ប្រាក់ដុល្លារអាមេរិកបានធ្លាក់ថ្លៃកាលពីថ្ងៃពុធ ទី១២ មិថុនា ពេលដែលមានការប្រែប្រួលយ៉ាងឆាប់រហ័សនៅក្នុងទីផ្សារទ្រព្យសកម្ម ។ ប្រាក់ដុល្លារបានធ្លាក់ថ្លៃដល់៩៥,៨៨យ៉េនក្នុងមួយដុល្លារធៀបនឹង៩៦,០១យ៉េនក្នុងមួយដុល្លារកាលពីថ្ងៃអង្គារ ។ ប្រាក់ដុល្លារក៏ធ្លាក់ថ្លៃផងដែរបើធៀបនឹងប្រាក់អឺរ៉ូ ដោយក្នុងមួយអឺរ៉ូស្មើនឹង១,៣៣៣៥ដុល្លារធៀបនឹង១,៣៣១១ដុល្លារកាលពីថ្ងៃអង្គារ ។
ផលប៉ះពាល់ពីការសម្រេចរបស់ធនាគារកណ្តាលជប៉ុនក្នុងការរក្សាអត្រាការប្រាក់ថេរកាលពីថ្ងៃអង្គារ ជាជាងការជំរុញបន្ថែមបានបន្តប៉ះពាល់ពេញទីផ្សាររូបិយវត្ថុទាំងមូល ។ អ្នកគ្រប់គ្រងសាច់ប្រាក់ក្នុងស្រុករបស់ជប៉ុនបានលក់ចេញប្រាក់សុទ្ធចំនួន៣៨៦,៩ពាន់លានយ៉េន (៤,១ពាន់លានដុល្លារ) នៃបំណុលបរទេស និងភាគហ៊ុនក្រៅប្រទេសចំនួន២២១,៨ពាន់លានយ៉េនកាលពីថ្ងៃទី៧ មិថុនា ។ នេះបើយោងតាមតួលេខចេញផ្សាយដោយក្រសួងហិរញ្ញវត្ថុនៅទីក្រុងតូក្យូ ។
នៅក្នុងសប្តាហ៍នេះដែរ ធនាគារកណ្តាលជប៉ុនបានបញ្ចៀសពីការបន្ថែមកម្មវិធីជំរុញរូបិយវត្ថុ ឬបង្កើនការដោះស្រាយការប្រែប្រួលនៃសញ្ញាប័ណ្ណ ។ ទិន្នផលសញ្ញាប័ណ្ណរដ្ឋាភិបាលរយៈពេល១០ឆ្នាំបានកើនឡើងដល់១% ចាប់តាំងពីធនាគារកណ្តាលប្រកាសផែនការបង្កើនការទិញបំណុលទ្វេដងកាលពីខែមេសាទៅដល់ជាង៧លានលានយ៉េន ។
កាលពីថ្ងៃពុធកន្លងទៅនេះ រដ្ឋបាលព័ត៌មានថាមពលអាមេរិកនិយាយថា សន្និធិប្រេងឆៅអាមេរិកបានកើនឡើង២,៥លានបារ៉ែលកាលពីសប្តាហ៍មុនដល់៣៩៣,៨លានបារ៉ែល ។ ចំណែកការផ្គត់ផ្គង់ប្រេងសាំងបានកើនឡើងពី២,៧លានបារ៉ែលដល់២២១,៥លានបារ៉ែល ។
ភ្នាក់ងារថាមពលអន្តរជាតិ (IEA) មានមូលដ្ឋាននៅទីក្រុងប៉ារីសបានព្យាករថា តម្រូវការប្រេងនឹងកើនឡើងពី៧៨៥.០០០បារ៉ែលក្នុងមួយថ្ងៃដល់៩០,៦លានបារ៉ែលក្នុងមួយថ្ងៃនៅក្នុងឆ្នាំនេះ ដោយសារកំណើនសេដ្ឋកិច្ចពិភពលោកធ្លាក់ចុះ ។
ប្រេងឆៅសម្រាប់ចែកចាយខែកក្កដា នៅទីក្រុងញូវយ៉កកើនឡើង៥០សេនដល់៩៥,៨៨ដុល្លារក្នុងមួយបារ៉ែល ។ ចំណែកប្រេងឆៅ Brent អង់គ្លេសកើនឡើង៥៣សេនដល់១០៣,៤៩ដុល្លារក្នុងមួយបារ៉ែល ៕
ចែករំលែកព័តមាននេះ