លួចម៉្លឹងៗ…តើឈ្មោះស្ថានីយប្រេងណាខ្លះលក់មិនស្មោះត្រង់ ?
- តាកែវ
ខេត្តតាកែវ ៖ ប្រតិបត្តិការរយៈពេលពេញ១ថ្ងៃ(១៣ វិច្ឆិកា) លោក មាន ចំណាប់ អនុប្រធាននាយកដ្ឋានកិច្ចការការពារអ្នកប្រើប្រាស់ និងបង្ក្រាបការក្លែងបន្លំ រួមជាមួយនឹងលោក…
ខេត្តតាកែវ ៖ ប្រតិបត្តិការរយៈពេលពេញ១ថ្ងៃ(១៣ វិច្ឆិកា) លោក មាន ចំណាប់ អនុប្រធាននាយកដ្ឋានកិច្ចការការពារអ្នកប្រើប្រាស់ និងបង្ក្រាបការក្លែងបន្លំ រួមជាមួយនឹងលោក ប៉ោ លាងគង់ ប្រធានសាខាកាំកុងត្រូលបានរកឃើញថា ម្ចាស់ស្ថានីយប្រេងឥន្ធនៈក្នុងខេត្តតាកែវមួយចំនួនរកស៊ីមិនស្មោះត្រង់ទេលោភលន់ណាស់ ។
លោក ប៉ោ លាងគង់ ប្រធានសាខាកាំកុងត្រូលខេត្តបានឱ្យដឹងថាក្នុងចំណោម១៣ស្ថានីយមានស្ថានីយប្រេងឥន្ធនៈចំនួន៩ បានអនុវត្តខុសពីការណែនាំនិងក្លែងបន្លំ លួចបន្លំលីត្រ ដោយចាក់មិនគ្រប់ចំនួនលីត្រហើយនេះជាការលួចបន្លំភ្នែកដល់អ្នកប្រើប្រាស់ ដោយស្ថានីយចាក់ប្រេងរបស់ពួកគាត់ គឺមិនបានអនុលោមតាមបរិមាណ និងខ្លះទៀតថែមទាំងមិនបានអនុលោមតាមគុណភាពថែមទៀត ។ លោកថា ក្នុងការចាក់ប្រេងចំនួន១០០លីត្រ មានខ្លះបាត់ចំនួនប្រេង ចាប់ពីចន្លោះ៧លីត្រទៅ៩លីត្រជាបរិមាណមួយដ៏ច្រើនដែលម្ចាស់ស្ថានីយខូចលួចបរិមាណ ។
លោកប្រធានសាខាបានបន្តទៀតថា ទន្ទឹមនឹងការកើតមានបញ្ហានេះ មន្ត្រីជំនាញសាខាកាំកុងត្រូលខេត្តបានអញ្ជើញរាល់គ្រប់ម្ចាស់ស្ថានីយប្រេងឥន្ធនៈទាំងអស់នៅក្នុងខេត្ត មកធ្វើការប្រជុំផ្សព្វផ្សាយ អប់រំ ណែនាំពីការក្លែងបន្លំជាមួយនឹងម្ចាស់ស្ថានីយអស់រយៈពេលជាច្រើនខែ និងការអប់រំណែនាំតាមរយៈការចុះពិនិត្យនៅតាមស្ថានីយជាលើកទី១ ម្តងរួចមកហើយ បង្ហាញឈ្មោះម្ចាស់ស្ថានីយប្រេងទាំងនេះនៅគ្រប់ប្រព័ន្ធផ្សព្វផ្សាយទាំងអស់ ដើម្បីឱ្យមហាជនបានដឹងច្បាស់ ។
លោកថា មិនតែប៉ុណ្ណោះបានយកប្រេងសាំង ប្រេងម៉ាស៊ូត របស់ស្ថានីយដែលមិនអនុវត្តតាមនោះ ទៅពិនិត្យបន្តនៅមន្ទីរពិសោធ ក្នុងអគ្គនាយកដ្ឋានកាំកុងត្រូលថែមទៀត នៅពេលមានលទ្ធផលយ៉ាងណា មន្ត្រីជំនាញនឹងចុះអនុវត្តច្បាប់ផ្ទាល់ជាមួយនឹងម្ចាស់ស្ថានីយតែម្តង ។
លោក ប៉ោ លាងគង់ ប្រធានសាខាកាំកុងត្រូលខេត្តតាកែវ បានប្រាប់ឱ្យក្រុមអ្នកសារព័ត៌មានបានដឹងនៅរសៀលថ្ងៃទី១៣ វិច្ឆិកាថា ឆ្លងកាត់ការត្រួតពិនិត្យស្ថានីយប្រេងឥន្ធនៈក្នុងខេត្តតាកែវនេះ គឺយើងបានធ្វើការពិនិត្យទៅលើស្ថានីយចាក់ប្រេងចំនួន១៣ទីតាំង ក្នុងនោះមាន ៤ទីតាំង គឺអនុវត្តត្រឹមត្រូវទៅតាមស្តង់ដាដែលក្រសួងបានកំណត់។
