រាជធានីភ្នំពេញ ៖ រនាំងដែកចែកទ្រូងផ្លូវចំនួន ១៧ផ្ទាំង ត្រូវរងការខូចខាត និងមនុស្សប្រុសស្រី ៤នាក់ បានរងរបួសធ្ងន់ ខណៈដែលរថយន្ត ២គ្រឿង បានបើកប្រដេញគ្នាហើយរេចង្កូតទៅបុក ដែលហេតុការណ៍នេះ បានកើតឡើងកាលពីវេលាម៉ោង ១១ និង ៣០នាទី យប់ថ្ងៃទី១០ មិថុនា ២០១៣ តាមបណ្តោយផ្លូវព្រះមុនីវង្ស កែងផ្លូវ២៤២ នៅចំណុចព្រំប្រទល់សង្កាត់ចតុមុខ និងសង្កាត់បឹងព្រលិត ។
តាមសាក្សីឃើញហេតុការណ៍ បានឱ្យដឹងថា រថយន្តកាមរីហាយប្រ៊ីត ពណ៌ស ១គ្រឿង ពាក់ស្លាកលេខ ភ្នំពេញ 2R-6252 និងរថយន្តស្ព័រ ពណ៌ទឹកប្រាក់ អត់ស្លាកលេខ ១គ្រឿងទៀត បានបើកប្រដេញគ្នាតាមបណ្តោយផ្លូវព្រះមុនីវង្ស លុះមកដល់ចំណុចកើតហេតុក៏ទៅបុករនាំងដែកចែកទ្រូងផ្លូវបាក់អស់ ១៧ផ្ទាំង រួចរថយន្តស្ព័រខាងលើជ្រុលទៅបុករ៉ឺម៉កម៉ូតូ ១គ្រឿង ដែលបើកបញ្រ្ចាស់ទិសនៅម្ខាងផ្លូវ បណ្តាលឱ្យរ៉ឺម៉កខ្ទេចទាំងស្រុង និងបុរសម្នាក់ជាអ្នកបើកបរ ព្រមទាំងនារី ៣នាក់ ដែលរួមដំណើររងរបួសធ្ងន់ បន្ទាប់មកជ្រុលទៅមុករថយន្តម៉ាសឺដែស ១គ្រឿង ដែលចតស្ងៀមលើចិញ្ចើមផ្លូវ បណ្តាលឱ្យខ្ទេចកង់ឆ្វេងផ្នែកខាងក្រោយ ។ ចំណែករថយន្តកាមរី បន្ទាប់ពីបុករនាំងដែកចែកទ្រូងផ្លូវហើយ បានជ្រុលទៅបុកបង្គោលភ្លើងជិតស្តុបពេទ្យចិន។ ក្រោយបង្កហេតុ ម្ចាស់រថយន្តទាំង២ បានរត់គេចបាត់ស្រមោលតែម្តង ៕
ចែករំលែកព័តមាននេះ