ខេត្តកំពង់ចាម ៖ បុរសម្នាក់បានយកកូនពូថៅទៅកាប់ខ្សែភ្លើងប្រដាប់បូមទឹករបស់គេ បណ្តាលឱ្យឆក់ខ្លួនឯងស្លាប់ភ្លាមៗនៅនឹងកន្លែងតែម្តង ហើយនៅកន្លែងកើតហេតុនោះពុំមានមនុស្សរស់នៅទេ ក្រោយមកទើបមានគេប្រទះឃើញក៏រាយការណ៍ប្រាប់សមត្ថកិច្ច ទើបបង្កឱ្យមានការភ្ញាក់ផ្អើលកាលពីម៉ោង៥និង២០នាទីព្រឹក ថ្ងៃទី២០ វិច្ឆិកា ២០១៨ ស្ថិតក្នុងសង្កាត់វាលវង់ ក្រុងកំពង់ចាម។
បុរសរងគ្រោះខាងលើឈ្មោះ ថន ធី អាយុ៥០ឆ្នាំ នៅក្នុងដីលំនៅឋានមួយកន្លែងមិនមានមនុស្សរស់នៅ ស្ថិតក្នុងភូមិក្រឡា ឃុំអំពិល ស្រុកកំពង់សៀម ។ ក្នុងជំហានដំបូងគេមិនដឹងថា ការស្លាប់នោះដោយសារអ្វីច្បាស់លាស់ទេ រហូតដល់កម្លាំងនគរបាលបច្ចេកទេសខេត្តបានចុះមកពិនិត្យ។
បើតាមលោកវរសេនីយ៍ត្រី ពេជ្រ គឹមស៊ា អធិការរងនគរបាលស្រុកកំពង់សៀម ទទួលផែនព្រហ្មទណ្ឌប្រាប់ថា ក្រោយពីទទួលបានដំណឹងខាងលើ ដំបូងកម្លាំងប៉ុស្តិ៍រដ្ឋបាលឃុំអំពិល បានចុះទៅដល់កន្លែងកើតហេតុ ដោយបានហ៊ុមព័ទ្ធមិនអនុញ្ញាតឲ្យនរណាម្នាក់ចូលទៅក្នុងនោះឡើយ។ ហើយរូបលោកបានដឹកនាំកម្លាំងបច្ចេកទេសខេត្ត មានលោកវរសេនីយ៍ទោ ណោ ឌីណា បានធ្វើការត្រួតពិនិត្យសព។
លោកវរសេនីយ៍ត្រីប្រាប់បន្តថា ផ្នែកក្បាលរបស់សពមិនមានស្នាមអ្វីគួរឲ្យកត់សំគាល់ ឆ្អឹងជំនីខាងឆ្វេងមានស្នាមខ្លោចស្បែកមួយកន្លែង កំភួនដៃឆ្វេងមានស្នាមខ្លោច១កន្លែង រហូតដល់ខ្នងដៃ នៅជើងខាងឆ្វេងមានស្នាមខ្លោច២កន្លែង នៅជាប់នឹងដងខ្លួនសពមានខ្សែលួសជាប់នឹងសព ហើយមានខ្សែលួសតភ្ជាប់នឹងឌុយភ្លើងផងដែរ ។
លោកវរសេនីយ៍ត្រីប្រាប់បន្តទៀតថា បើតាមសកម្មភាពរបស់ជនរងគ្រោះមុនពេលស្លាប់បានយកកូនពូថៅ១ទៅកាប់ខ្សែភ្លើងផ្លុងស័រ (បូមទឹក) និងខ្សែលួសដែលដាក់បង្កប់នៅក្នុងគម្របផ្លុងស័រ ដែលមានចរន្តអគ្គិសនី ទើបជាហេតុបណ្តាលឲ្យឆក់ស្លាប់ ទើបសន្និដ្ឋានថា សពបុរសខាងលើពិតជាបានស្លាប់
ដោយសារឆក់ខ្សែភ្លើងពិតប្រាកដមែន ។ ក្រោយពីពិនិត្យសពរួចរាល់ សមត្ថកិច្ចបានប្រគល់សពឲ្យទៅ
សាច់ញាតិដែលមានផ្ទះនៅចម្ងាយពីកន្លែងកើតហេតុប្រមាណ៣០ម៉ែត្រ ដើម្បីធ្វើបុណ្យតាមប្រពៃណី។
លោកអធិការរងនគរបាលស្រុកកំពង់សៀមបញ្ជាក់ថា ត្រង់ទីតាំងកើតហេតុនេះ ជាដីកម្មសិទ្ធិរបស់ឈ្មោះ លី ខាំជួរ ភេទប្រុស អាយុ៥៣ឆ្នាំ រស់នៅសង្កាត់វាលវង់ ក្រុងកំពង់ចាម ។ ចំពោះមូលហេតុដែលរបស់ជនរងគ្រោះខាងលើ គឺបានយកកូនពូថៅទៅកាប់ខ្សែភ្លើងប្រដាប់បូមទឹករបស់គេ មិនដឹងថា មកពីមូលហេតុអ្វីច្បាស់លាស់នូវឡើយ ដោយកម្លាំងសមត្ថកិច្ចកំពុងតែធ្វើការសង្កេតបន្តទៀត ហើយត្រង់ចំណុចកើតហេតុនេះមិនមានមនុស្សរស់នៅទេ៕
ចែករំលែកព័តមាននេះ