ដោយឡែកចំពោះម្ចាស់ស្ថានីយចំនួន៩ គឺត្រូវបានរកឃើញថាមាន២ស្ថានីយ មិនអនុលោមភាពផ្នែកបរិមាណផង និងគុណភាពផង បានន័យថា មិនគ្រប់លីត្រ ហើយប្រេងសាំងធម្មតា ដាក់ស្លាកថាប្រេងសាំងស៊ុបពែរបន្លំភ្នែកអតិថិជន ។ ៧ស្ថានីយទៀត មិនអនុលោមទៅលើបរិមាណ ដោយប្រេងចាក់មិនគ្រប់រង្វាស់រង្វល់ ដោយក្នុងប្រេងចំនួន១០០លីត្របាត់ប្រេងចាប់ពីចន្លោះ៧លីត្រ ឡើងទៅ៩លីត្រ ដែលនេះគឺជាការក្លែងបន្លំភ្នែកអតិថិជនយ៉ាងធ្ងន់ធ្ងរដោយសារកេងប្រវញ្ចហួសហេតុពេក ។
លោកបានបញ្ជាក់ឱ្យដឹងថា ចំពោះស្ថានីយប្រេងឥន្ធនៈទាំង៩នោះ មាន៥ស្ថានីយដែលខុសទៅលើបរិមាណនិងគុណភាពធ្ងន់ធ្ងរ ។ ការចាក់ប្រេងចំនួន១០០លីត្រ មានខ្លះលួចចាប់ពីចន្លោះ៧លីត្រទៅ៩លីត្រមាន ៖ ទី១-ស្ថានីយប្រេង ឈាវ លាំង ស្លាគូ ។ ទី២-ស្ថានីយប្រេង ជៀកច្រូវ ។ ទី៣-ស្ថានីយប្រេង សុភក្តិតាកែវ ។ ទី៤-ស្ថានីយប្រេង ដំណាក់សេក ។ទី៥-ស្ថានីយប្រេងឥន្ធនៈអង្គតាសោម ។
ដោយឡែក៤ទីតាំងទៀតខុសលើបរិមាណដែរ តែមានកម្រិតទាបបំផុត ដែលចាក់ប្រេង១០០លីត្រ បាត់ប្រេងចាប់ពី១លីត្រទៅ៣លីត្ររួមមាន៖
ទី១-ស្ថានីយប្រេងតេលាអង្គតាសោម ។
ទី២-ស្ថានីយប្រេង១មករា របស់លោក អ៊ុង ជាកុក ដែលជាស្ថានីយប្រេងរដ្ឋបានផ្ញើទុក ឱ្យខាងសាលាខេត្ត មន្ទីរជុំវិញខេត្តប្រើប្រាស់ រួមជាមួយសមត្ថកិច្ចទាំង៣អង្គភាពប្រើប្រាស់បំពេញការងារផងដែរ ។ លោកថា ស្ថានីយ១មករានេះ មិនដែលស្តាប់ការណែនាំរបស់មន្ត្រីជំនាញឡើយ ។
ទី៣-ស្ថានីយប្រេង ម៉ារីយ៉ាន ។
ទី៤-ស្ថានីយប្រេងវណ្ណៈស្រីនាងស្លាគូ ។ក្រុមមន្ត្រីជំនាញថាបើសិនជាស្ថានីយប្រេងទាំង៤នេះនៅតែបន្តលក់លួចលីត្រនិងកេងបន្លំគុណភាពបន្តទៀត ខាងជំនាញនឹងរាយការណ៍ទៅដល់ក្រសួងពាណិជ្ជកម្ម ដើម្បីបិទស្ថានីយប្រេងទាំងអស់នោះមិនឱ្យលក់បន្តទៀតឡើយ ។
ជាការកត់សម្គាល់ការព្រមានរបស់មន្ត្រីជំនាញកាំកុងត្រូលពិតជាទទួលការគាំទ្រពីសំណាក់អ្នកប្រើប្រាស់ប្រេងឥន្ធនៈ តែរាល់វិធានការនេះមិនទាន់លេចចេញជារូបភាពជាក់ស្តែងលើស្ថានីយប្រេងណាមួយនោះទេ ។
បញ្ហាដែលបានកើតឡើងនៅតាមស្ថានីយនេះ មិនមែនជាលើកដំបូងទេ តែវាបានកើតមានយូរមកហើយ រហូតដល់ពេលនេះអ្នកប្រើប្រាស់យានយន្តទំនើបៗបានងាកមកប្រើប្រេងតូតាល់ កាល់តិច និងភីធីធី ដោយមានជំនឿលើស្តង់ដា ៕
ចែករំលែកព័តមាននេះ