រាជធានីភ្នំពេញ ៖ រហូតមកទល់ពេលនេះ គម្រោងប្រដាល់ក្បាច់គុនបុរាណខ្មែរ ដែលធ្លាប់ធ្វើឡើងនៅសង្វៀនស្ថានីយទូរទស្សន៍ប៉ុស្តិ៍លេខ៥ នៅតែផ្អាកដោយគ្មានការកំណត់ច្បាស់លាស់នៅឡើយ ។
រាជធានីភ្នំពេញ ៖ រហូតមកទល់ពេលនេះ គម្រោងប្រដាល់ក្បាច់គុនបុរាណខ្មែរ ដែលធ្លាប់ធ្វើឡើងនៅសង្វៀនស្ថានីយទូរទស្សន៍ប៉ុស្តិ៍លេខ៥ នៅតែផ្អាកដោយគ្មានការកំណត់ច្បាស់លាស់នៅឡើយ ។ តម្រុយមិនផ្លូវការអះអាងថា យ៉ាងហោចណាស់ ក៏ដល់ចុងឆ្នាំ២០១៣ ដែរ ទើបកម្មវិធីប្រចាំសប្តាហ៍ទាំងអស់អាចដំណើរការឡើងវិញ បើទោះជាកម្មវិធីប្រដាល់អន្តរជាតិ និងការប្រកួតលើសង្វៀនបាកាសអាចបន្តដំណើរដោយត្រដាបត្រដួសក៏ដោយ ។
មន្ត្រីប្រចាំស្ថានីយទូរទស្សន៍ប៉ុស្តិ៍លេខ៥ បានប្រាប់កោះសន្តិភាពឱ្យដឹងថា អង់តែនទូរទស្សន៍ប៉ុស្តិ៍លេខ៥ នៅមិនទាន់រុះរើ និងរៀបចំឡើងជាថ្មីនៅឡើយទេ បន្ទាប់ពីមានផែនការធ្វើឱ្យប៉ុស្តិ៍នេះច្បាស់ជាងមុនត្រឹមតែក្នុងរយៈពេលមួយខែ ។ តាមការគូសបញ្ជាក់ពីមន្ត្រីជំនាញទំនងជាដល់អំឡុងខែវិច្ឆិកាចុងឆ្នាំនេះទើបអាចរួចរាល់ ធ្វើឱ្យគ្រប់កម្មវិធីបន្តផ្ទាល់នានាបូករួមទាំងវេទិកាតន្ត្រី និងប្រដាល់ប្រចាំសប្តាហ៍ផងត្រូវផ្អាកទាំងអស់ ។ មន្ត្រីដដែលបញ្ជាក់ថា មកទល់ពេលនេះមហាជនទូទៅកំពុងទស្សនាប៉ុស្តិ៍លេខ៥ ដោយពឹងលើការផ្សាយតាមប្រព័ន្ធផ្កាយរណបរបស់ក្រុមហ៊ុនទូរស័ព្ទធំមួយប៉ុណ្ណោះ ។
មន្ត្រីដដែលសុំមិនបញ្ចេញឈ្មោះលើកឡើងថា គ្រប់កម្មវិធីទាំងអស់នៅប៉ុស្តិ៍លេខ៥ នាពេលនេះគឺជាកម្មវិធីចាស់ៗដែលជ្រើសយកមកចាក់ឡើងវិញប៉ុណ្ណោះ ដោយសារតែប៉ុស្តិ៍នេះមិនអាចចំណាយប្រាក់ច្រើនបន្តផ្ទាល់ពីកម្មវិធីទាំងនោះបាន ដោយពឹងតែលើប្រព័ន្ធផ្សាយមិនមែនអង់តែនរបស់ខ្លួន ។ យ៉ាងណាមិញ សម្រាប់កម្មវិធីប្រដាល់ប្រចាំសប្តាហ៍ និងកម្មវិធីជ្រើសរើសជើងឯកនៅលើសង្វៀនបាកាស ដែលជាប់កុងត្រាត្រូវតែធ្វើដោយខានមិនបាន គឺមិនអាចផ្អាកចោលបានទេ បន្ទាប់ពីពឹងប្រព័ន្ធផ្កាយរណបរបស់ស្ថានីយទូរទស្សន៍ជាតិកម្ពុជាឱ្យជួយផ្តល់រូបភាពនៅលើប៉ុស្តិ៍របស់ខ្លួន ជំនួសឱ្យសភាពដំឡើងអង់តែនថ្មី ។
