រាជធានីភ្នំពេញ ៖ នៅថ្ងៃសុក្រ ទី១៤ មិថុនានេះ ការប្រកួតពូលB ជម្រើសជើងឯកដណ្តើមខ្សែក្រវាត់របស់ក្រុមហ៊ុនសេង ហុងហេង នឹងចាប់ផ្តើមនៅលើសង្វៀនទូរទស្សន៍បាយ័នស្ទឹងមានជ័យដូចការគ្រោងទុក ។ ក្នុងចំណោមអ្នកមានពិន្ទុខ្ពស់ទាំង៦ កីឡាករ ថៃ ប៊ុនហាន និង កីឡាករ ស៊ូ វណ្ណៈ ត្រូវគេកត់សម្គាល់ថា ត្រូវការ៣ពិន្ទុសម្រាប់ល្ងាចនេះខ្លាំងក្លាបំផុត
រាជធានីភ្នំពេញ ៖ នៅថ្ងៃសុក្រ ទី១៤ មិថុនានេះ ការប្រកួតពូលB ជម្រើសជើងឯកដណ្តើមខ្សែក្រវាត់របស់ក្រុមហ៊ុនសេង ហុងហេង នឹងចាប់ផ្តើមនៅលើសង្វៀនទូរទស្សន៍បាយ័នស្ទឹងមានជ័យដូចការគ្រោងទុក ។ ក្នុងចំណោមអ្នកមានពិន្ទុខ្ពស់ទាំង៦ កីឡាករ ថៃ ប៊ុនហាន និង កីឡាករ ស៊ូ វណ្ណៈ ត្រូវគេកត់សម្គាល់ថា ត្រូវការ៣ពិន្ទុសម្រាប់ល្ងាចនេះខ្លាំងក្លាបំផុត ដើម្បីទប់ខ្លួនឯងកុំឱ្យជ្រុះចេញពីការប្រកួតខ្វែងក្នុងពេលដ៏ខ្លី ។ ជំនួប៣ប្រកួតកន្លងមក កីឡាករ ថៃ ប៊ុនហាន មកពីក្លិបបូរីនាគរាជ និងកីឡាករ ស៊ូ វណ្ណៈ មកពីក្លិបយុវកីឡាខេត្តកណ្តាល មាន៧ពិន្ទុស្មើគ្នា ខណៈដែលពួកគេចាញ់ពិន្ទុតែកីឡាករ នូវ ស៊ីថា មកពីក្លិបតាឡីដំរីមានឫទ្ធិតែម្នាក់គត់ ដែលមានរហូតទៅដល់៩ពិន្ទុ ព្រោះតែគេមិនដែលចាញ់ ។
ជាមួយនឹងឱកាសឈរក្នុងលេខរៀងទី២នេះ ទើបកីឡាករទាំងពីរសម្តែងការតាំងចិត្តយ៉ាងលើសលប់ដើម្បីប្រជែងយក៣ពិន្ទុបន្ថែមក្នុងជុំទី៤នេះ ។
កីឡាករ ថៃ ប៊ុនហាន អះអាងថា លោកមិនអាចចាញ់បានទេសម្រាប់ការប្រកួតនាល្ងាចនេះ ដើម្បីកុំឱ្យបាត់តំណែងដែលលោកខំប្រឹងប្រែងតាំងពីដើមទីមក ហើយមិនបានឡើងទៅប្រកួតខ្វែងដណ្តើមខ្សែក្រវាត់របស់ក្រុមហ៊ុនសេង ហុងហេង ។ លោកមានជំនឿថា ៣ពិន្ទុសម្រាប់ល្ងាចនេះពិតជាមិនពិបាកនោះទេ ដោយសារតែគូប្រកួតដែលលោកប៉ះជាមួយ មិនមែនជាដៃគូថ្មីដែលលោកមិនធ្លាប់ដឹងពីសមត្ថភាព ។
