រាជធានីភ្នំពេញ ៖ រថយន្តម៉ាករ៉េងរ៉ូវ័រ (RANGE ROVER) ពណ៌ខ្មៅ ពាក់ស្លាកលេខខេមរភូមិន្ទ០២.២.៣៥១៧ មួយគ្រឿង ដែលគេអះអាងថា បើកបរដោយកូនប្រុសរបស់ឧកញ៉ាម្នាក់បើកដើរលេងលំហែកាយពេលរាត្រីជាមួយស្រីស្នេហ៍បានបោះពួយក្នុងល្បឿនលឿនទៅបុកដើមក្ងោកមួយដើមប៉ុនខ្លួនមនុស្សនៅចំណុចផ្លូវកោងពេញទំហឹង បណ្តាលឱ្យបាក់ជើងស្តាំទាំង២នាក់ ហើយរថយន្តផ្ទុះពោងទាំង២ស្រុញក្បាលជាប់ទៅមុខលែងរួចធ្វើឱ្យរញ្ជួយបាក់មែកក្ងោក២ធ្លាក់រាយប៉ាយមកដី ។
គ្រោះថ្នាក់ដ៏រន្ធត់នេះបានកើតឡើងកាលពីវេលាម៉ោង១និង៣០នាទីយប់ចូលថ្ងៃទី១៦ មិថុនា ២០១៣ នៅចំណុចមុខផ្ទះជួសជុលម៉ាស៊ីនត្រជាក់យីហោ «ហេងហុង» ស្ថិតនៅផ្ទះលេខ៧ ផ្លូវលេខ២៧១ ភូមិទី១៣ សង្កាត់ទឹកល្អក់ទី២ ខណ្ឌទួលគោក ។
អ្នកបើកបរដែលរងរបួសឈ្មោះសៀង សេងលីម ភេទប្រុស អាយុ២៩ឆ្នាំ ជាមន្ត្រីយោធាឋានៈអនុសេនីយ៍ឯក នៅទីចាត់ការការងារព្រំដែន ហើយត្រូវបានគេស្គាល់ថា ជាកូនឧកញ៉ាម្នាក់មានទីលំនៅតាមផ្លូវលេខ២៧៣ ក្នុងភូមិទួលគោក សង្កាត់ទួលសង្កែ ខណ្ឌឫស្សីកែវ បានរបួសបាក់ជើងស្តាំត្រូវបញ្ជូនទៅកាន់គ្លីនិកឯកជន ។ ចំណែកស្រីស្នេហ៍ឈ្មោះស្រីកា អាយុ២០ឆ្នាំ បានរងរបួសបាក់ជើងស្តាំដូចគ្នា ។
តាមសាក្សីបានឱ្យដឹងថា នៅមុនពេលកើតហេតុគេឃើញរថយន្តម៉ាករ៉េងរ៉ូវ័រ (RANGE ROVER) ពណ៌ខ្មៅ មានស្លាកលេខខេមរភូមិន្ទ ០២.២.៣៥១៧ មួយគ្រឿងខាងលើជិះ២នាក់ ស្ត្រីស្នេហ៍បានធ្វើដំណើរតាមបណ្តោយផ្លូវលេខ២៧១ ក្នុងទិសដៅពីត្បូងទៅជើង ដោយល្បឿនលឿន ។ នៅពេលធ្វើដំណើរមកដល់ផ្លូវកោងត្រង់ចំណុចផ្លូវបំបែកកែងវិថីឧកញ៉ាទេពផន ជិតដល់មន្ទីរពេទ្យព្រះកុសុមៈ ក៏ស្រាប់តែរថយន្តនោះមិនបានបត់តាមផ្លូវទេ ដោយល្បឿនលឿន ក៏ជ្រុលចង្កូតទៅខាងស្តាំដៃឡើងចិញ្ចើមផ្លូវទៅបុកបង្គោលស្លាកលក់អាគុយមុខផ្ទះលេខ5EO បាក់រាបដល់ដី ហើយជ្រុលទៅបុកដើមក្ងោក១ដើមប៉ុនខ្លួនមនុស្សចាស់ពេញទំហឹង បណ្តាលឱ្យរថយន្តកៀបជាប់នឹងដើមក្ងោកខ្ទេចមុខមួយកំណាត់ និងផ្ទុះពោងការពារសុវត្ថិភាពទាំង២ ហើយបាក់ធ្លាក់មែកក្ងោករាយពេញក្រោមដើម ។
តាមព័ត៌មានឱ្យដឹងទៀតថា នៅយប់នោះគេបានឮសំឡេងដូចរន្ទះធ្វើឱ្យប្រជាពលរដ្ឋក្បែរនោះភ្ញាក់ក្រញ៉ងពីដំណេក ហើយភ្លាមនោះគេឃើញបុរសម្នាក់ជាមន្ត្រីយោធាដែលជាកូនឧកញ៉ាម្នាក់ និងស្ត្រីវ័យក្មេងម្នាក់ដែលគេអះអាងថាជាសង្សារនឹងគ្នាបានបាក់ជើង ស្រវាចេញពីរថយន្តដោយមានប្រជាពលរដ្ឋនាំគ្នាគ្រាចេញ ហើយបានបញ្ជូនទៅកាន់មន្ទីរពេទ្យឯកជន ។ ភ្លាមៗនោះគេឃើញលោកសាំង សុភៈវិចិត្រ អភិបាលរងខណ្ឌទួលគោក រួមទាំងប៉ូលិសប៉ុស្តិ៍ និងខណ្ឌបានចុះទៅដល់កន្លែងកើតហេតុចាត់ចែងហៅរថយន្តស្ទូចបញ្ជូនទៅកាន់អធិការដ្ឋានខណ្ឌទួលគោក ដើម្បីដោះស្រាយតាមផ្លូវច្បាប់៕
ចែករំលែកព័តមាននេះ