រាជធានីភ្នំពេញ ៖ អាកាសយានដ្ឋានអន្តរជាតិភ្នំពេញបានបញ្ចប់ការពង្រីកប្រវែងផ្លូវរត់របស់ខ្លួនហើយ ដែលអនុញ្ញាតឲ្យព្រលាននេះមានសមត្ថភាពទទួលយន្តហោះធុនធំចុះចតបានដោយសុវត្ថិភាព និងមានភាពងាយស្រួលជាងមុន ។ នេះបើតាមអគ្គនាយកក្រុមហ៊ុនសម្បទានព្រលានយន្តហោះកម្ពុជា ។ លោក Eric…
រាជធានីភ្នំពេញ ៖ អាកាសយានដ្ឋានអន្តរជាតិភ្នំពេញបានបញ្ចប់ការពង្រីកប្រវែងផ្លូវរត់របស់ខ្លួនហើយ ដែលអនុញ្ញាតឲ្យព្រលាននេះមានសមត្ថភាពទទួលយន្តហោះធុនធំចុះចតបានដោយសុវត្ថិភាព និងមានភាពងាយស្រួលជាងមុន ។ នេះបើតាមអគ្គនាយកក្រុមហ៊ុនសម្បទានព្រលានយន្តហោះកម្ពុជា ។
លោក Eric Delobel បានឲ្យដឹងកាលពីថ្ងៃទី១៥ វិច្ឆិកា កន្លងមកថា ផ្លូវរត់យន្តហោះថ្មីនេះ មានលទ្ធភាពទាក់ទាញការចុះចតយន្តហោះ អន្តរជាតិធំៗកាន់តែច្រើនរហូតដល់រយៈពេល១៥ឆ្នាំទៅមុខទៀត ដែលនឹងជួយលើកកម្ពស់វិស័យដឹកជញ្ជូនតាមផ្លូវអាកាសកាន់តែមានលក្ខណៈល្អប្រសើរ ។ លោកបន្តថា ៖« ផ្លូវថ្មីនេះបានប្រើប្រាស់បច្ចេកទេសសាងសង់ទំនើប ដែលធានាបានទាំងសុវត្ថិភាពនៃការចុះចត និងការរត់ឡើងរបស់យន្តហោះ »។
អនុរដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិល លោក សយ សុខាន់ បានមានប្រសាសន៍ផងដែរថា ការស្ថាបនាផ្លូវរត់យន្តហោះថ្មីនេះ គឺបានបង្កើនភាពកក់ក្តៅដល់អ្នកធ្វើដំណើរ ខណៈដែលចំនួនអ្នកធ្វើដំណើរតាមផ្លូវអាកាសកំពុងមានកំណើនខ្ពស់ច្រើនពីមួយឆ្នាំទៅមួយឆ្នាំ ។
ផ្លូវរត់យន្តហោះថ្មីនេះមានប្រវែង៣ពាន់ម៉ែត្រ ដែលចំណាយទឹកប្រាក់វិនិយោគជាង១២លានដុល្លាអាមេរិក ហើយគ្រោងសាងសង់ចំណតយន្តហោះចំនួន១០ចំណតបន្ថែមទៀត ដើម្បីកាន់តែផ្តល់ភាពងាយស្រួល ក្នុងការទទួលយន្តហោះធំៗមកពីក្រៅប្រទេស ។
លោក ពេជ្រ សុប៉ុនតារា ប្រធានផ្នែកបង្កើនការហោះហើរនៃអាកាសយានដ្ឋានកម្ពុជាធ្លាប់មានប្រសាសន៍ថា បន្ទាប់ពីសាងសង់ពង្រីកផ្លូវរត់បន្ថែមនេះ ព្រលានយន្តហោះអន្តរជាតិភ្នំពេញ អាចមានលទ្ធភាពទទួលអាកាសចរណ៍ ដែលអាចផ្ទុកអ្នកដំណើរបានជាង៤០០នាក់ និងមានសមត្ថភាពទទួលយន្តហោះចុះចតកាន់តែច្រើនជាងមុនផងដែរ ៕
ចែករំលែកព័តមាននេះ