តាមសេចក្តីប្រកាស លោកនឹងជួបប្រកួតជាមួយកីឡាករ សុខ វិរៈ មកពីក្លិបសំរោងកោងដែលមានតែ៣ពិន្ទុក្នុងការប្រកួតទាំង៣លើក ដែលអ្នកទស្សនាការប្រកួតក្នុងព្រឹត្តិការណ៍មួយនេះរំពឹងដូចគ្នាថា លោកពិតជាអាចទៅរួច ។ សំអាងលើការបរាជ័យទាំង៣លើករបស់ សុខ វិរៈ ទើប ថៃ ប៊ុនហាន កាន់តែមានជំនឿ១០០% ថា ខ្លួនពិតជាក្តោបក្តាប់បាន១០ពិន្ទុក្រោយពីការប្រកួតលើកនេះ ។
កីឡាករ ស៊ូ វណ្ណៈ ឯណេះវិញ ថ្វីដ្បិតថាត្រូវឡើងរេញប៉ះជាមួយកីឡាករ នូវ ស៊ីថា ដែលមាន៩ពិន្ទុក្នុងដៃ ប៉ុន្តែលោកហាក់មានការតាំងចិត្តរួចជាស្រេចហើយថា នឹងអាចឈ្នះដូចគ្នាសម្រាប់ល្ងាចនេះ ។ បើលោកចាញ់ក្នុងជុំនេះ វាមិនមែនជារឿងសង្ឃឹមកើតទេសម្រាប់ឱកាសឡើងទៅប្រកួតខ្វែងក្នុងវគ្គបន្ទាប់ដែលលោករំពឹងទុក ។ អញ្ចឹងហើយទើបកាន់តែធ្វើឱ្យលោកបង្ហាញការប្រយ័ត្នប្រយែងជាមួយនឹងការត្រៀមជាស្រេចដើម្បីទប់កណ្តាប់ដៃ និងរន្ទះជើងដ៏ខ្លាំងក្លារបស់កីឡាករ នូវ ស៊ីថា កុំឱ្យសម្រេចគោលដៅសម្រាប់ជុំទី៤ ។ លោកបញ្ជាក់ថា នូវ ស៊ីថា មិនទាន់ចាញ់សោះក្នុង៣ប្រកួតមុន ប៉ុន្តែលោកក៏មិនអាចបណ្តោយឱ្យចាញ់កីឡាកររូបនេះបានដែរ ដើម្បីឆ្លងឱ្យផុតឱកាសធ្លាក់តំណែង ។
ការតាំងចិត្តរបស់កីឡាករទាំងពីរ ថៃ ប៊ុនហាន ត្រូវគេជឿថាអាចកើតឡើង ប៉ុន្តែសម្រាប់ ស៊ូ វណ្ណៈ ហាក់ត្រូវគេភ័យបារម្ភបន្តិច ។ ទោះបីយ៉ាងណា លទ្ធផលជាក់ស្តែងមិនអាចសំអាងថា អ្នកខ្លាំងជាអ្នកឈ្នះនោះទេ ដោយសារតែការប្រកួតនៅលើរេញ វាទាមទារនូវសំណាងមួយផងដែរ ។ នៅក្នុងជុំនេះដែរ កីឡាករ យ៉ាម ពិសិដ្ឋ មកពីក្លិបរស្មីកុមារកំព្រា និងកីឡាករ ហ៊ុន គីរី មកពីក្លិបតាព្រហ្មមានជ័យបង្ក្រាបគ្រឿងញៀន ដែលមាន៥ពិន្ទុស្មើគ្នា នឹងជួបប្រកួតគ្នា ដែលកីឡាករទាំងពីរនេះហាក់ពិបាកសង្ឃឹមទៅប្រកួតខ្វែងបន្តិច គឺលើកលែងតែម្នាក់ក្នុងចំណោមពួកគេរកបាន៦ពិន្ទុពីការប្រកួត២លើកចុងក្រោយ ។ ចាំមើលមើល៍ តើកីឡាករដែលតាំងចិត្តអាចដណ្តើមពិន្ទុបានឬមិនបានសម្រាប់ល្ងាចនេះ ៕
ចែករំលែកព័តមាននេះ