ខេត្តកំពង់ស្ពឺ ៖ ប្តីកំពុងផឹកស្រា ប្រពន្ធទៅតាមមកហូបបាយ ស្រាប់តែដើរប៉ះអំពូលភ្លើងយកដៃចាប់កុំឱ្យយោល ចៃដន្យចំមុខដំណរឆក់ស្លាប់ភ្លាមៗមួយរំពេច កាលពីម៉ោង៦និង៣៩នាទីល្ងាច ថ្ងៃទី ១៩ ខែវិច្ឆិកា ឆ្នាំ២០១៨ នៅចំណុចអូរពន្លូវ ស្ថិតក្នុងភូមិអូរអង្គុំ ឃុំអមលាំង ស្រុកថ្ពង ខេត្តកំពង់ស្ពឺ។
ស្ត្រីរងគ្រោះខាងលើឈ្មោះ ចិន ធា អាយុ៣៧ឆ្នាំ ចំណែកប្តីដែលកំពុងផឹកស្រានៅលើតូបមុខផ្ទះឈ្មោះ សុត ទី អាយុ៤០ឆ្នាំ រស់នៅភូមិ-ឃុំកើតហេតុខាងលើ ។
បើតាមសមត្ថកិច្ចស្រង់សំដីបុរសជាប្តីបានឱ្យដឹងថា មុនពេលកើតហេតុ ស្ត្រីរងគ្រោះបានដើរមកហៅខ្លួនដែលកំពុង អង្គុយផឹកស្រានៅរោងខាងមុខផ្ទះ ពេលនោះខ្លួនបាននិយាយទៅកាន់ប្រពន្ធថា «ទៅមុនទៅ ចាំខ្ញុំទៅតាមក្រោយអីឡូហើយ»។ ពេលប្តីនិយាយចប់ ស្ត្រីរងគ្រោះក៏ប្រុងដើរវិលត្រឡប់មកផ្ទះវិញ ក៏បានទង្គិចក្បាលនឹងអំពូលភ្លើង ស្រាប់តែស្ត្រីរងគ្រោះយកដៃចាប់អំពូល ក្នុងបំណងទប់កុំឱ្យបែក ចៃដន្យអាក្រក់ក៏ចំខ្សែមានមុខដំណរឆក់ស្លាប់តែម្ដងទៅ ។ បុរសជាប្តីស្ត្រីរងគ្រោះបញ្ជាក់ថា គាត់ និងប្រពន្ធមានកូនចំនួន៤នាក់ ក្នុងស្រីម្នាក់ ក្នុងបន្ទុក។
បន្ទាប់ពីកើតហេតុ សមត្ថកិចបានចុះធ្វើកំណត់ហេតុ ដោយមានការទទួលស្គាល់ពីបុរសជាប្តីថា ប្រពន្ធខ្លួនពិតជាឆក់ខ្សែភ្លើងស្លាប់ពិតប្រាកដមែន ហើយក៏ប្រគល់សពស្ត្រីរងគ្រោះឱ្យបុរសជាប្តីរៀបចំធ្វើបុណ្យតាមប្រពៃណី៕
ចែករំលែកព័តមាននេះ