ឃុំមានសុវត្ថិភាព គិតចាប់ពីថ្ងៃទី១០ វិច្ឆិកា ឆ្នាំ ២០១២ ដល់ថ្ងៃទី១០ ឧសភា ឆ្នាំ២០១៣ ។ តាមរបាយការណ៍ឱ្យដឹងថា សង្កាត់ព្រៃតាហ៊ូ មាន៣ភូមិ ស្មើ៦៩ក្រុម មាន១.៤៩១គ្រួសារ មានប្រជាពលរដ្ឋចំនួន៦.០០៦នាក់ (ប្រុស៣.០០៨នាក់ )និងបានផ្សព្វផ្សាយគោលនយោបាយភូមិ-ឃុំមានសុវត្ថិភាពទាំង៩យ៉ាងបានចំនួន៩៨លើកមកហើយ ដោយមានប្រជាពលរដ្ឋចូលរួមចំនួន១១.៦៣០នាក់ ។ ពួកគាត់បានយល់ដឹងពីល្បិចកលថ្មីៗរបស់ជនល្មើស ដែលតែងតែធ្វើសកម្មភាពនៅតាមទីប្រជុំជន ធ្វើឱ្យប៉ះពាល់សេចក្ដីសុខ សុវត្ថិភាព ។
លោក ញ៉ែម ឈុនលី អធិការនគរបាលក្រុងស្ទឹងសែន បានស្នើឱ្យប្រជាពលរដ្ឋចូលរួមសហការជាមួយអាជ្ញាធរ និងកម្លាំងសមត្ថកិច្ច ដើម្បីទប់ស្កាត់រាល់បទល្មើសទាំងឡាយណាដែលបម្រុងនឹងកើតឡើង សំដៅធ្វើឱ្យភូមិ-សង្កាត់ យើងមានសុវត្ថិភាពល្អ។ ក្នុងឱកាសនោះលោក ឡុង ផល មានប្រសាសន៍សំណេះសំណាលថា បើបងប្អូនប្រជាពលរដ្ឋមានសំណួរ សូមសរសេរដាក់ក្រដាស ហើយលោកនឹងបកស្រាយជូនរាល់ចម្ងល់ទាក់ទងទៅនឹងបញ្ហាផ្សេងៗ ។
ដើម្បីឱ្យភូមិ-ឃុំ មានសន្ដិសុខ និងសុវត្ថិភាពល្អប្រសើរឡើងបាន ទាល់តែប្រជាពលរដ្ឋចូលរួមចំណែកយ៉ាងសកម្ម ក្លាហានហ៊ានរាយការណ៍រាល់សកម្មភាពរបស់ជនសង្ស័យដែលបម្រុងធ្វើសកម្មភាពអ្វីមួយ ។ លោកក៏បានសំណូមពរឱ្យអាជ្ញាធរខេត្ដ ក្រុង សង្កាត់ អនុវត្ដឱ្យបានល្អនូវគោលនយោបាយភូមិ-ឃុំមានសុវត្ថិភាពទាំង៩យ៉ាង ធ្វើយ៉ាងណាឱ្យប្រជាពលរដ្ឋយើងរស់នៅប្រកបដោយសេចក្ដីសុខ និងសុវត្ថិភាព កុំឱ្យរស់នៅដោយភាពភ័យខ្លាច ៕
ចែករំលែកព័តមាននេះ