លោក ញៀន សុធី មន្ត្រីព័ត៌មានផ្នែកកីឡាប្រដាល់ប្រចាំប៉ុស្តិ៍លេខ៥ បញ្ជាក់ថា ការប្រកួតមួយខែម្តងរួមមាន ប្រដាល់អន្តរជាតិនឹងធ្វើឡើងនៅថ្ងៃទី២៧ មិថុនា ខណៈដែលការប្រកួតលើសង្វៀនបាកាសនឹងធ្វើនៅថ្ងៃទី៤ កក្កដា ដោយមិនអាចលុបចោលបាន លើកលែងតែកម្មវិធីប្រដាល់ប្រចាំសប្តាហ៍ ។ មូលហេតុដែលកម្មវិធីទាំងពីរនេះនៅតែអាចបន្តផ្ទាល់ គឺដោយសារប៉ុស្តិ៍លេខ៥ ទទួលបានការព្រមព្រៀងពីទូរទស្សន៍ជាតិដែលអាចឱ្យប៉ុស្តិ៍លេខ៥ មានលទ្ធភាពបន្តផ្ទាល់កម្មវិធីទាំងពីររហូតដល់ថ្ងៃអង់តែនទាំងមូលត្រូវបានដំឡើងរួចរាល់ ។
លោកមិនដឹងពីកាលបរិច្ឆេទពិតប្រាកដដែលប៉ុស្តិ៍មួយនេះអាចដំណើរការកម្មវិធីផ្សាយផ្ទាល់របស់ខ្លួនបានវិញនោះទេ ដោយគ្រាន់តែអះអាងថា បើតាមអ្នកជំនាញប្រាប់គឺរហូតដល់ខែវិច្ឆិកាទើបអាចរួចរាល់ ។ ការអះអាងនេះមានន័យថា ហេតុផលរុះរើអង់តែនថ្មីដើម្បីកែប្រែរូបភាពព្រិលស្រអាប់កំពុងធ្វើឱ្យគ្រប់កម្មវិធីបន្តផ្ទាល់ប្រចាំខែទាំងអស់ត្រូវបានផ្អាក ហើយបាត់បង់ប្រជាប្រិយភាពដែលមហាជនធ្លាប់គាំទ្រ ។
នេះជាដំណឹងដ៏អាក្រក់មួយសម្រាប់អ្នកស្នេហាកីឡាប្រដាល់ប្រចាំសប្តាហ៍របស់បុ៉ស្តិ៍លេខ៥ ដែលភាគច្រើនទទួលការសរសើេរថា ប្រមូលផ្តុំដោយគូល្អ និងមានសមត្ថភាព ។ ទោះយ៉ាងណា ស្ថាប័ននេះក៏បានស្វះស្វែងដំណើរការផ្សាយនៅគ្រប់កម្មវិធីចាក់ឡើងវិញ និងបន្តផ្ទាល់កម្មវិធីប្រដាល់ប្រចាំខែចំនួនពីរឱ្យនៅដំណើរការផងដែរ ដែលអ្នកទស្សនាពិតជាជក់ចិត្តនៅថ្ងៃទី២៧ ចុងខែនេះ និងថ្ងៃទី៤ កក្កដាខាងមុខ ៕
ចែករំលែកព័តមាននេះ