រាជធានីភ្នំពេញ ៖ ពិធីបើកការប្រកួតកីឡាក្របខ័ណ្ឌឧត្តមសិក្សា និងមធ្យមសិក្សាឯកទេសប្រចាំឆ្នាំ២០១៣ ត្រូវបានគេរៀបចំធ្វើកាលពីថ្ងៃទី១០ មិថុនា នៅពហុកីឡដ្ឋានជាតិ ក្រោមអធិបតីភាពលោក អុឹម សិទ្ធី រដ្ឋមន្ត្រីក្រសួងអប់រំ យុវជន និងកីឡា ដោយមានការចូលរួមពីមន្ត្រីពាក់ព័ន្ធជាច្រើនរូប និងកីឡាករ-កីឡាការិនីជាច្រើននាក់ បន្ទាប់ពីការប្រកួតបានចាប់ផ្តើមធ្វើតាំងពីថ្ងៃទី៧ មិថុនាមកម៉្លេះ ។
យោងតាមកម្មវិធីប្រកួតឱ្យដឹងថា ការប្រកួតធ្វើឡើងទៅលើវិញ្ញាសាកីឡាមួយចំនួនដូចជា ៖
.បាល់ទាត់ មានកីឡាករចូលរួមចំនួន២៤ក្រុម ចែកចេញជា៨ពូល ក្នុងមួយពូលៗមាន៣ក្រុម ។
.បាល់ទះបុរស-នារី មានកីឡាករចូលរួមចំនួន១៤ក្រុម (ចែកចេញជា៤ពូល គឺ២ពូលមាន៤ក្រុម និង២ពូលទៀតមាន៣ក្រុម) និងកីឡាការិនីចំនួន៤ក្រុម ។
.បាល់បោះបុរស-នារី មានកីឡាករចូលរួមចំនួន៧ក្រុម និងកីឡាការិនីចំនួន៥ក្រុម ។
.អត្តពលកម្មបុរស-នារី មានកីឡាករចូលរួមចំនួន២៦ក្រុម និងកីឡាការិនីចំនួន១៦ក្រុម។
.លោតកម្ពស់បុរស-នារី មានកីឡាករចូលរួមចំនួន៩នាក់ និងកីឡាការិនីចំនួន៥នាក់ ។
សូមបញ្ជាក់ថា ព្រឹត្តិការណ៍ប្រកួតកីឡាក្របខ័ណ្ឌឧត្តមសិក្សា និងមធ្យមសិក្សាឯកទេសប្រចាំឆ្នាំ២០១៣ នេះមានគ្រឹះស្ថានឧត្តមសិក្សា និងមធ្យមសិក្សាចំនួន២៨ចូលរួម សរុបកីឡាករ-កីឡាការិនីទាំងអស់មានចំនួន១.១០៦នាក់ ៕
ចែករំលែកព័តមាននេះ