រកឃើញមានរូបសំណាកសត្វព្រៃជាច្រើន សុទ្ធគ្មានច្បាប់អនុញ្ញាត

ថ្ងៃទី ១៣ ខែ វិច្ឆិកា ឆ្នាំ ២០១៨

ម៉ោង ២០:០០

រាជធានីភ្នំពេញ ៖ ក្រុមអន្តរាគមន៍បង្ក្រាបបទល្មើសសត្វព្រៃចល័ត នៃរដ្ឋបាលព្រៃឈើ សហការជាមួយកម្លាំងកងរាជអាវុធហត្ថលើផ្ទៃប្រទេស រួមជាមួយកម្លាំងកងរាជអាវុធហត្ថខណ្ឌច្បារអំពៅ កាលពីវេលារសៀលថ្ងៃទី១២ ខែវិច្ឆិកា ឆ្នាំ២០១៨ បានចុះឆែកឆេរទីតាំងសម្លាក់ព្រះមួយកន្លែងយីហោ ចឹក ម៉េង ដែលមានទីតាំងស្ថិតនៅផ្ទះលេខ១៦៦ ផ្លូវ៣៦៩ ភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ ដោយសង្ស័យថា សំណាករូបព្រះដែលធ្វើឡើងពីសត្វព្រៃជាច្រើន គឺសុទ្ធសឹងគ្មានច្បាប់អនុញ្ញាត ពោលគឺមានជាប់ពាក់ព័ន្ធនឹងបទល្មើសសត្វព្រៃ។

ការចុះឆែរឆេរពិនិត្យខាងលើនេះ ធ្វើឡើងដោយមានការដឹកនាំកម្លាំងពីលោក ប្លង់ សុផល ព្រះរាជអាជ្ញាររងអមសាលាដំបូងរាជធានីភ្នំពេញផងដែរ។ ជាលទ្ធផល កម្លាំងចម្រុះបានរកឃើញថា រូបសំណាកជាច្រើនដែលចម្លាក់ចេញពីសត្វព្រៃនោះ គឺសុទ្ធសឹងតែគ្មានច្បាប់អនុញ្ញាតត្រឹមត្រូវ ពីរដ្ឋបាលព្រៃឈើនោះឡើយ ពោលគឺជាការកៃច្នៃដោយខុសច្បាប់។ សូមបញ្ជាក់ថា នៅក្នុងទីតាំងខាងលើនេះ គឺមានសំណាករូបជាច្រើនយ៉ាងខុសៗគ្នា ក្នុងនោះមាន ៖ សំណាកភ្លុក , សំណាកភ្លុកដំរីកែច្នសហើយ (ព្រះ និងចិញ្ចៀន), ចែជ្រូកព្រៃ, ធ្មេញក្រចកខ្លាឃ្មុំ, ចុងស្នែងប្រើស, ជើងឈ្លូស, នុបប្រើស និងចុងស្នែងកេះជាដើម។

ក្រោយរកឃើញថា សំណាកសត្វព្រៃទាំងអស់ មានពាក់ព័ន្ធនឹងបទល្មើសសត្វព្រៃហើយនោះ កម្លាំងមន្ត្រីរដ្ឋបាលព្រៃឈើ សម្រេចធ្វើការដកហូតវត្ថុតាងសំណាកសត្វទាំងអស់ជាបណ្ដោះសិន។ ចំណែកឯម្ចាស់ទីតាំងក៏ត្រូវឃាត់ខ្លួនយកទៅសាកសួរនាំតាមនីតិវិធីផងដែរ៕