រាជធានីភ្នំពេញ ៖ ចោរស្រីវ័យក្មេង២នាក់ត្រូវសមត្ថកិច្ច និងសន្តិសុខព្រលានយន្តហោះចាប់ខ្លួន បន្ទាប់ពីពួកនាងធ្វើសកម្មភាពលួចយកកាបូបលុយ និងលួចកាត់ខ្សែ.កពីស្ត្រី២នាក់ផ្សេងគ្នាក្នុងពេលតែមួយបង្កឱ្យមានការភ្ញាក់ផ្អើល កាលពីវេលាម៉ោង៨ និង៤០នាទីយប់ ថ្ងៃទី១១ មិថុនា ២០១៣ នៅក្នុងអាកាសយានដ្ឋានអន្តរជាតិភ្នំពេញ ដែលស្ថិតនៅក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។
ស្ត្រីដែលត្រូវចោរស្រីលួចយកកាបូបលុយឈ្មោះឯម សុខុន អាយុ៣០ឆ្នាំ មានទីលំនៅស្រុកចំការលើ ខេត្តកំពង់ចាម បានបាត់លុយចំនួន៣.៩៧០ដុល្លារ និងខ្សែ.កមាស១ខ្សែទម្ងន់៥ជី សរុបជិត៥ពាន់ដុល្លារ រួមជាមួយនឹងអត្តសញ្ញាណប័ណ្ណ២សន្លឹក និងប្លង់ដី១ផងដែរ ខណៈពេលនាងមកជូនដំណើរបងប្អូនឡើងយន្តហោះចេញទៅធ្វើការនៅប្រទេសក្រៅ ។
ចំណែកស្ត្រីដែលត្រូវចោរលួចកាត់ខ្សែ.កនោះមិនត្រូវបានគេស្គាល់ឈ្មោះទេ ដោយសារពេលចោរកំពុងធ្វើសកម្មភាពស្ត្រីរូបនោះដឹងខ្លួនទាន់ ស្រែកឆោឡោផ្អើលដល់សន្តិសុខព្រលានយន្តហោះ និងសមត្ថកិច្ចដេញចាប់បានភ្លាមៗតែម្តង ចំណែកស្ត្រីរងគ្រោះក៏បានចាកចេញពីព្រលានយន្តហោះទៅបាត់ដោយមិនបានប្តឹងប្តល់អ្វីដែរ ។
ចោរស្រីដែលសមត្ថកិច្ចចាប់ខ្លួនបាន ម្នាក់ឈ្មោះជិន ង៉ែត អាយុ១៧ឆ្នាំ និងម្នាក់ទៀតឈ្មោះអង គ្លែម អាយុ១៣ឆ្នាំ ពួកគេទាំង២នាក់ស្នាក់នៅផ្ទះជួលក្នុងភូមិប៉ប្រកខាងជើង សង្កាត់កាកាប ខណ្ឌពោធិ៍សែនជ័យ ពេលនេះត្រូវសមត្ថកិច្ចបញ្ជូនទៅកាន់ផ្នែកព្រហ្មទណ្ឌហើយដើម្បីសាកសួរ និងកសាងសំណុំរឿងចាត់ការតាមច្បាប់ ៕
ចែករំលែកព័តមាននេះ