រាជធានីភ្នំពេញ ៖ កីឡាករជើងខ្លាំងពីររូប គឺ ផល សោភ័ណ្ឌ ដែលជាម្ចាស់ខ្សែក្រវាត់ស្រាបៀរកម្ពុជាប្រចាំឆ្នាំ២០១២ និងកីឡាករ ឯម ខ្លឹមខ្មៅ ជាម្ចាស់ខ្សែក្រវាត់ស្រាបៀរកម្ពុជាប្រចាំឆ្នាំ២០១៣ ត្រូវគេអះអាងថា មានគម្រោងឡើងប្រកួតគ្នាហើយ ក្នុងលក្ខខណ្ឌដណ្តើមខ្សែក្រវាត់គ្នាទៅវិញទៅមកជាផ្លូវការ ។ ផែនការនេះ មានន័យថា ម្នាក់ក្នុងចំណោមកីឡាករទាំងពីរនឹងមានម្នាក់បាត់បង់ខ្សែក្រវាត់ទាំងស្រុង និងម្នាក់ទៀតក្លាយជាម្ចាស់ខ្សែក្រវាត់ស្រាបៀរកម្ពុជាទាំងពីរជំនាន់តែម្តង ។
កន្លងមក កីឡាករ ផល សោភ័ណ្ឌ និងកីឡាករ ឯម ខ្លឹមខ្មៅ ធ្លាប់ជួបគ្នារួចហើយក្នុងលក្ខខណ្ឌសាកល្បងសមត្ថភាពគ្នា ប៉ុន្តែសម្រាប់វេទិកាដណ្តើមគ្នាយកខ្សែក្រវាត់ដែលពួកគេក្តោបក្តាប់ គឺមិនទាន់នោះឡើយ ។ ប្រភពពីស្ថានីយទូរទស្សន៍បាយ័ន និងម្ចាស់ស្ពនស៊័រ គឺក្រុមហ៊ុនស្រាបៀរកម្ពុជាបានបញ្ជាក់ថា បានរៀបគម្រោងឱ្យម្ចាស់ខ្សែក្រវាត់ទាំងពីរធ្វើការប្រកួតគ្នាហើយ ដើម្បីការពារ និងដណ្តើមយកខ្សែក្រវាត់គ្នាជាលើកទី១ ដែលអ្នកទស្សនាភាគច្រើនចង់ឃើញ ។
មន្រ្តីទូរទស្សន៍បាយ័នបានប្រកាសជាសាធារណៈ កាលពីថ្ងៃអាទិត្យថា ជំនួបដណ្តើមខ្សែក្រវាត់រវាងកីឡាករទាំងពីរនឹងកើតមានឡើងមិនយូរមិនឆាប់ឡើយ បន្ទាប់ពីការទទួចដ៏ស្រួចស្រាល់ឱ្យម្ចាស់ខ្សែក្រវាត់ទាំងពីរប៉ះគ្នា ក្នុងនាមប្រកួតដណ្តើមយកខ្សែក្រវាត់ គ្នាមកក្តោបក្តាប់ ។ ការប្រកួតនេះ នៅមិនទាន់កំណត់ពីកាលបរិច្ឆេទឡើយ ប៉ុន្តែផែនការជាក់ស្តែងនឹងកើតឡើងបន្ទាប់ពីកីឡាករ ឯម ខ្លឹមខ្លៅ បញ្ចប់ការប្រកួតអន្តរជាតិនៅលើសង្វៀនរាជបុត្រនៃអាណាចក្រខ្មែរនៅចុងខែនេះ ។
ប្រភពពីមន្ត្រីដដែលអះអាងថា ការពិតកីឡាករទាំងពីរ ទូរទស្សន៍បាយ័នគ្រោងឱ្យប្រកួតគ្នាបែបនេះ តាំងពីកីឡាករ ឯម ខ្លឹមខ្មៅ ទើបនឹងក្លាយជាម្ចាស់ខ្សែក្រវាត់ស្រាបៀរកម្ពុជាឆ្នាំ២០១៣ កាលពីប៉ុន្មានខែមុននោះម៉្លេះ ប៉ុន្តែដោយសារមើលសន្ទុះរបស់កីឡាករ ផល សោភ័ណ្ឌ ថាមិនទាន់ទៅរួចជាមួយកីឡាករ ឯម ខ្លឹមខ្មៅ នៅឡើយ ទើបការប្រកួតនេះចេះតែត្រូវពន្យារពេល ។ យ៉ាងណាក៏ដោយ ការប្រកួតដ៏សំខាន់មួយនេះនឹងមិនអាចពន្យារពេលទៀតឡើយ ដើម្បីបំពេញតាមបំណងរបស់ម្ចាស់ស្ពនស៊័រ គឺក្រុមហ៊ុនស្រាបៀរកម្ពុជា ដែលទទួចឱ្យមានការប្រកួតដ៏សំខាន់មួយនេះ ។
ការប្រកាសនេះ កំពុងធ្វើឱ្យកីឡាករ ផល សោភ័ណ្ឌ បុកពោះបន្ទាប់ពីគេទើបតែចាញ់ក្រោមដៃកីឡាករ ឯម ខ្លឹមខ្មៅ ក្នុងព្រឹត្តិការណ៍ដណ្តើមខ្សែក្រវាត់ស្រាបៀរកម្ពុជាឆ្នាំ២០១៣ កាលពីពេលថ្មីៗ ។ ប៉ុន្តែគេមិនអាចប៉ាន់ស្មានថា ផល សោភ័ណ្ឌ នឹងនៅតែចាញ់ក្រោមដៃកីឡាករ ឯម ខ្លឹមខ្មៅ ដូចមុនបានទេ ដោយសារតែការប្រកួតក្នុងព្រឹត្តិការណ៍បែបនេះ គេជឿថា ផល សោភ័ណ្ឌ ពិតជាមានយុទ្ធសាស្រ្តគ្រប់គ្រាន់ដើម្បីការពារខ្សែក្រវាត់របស់ខ្លួន និងដើម្បីទប់ទល់ចំពោះគូសងសឹកចាស់ ដែល ផល សោភ័ណ្ឌ ត្រូវការសងសឹកដោយខានមិនបាននោះ ។
គួរបញ្ជាក់ថា ខ្សែក្រវាត់ដែល ផល សោភ័ណ្ឌ កាន់កាប់ គឺដណ្តើមបានពីកីឡាករ វង្ស ណយ កាលពីក្នុងឆ្នាំ២០១២ ខណៈដែលការប្រកួតដណ្តើមខ្សែក្រវាត់ស្រាបៀរកម្ពុជា ប្រចាំឆ្នាំ២០១៣ ក៏គេជាបេក្ខភាពតែម្នាក់ ដែលប៊ិះដណ្តើមបានខ្សែក្រវាត់នេះមួយទៀត បើកុំតែស៊យចាញ់ពិន្ទុ ឯម ខ្លឹមខ្មៅ ដោយប្រផិតប្រផើយនៅវគ្គផ្តាច់ព្រ័ត្រ ។ អញ្ចឹងហើយ ទើបគេយល់ថា ព្រឹតិ្តការណ៍ប្រកួតនេះ គឺពិតជាសំខាន់បំផុតសម្រាប់ជីវិតជាកីឡាករប្រដាល់របស់ពួកគេ ៕
ចែករំលែកព័តមាននេះ