នាយករដ្ឋមន្ត្រីរុស្ស៊ី លោកឌីមីឌ្រី ម៉េដវេដេវថ្លែងកាលពីថ្ងៃទី១៣ មិថុនាថា ប្រទេសរុស្ស៊ីនឹងចំណាយប្រាក់ដល់ទៅជាង៦៦០ពាន់លានរូប្ល៍ ប្រមាណជា២០,៦ពាន់លានដុល្លារ សម្រាប់ការរៀបចំប្រកួតបាល់ទាត់ពិភពលោកឆ្នាំ២០១៨ខាងមុខនេះ ។ក្នុងកិច្ចប្រជុំរដ្ឋាភិបាលមួយលោកម៉េដវេដេវថ្លែងថា ជាងពាក់កណ្តាលនៃថិវកានេះគឺទឹកប្រាក់ប្រមាណជា៣៣៦ពាន់លានរូប្ល៍(១០,៥ពាន់លានដុល្លារ)នឹងផ្តល់ដោយថវិកាសហព័ន្ធ ។
ដោយគូសបញ្ជាក់ថា កម្មវិធីនោះត្រូវបានអនុម័តក្រោយការពិនិត្យដ៏ស៊ីជម្រៅមួយ លោកម៉េដវេដេវចង់ឱ្យប្រើប្រាស់ថវិកានេះប្រកបដោយប្រសិទ្ធភាពខ្ពស់ និងមានតម្លាភាពបំផុត ។ លោកមានប្រសាសន៍ថា ការប្រកួតបាល់ទាត់ពិភពលោកឆ្នាំ២០១៨ផ្តល់នូវកាលានុវត្តភាពថ្មីមួយសម្រាប់ទាក់ទាញវិនិយោគឯកជន ហើយការប្រកួតនេះក៏ចាំបាច់ដែរសម្រាប់ការទាក់ទាញដ៏ប្រាកដប្រជាមួយ ។ លោកអំពាវនាវដល់រដ្ឋាភិបាលឱ្យធ្វើអ្វីគ្រប់យ៉ាងដើម្បីបង្កើតហេដ្ឋារចនាសម្ព័ន្ធទេសចរណ៍មួយនៅរុស្ស៊ី ដោយសារការវិនិយោគនេះរបស់រដ្ឋ និងរបស់ផ្នែកឯកជន ។
នាយករដ្ឋមន្ត្រីរុស្ស៊ីថ្លែងទៀតថា ដូច្នេះវាចាំបាច់បង្កើតលក្ខខណ្ឌនៃការស្នាក់នៅឱ្យបានល្អ ពិសេសពុំត្រឹមតែសម្រាប់ពួកអ្នកគាំទ្រ និងបណ្តាក្រុមបាល់ទាត់ប៉ុណ្ណោះទេ ប៉ុន្តែក៏សម្រាប់ការសិក្សាវប្បធម៌រុុស្ស៊ីផងដែរ ។ក្នុងកម្មវិធីនេះគេគ្រោងកសាងថ្មី ឬកសាងឡើងវិញនូវស្តាតចំនួន១២ និងទីលានបាល់ទាត់សម្រាប់ការហ្វឹកហាត់ចំនួន១១៣កន្លែង ។មនុស្សប្រមាណជា១លាននាក់ នឹងមកទស្សនាការប្រកួតបាល់ទាត់ពិភពលោកនោះដែលនឹងរៀបចំឡើងក្នុងតំបន់១១របស់រុស្ស៊ី ៕
ចែករំលែកព័តមាននេះ