រាជធានីភ្នំពេញ ៖ ការប្រកួតប្រដាល់ក្បាច់គុនបុរាណខ្មែរនៅលើសង្វៀនស្ថានីយទូរទស្សន៍រាជធានីភ្នំពេញប៉ុស្តិ៍លេខ៣ កាលពីថ្ងៃសៅរ៍ ទី១៥ មិថុនាកន្លងមកនេះ ប្រជុំដោយកីឡាករខ្លាំងៗចំនួន៥គូឡើងមកសម្តែងឫទ្ធិដាក់គ្នាជូនទស្សនិកជនបានទស្សនាមិនឱ្យខកបំណងឡើយ ។ សម្រាប់ការប្រកួតនៅថ្ងៃនោះ គូប្រដាល់ដែលគេចាប់អារម្មណ៍ខ្លាំងជាងគេ
រាជធានីភ្នំពេញ ៖ ការប្រកួតប្រដាល់ក្បាច់គុនបុរាណខ្មែរនៅលើសង្វៀនស្ថានីយទូរទស្សន៍រាជធានីភ្នំពេញប៉ុស្តិ៍លេខ៣ កាលពីថ្ងៃសៅរ៍ ទី១៥ មិថុនាកន្លងមកនេះ ប្រជុំដោយកីឡាករខ្លាំងៗចំនួន៥គូឡើងមកសម្តែងឫទ្ធិដាក់គ្នាជូនទស្សនិកជនបានទស្សនាមិនឱ្យខកបំណងឡើយ ។ សម្រាប់ការប្រកួតនៅថ្ងៃនោះ គូប្រដាល់ដែលគេចាប់អារម្មណ៍ខ្លាំងជាងគេ គឺគូពិសេសទី៣ រវាងកីឡាករ ផន ប៊ុនម៉ៅ មកពីក្លិបបូរីរាជសីហ៍មានឫទ្ធិ និងកីឡាករ អ៊ុំ ចំរើន មកពីក្លិបតាឡីដំរីមានឫទ្ធិ ។
គូនេះវាយគ្នារបៀបស៊ីសាច់ហុតឈាមតាំងពីចាប់ផ្តើមទឹកទី១ ម៉្លេះ ដោយគេឃើញ អ៊ុំ ចំរើន វាយសម្រុកគ្មានប្រណីទៅលើ ផន ប៊ុនម៉ៅ ដោយប្រើកណ្តាប់ដៃម៉ាត់ចូលមុខពេញៗ និងប្រើជើងទាត់ល្វែងក្រោមដូចព្យុះបង្ខំឱ្យ ផន ប៊ុនម៉ៅ ដកថយ និងគេចចេញពី ការវាយប្រហារនេះទាំងត្រដាបត្រដួស និងវាយសងវិញបានមួយៗប៉ុណ្ណោះ ។ ទោះបីយ៉ាងណា ផន ប៊ុនម៉ៅ អត់ទ្រាំនឹងការឈឺចាប់ដែលកើតឡើងពីការវាយប្រហាររបស់គូប្រកួតបានត្រឹមតែ២ទឹកប៉ុណ្ណោះ លុះចូលដល់ទឹកទី៣ គេត្រូវ អ៊ុំ ចំរើន ទាត់ឱ្យខូចជើងឆ្វេងរហូតដល់ថ្នាក់ដួលក្រោកលែងរួចតែម្តង ។
ចំណែកគូឯកប្រចាំសប្តាហ៍ ក៏ទទួលបានការចាប់អារម្មណ៍ខ្លាំងណាស់ដែរនោះគឺជាការប្រកួតរវាងកីឡាករ ឡៅ ស៊ីណាត មកពីក្លិបទ័ពពិសេសឆត្រយោង៩១១ និងកីឡាករ ខុន ចាន់ថន មកពីក្លិបកងពលធំអន្តរាគមន៍លេខ៣ ព្រះវិហារ ។ គូនេះ ខុន ចាន់ថន ទទួលការពេបជ្រាយតាំងពីមុនការប្រកួតចាប់ផ្តើមម៉្លេះថា រូបគេពិតជាថ្លើមធំពេកហើយដែលហ៊ានណាត់ ឡៅ ស៊ីណាត សាកកម្លាំងគ្នានៅលើសង្វៀនបែបនេះ។ ខុន ចាន់ថន ដែលវាយអាងកម្លាំងសុទ្ធសាធនោះបានត្រឹមតែដើរចូលវាយយ៉ាងងងើល ភ្លេចការពារ ធ្វើឱ្យគូប្រកួតមានឱកាសវាយចូលស្ទើរដាច់ផ្ងារម្តងៗ ទោះបីយ៉ាងណា ឡៅ ស៊ីណាត ក៏មានការប្រុងប្រយ័ត្នចំពោះស្នៀតជើងរបស់ ខុន ចាន់ថន ដែលទាត់សម្រុកមកលើខ្លួនវិញដែរ។
ចាប់ពីទឹកទី១ ដល់ដើមទឹកទី៣ ខុន ចាន់ថន អាចតស៊ូជាមួយ ឡៅ ស៊ីណាត បានក្នុងលក្ខណៈប្រដំប្រសងគ្នា ប៉ុន្តែពេលឈានចូលដល់ពាក់កណ្តាលទឹកទី៣ ឡៅ ស៊ីណាត ចាប់ផ្តើមបើកការវាយសម្រុកកាន់តែខ្លាំងឡើង ដោយប្រើផ្លែជង្គង់របស់គេបុកចូលពោះទឹកពេញៗ បណ្តាលឱ្យ ខុន ចាន់ថន ដួលសន្លប់ក្រោកលែងរួចតែម្តង ។
ក្រៅពីគូចាប់អារម្មណ៍២គូនេះទៅនៅលើសង្វៀនដដែល កីឡាករ ហ៊ឹម សារ៉ាន់ មកពីសមាគមកីឡាប្រដាល់ក្រសួងការពារជាតិ យកឈ្នះកីឡាករ ពុទ្ធ ឆាយរិទ្ធី មកពីក្លិបពុទ្ធសេរីវង្សព្រែកតាទែនដោយពិន្ទុ ។ កីឡាករ ហ៊ុន ឈុនហេង មកពីក្លិបសម្រែករាជសីហ៍បង្ក្រាបគ្រឿងញៀន យកឈ្នះកីឡាករ ពេជ្រ ម្ទេសខ្មាំង មកពីក្លិបអារុណរះកីឡាដោយពិន្ទុ និងកីឡាករ ឈិត ង៉ុយ មកពីក្លិបអប្សរាក្បាច់គុនខ្មែរ ផ្តួលកីឡាករ ឡុង ប៊ុនហេង មកពីក្លិបសាលវ័ន្តកីឡាឱ្យលើកទង់ជ័យសសុំចុះចាញ់នៅត្រឹមទឹកទី៤ ៕
ចែករំលែកព័តមាននេះ